په هلمند کې جګړه سیمه ییزو او مرکزي چارواکو روانه ساتلې

(Last Updated On: فبروري 24, 2017)

vlcsnap-2017-02-24-18h08m15s107

د هلمند عملیاتي مسوول وایي، وزیران، مرستیالان او د امنیتي بنسټونو رییسان په دې جګړه کې ګټې لري؛ ځکه په کې ښکېل پاتې دي.

د هغو اطلاعاتو له مخې، چې آریانا نیوز ته ورکړل شوي، د زیاترو سیمه ییزو چارواکو تر څنګ، وزیران، مرستیالان او د امنیتي بنسټونو رییسان او جنرالان، چې هم په اوسني حکومت کې کار کوي او هم د پخواني حکومت اړوندان دي، د جګړې په دوام کې مستقیم لاس لري او ټول غلاوې کوي.

دی په ډاګه کوي، چې، د قراردادیانو پیسې، د سون توکو او دولتي ځواکونو د مهماتو او وسلو د پلور او دغه راز د سلګونه خیالي سرتېرو معاشونه د مرکزي او سیمه ییزو چارواکو جیبونو ته ځي او له  همدې کبله د جګړې د دوام لپاره هڅې روانې دي.

د هلمند ولایت عملیاتي مسوول عبدالجبار قهرمان په ډاګه کړنې، چې: 

په هلمند کې د امنیتي ځواکونو د قراردادي پیسو په ډېره برخه کې  حکومتي چارواکي غبن کوي.

دوه یم، د سون توکو د پیسو ستره برخه د حکومتي مسوولینو جیبونو ته لویږي او د موادو ډېره کمه برخه ملي ځواکونو ته رسیږي.

درېیم، په هلمند کې د سلګونه خیالي سرتېرو معاشونه هم  د مرکزي او سیمه ییزو چارواکو تر منځ وېشل کیږي.

څلورم، د ځواکونو د مهماتو پلور هم د چارواکو د عوایدو ښه لار ده.

پېنځم د ډېرو ګټې د نشه یي توکو په کر او قاچاق کې نغښتې دي.

د هلمند په جګړه کې جنګیدونکي سرتېري هم وایي، چې دولت نه غواړي روانه جګړه پای ته ورسیږي.

هغه څه چې په هلمند کې د امنیتي ځواکونو په وړاندې جفا بلل کیږي د حکومتي مشرانو له سترګو پټ نه دي؛ ځکه، نو تر اوسه څلویښت ځله بېلابېل پلاوي د ولسمشر غني، اجرائیه رییس، وزیرانو او د امنیتي بنسټونو د مرستیالانو په ګډون د حالت د څېړلو لپاره دې ولایت ته تللي، خو ویل کیږي، چې اوبه هیڅ نه دي خوځیدلي.

ولسمشر محمد اشرف غني هغه مهال ویلي وه؛ اجازه نه ورکوم، چې ستاسو له مهماتو، لباس او غذا څخه غلا وشي او مافیایي کړۍ ستاسې حقوق تر پښ لاندې کړي.

د وسلو، مهماتو او حتا د امنیتي ځواکونو د یونیفورم پلورل هغه کیسه ده، چې د هر سرتېري په ژبه  اوړي را اوړي او له دا ډول معاملو ستړي شوي دي. حتا باور لري، چې دولت نه غواړي د جګړې شدت را کم شي.

خبریالان: باعث حیات او بریالی رحیمي

About Ariana News

Check Also

د بلخ نومیالی هنري لوبغاړی ووژل شو

(Last Updated On: نوومبر 17, 2018) امنیتي چارواکو ویلي، چې په بلخ کې د دغه …