عاجل خبرونه

په پاکستان کې د وسلوالو پټنځایونو ته پر پاملرنه ټینګار وشو

(Last Updated On: جون 30, 2017)

د ناتو سرمنشي وایي، د افغانستان د کړکیچ د اواري لپاره باید په پاکستان کې د وسلوالو پټنځایونو ته پام وشي.

په بروکسل کې د ناتو دفاع وزیرانو په ناسته کې د افغانستان پر حالاتو، له سایبري بریدونو سره پر مبارزه او د ناتو دفاعي بودجې پر لګښت خبرې وشوې او د ناتو سرمنشي د افغانستان د کړکیچ اواری په پاکستان کې د ترهګرو له پټنځایونو سره غوټه بولي.

د ناتو سرمنشي ینس ستولتنبرګ وایي، ناتو له پاکستان سره په سیاسي او پوځي برخو کې اړیکې روانې ساتلي دي؛ ناتو او نورو هېوادونو له پاکستان سره په دغه هېواد کې د طالبانو او حقاني شبکې د پټنځایونو خبره راپورته کړې او د دې ستونزې اوارول به په افغانستان کې د روانې شخړې د حل یوه برخه وي.

د ناتود سرمنشي ینس ستولتنبرګ په وینا، د ناتو غړیو د افغان کماندو ځواکونو د پیاوړتیا او هوایي ځواکونو ته د نورو الوتکو او چورلکو په ور سپارلو او د دې ځواکونو  روزنې ته د زیاتې پاملرنې پر مسایلو هوکړه  کړې؛ خو هغه وویل؛ له افغان حکومت هم تمه لري، چې د سمونونو لړۍ او له فساد سره مبارزه چټکه کړي.

ناتو نه شي کولی په یوازې سر په افغانستان کې دوامداره سوله خوندي کړي. مونږ په خپلو افغان شریکانو حساب کوو او له هغوی غواړو، چې د کلیدي اصلاحاتو، ښې حکومت دارۍ، د قانون د حاکمیت د پراختیا، له فساد سره په مبارزې او د ښځو او نجونو د حقونو د ساتنې لپاره په خپلو ژمنو عمل وکړي.

د ناتو سر منشي زیاتوي، چې د افغانستان کړکیچ ته باید په سیمه ییزه کچه د حل لار ولټول شي. ناتو اوس په افغانستان کې ۱۳ زره ۵ سوه سرتېري لري، چې تر ۸۵۰۰ امریکایان دي

د پریکنده ملاتړ ماموریت قومندان وایي، چې د افغانستان جګړه له بندون سره مخ شوې او د دې وضعیت د بدلولو لپاره نورو زرګونه بهرنیو سرتېرو ته اړتیا شته.

ینس ستولتنبرګ دغه خبرې په بروکسل کې د ناتو د دفاع وزیرانو له ناستې وروسته کړې دي.

 د امریکا د دفاع وزیر جیمز متیس بیا وایي، چې نه شي کولی د افغانستان د جګړې لپاره مهالوېش وټاکي؛ ځکه دا جګړه د وړاندوینې نه ده، خو ناتو ژمنه کړې، چې افغانستان له ترهګرۍ او وحشته وژغوري.

دا په داسې حال کې ده ، چې افغان دفاع وزیر د ناتو د دفاع وزیرانو ناستې ته د خپل هېواد څلورکلن دفاعي او امنیتي پلان وړاندې کړی او هغو هم منلی دی.

About Ariana News

Check Also

اجرائیه رییس عبدالله د ايران له ولسمشر سره لیدلي

(Last Updated On: سپتمبر 25, 2018) د افغانستان د ملي وحدت حکومت اجرائیه رییس داکتر …