کابل د افغان او پاکستانیو چارواکو د سولې د خبرو د عملي پلان کوربه دی

(Last Updated On: جولای 22, 2018)

 د بهرنیو چارو وزارت سیاسي مرستیال وايي، چې د سولې د خبرو د عملي پلان په ترڅ کې د کابل او اسلام آباد تر منځ د باور پر رامنځته کیدو سربېره به پاکستان هم وهڅول شي، چې له افغانستان سره د سولې او ثبات په برخه کې عملي ګامونه پورته کړي.

د افغانستان او پاکستان د سولې د خبرو عملي پلان په اړه لومړۍ غونډه د یکشنبې پر ورځ( د چنګاښ ۳۱) په کابل کې جوړه او په کې د پاکستان اته ویشت سیاسي او پوځي استازیو ګډون کړی دی. غونډه په پېنځه کمیتو کې پر سوله، سیاسي او امنیتي اړیکو‎، اقتصاد او د کډوالو پر مسایلو  خبرې کوي.

د افغانستان د بهرنیو چارو وزارت سیاسي مرستیال حکمت خلیل کرزي څرګنده کړې؛ له دغې ناستې موخه داده، چې د افغانستان او پاکستان تر منځ ډاډمنه فضا رامنځته او پاکستان د اوسنۍ جګړې  په بېلابېلو برخو کې له افغانستان سره همکاري وکړي.

پاکستانی پلاوی له افغانستان سره د سولې په برخه کې د همکارۍ له پیغام سره راغلی او تمه ښيي، چې د خبرو د عملي پلان په پلي کیدو به د دواړو هېوادونو تر منځ د همکارۍ اړیکې کوشیر شي او مثبتې پایلې ته به ورسیږي.

د پاکستان د بهرنیو چارو وزارت مرستیاله تهمینه جنجوعه وایي؛ هیله مو دا ده، چې په ګډو کاري ډلو کې به کار وکړو. نه غواړم، چې پر ستونزو خبرو وکړم. تمه مو داده، چې د افغانستان او پاکستان په لومړیتوبونو، سولې، امنیت او اقتصاد کې پر مهمو مسایلو مثبتو پایلو ته ورسیږو.

د افغانستان د بهرنیو چارو وزارت په داسې حال کې د پاکستاني پلاوي کوربه دی، چې په کابل کې د پاکستان سفارت مخې ته د افغانانو د اعترض خیمه اوس هم ولاړه ده.

د سولې کاروان غړي له پاکستان څخه غواړي، چې د افغانستان د جګړې له تودولو لاس واخلي.

د سولې کاروان مشر اقبال خیبر وایي؛ ټاکل شوې مونږ پاکستان ته یو لیک وسپارو، چې د افغانستان د جګړې رښتیا وپېژني او د سولې له بهیر سره مرسته وکړي.

په تېره څه باندې یوه نیمه لسیزه کې د افغانستان او پاکستان سیاسي اړیکې له ډېرو هسکو او ژورو تېرې شوې دي.

د سولې، خبرو او همکاریو عملي پلان د کابل او اسلام آباد د اړیکو د تودولو او د ستونزو د اوارۍ لپاره را منځته شوی دی.

خبریال: باعث حیات

About Ariana News

Check Also

د افغانانو تر منځ د سولې مذاکراتو پیلولو ته زمینه برابره ده- خلیلزاد

(Last Updated On: نوومبر 19, 2018) د افغانستان د سولې لپاره د امریکا متحده ایالتو …