داعش په یوه خپره شوې خبرپاڼه کې د بغلان ولایت د نهرین ولسوالۍ پر خانقا د برید له کبله د ۱۰ کسانو د وژلو مسوولیت منلی دی.

دوه شپې مخکې (د جمعې پر شپه) په نهرین ولسوالۍ کې د صوفيانو پر زیارت وسلوال برید تر سره شو.

په دې برید کې، چې د  ولسوالۍ د زاړه ښار د سید پاچا پر زیارت تر سره شوی ۱۰ کسان ووژل شول.

له دې مخکې د بغلان امنيه قومندانۍ د امنيت آمر عبدالغيور خادم ويلي وه، چې د دې پېښې په تړاو څو کسان نيول شوي او څېړنې ترې روانې دي.

د ملي دفاع وزارت چارسمبالی محمد یعقوب مجاهد د چین له ځانګړي استازي یوشسیایونګ او په کابل کې د دغه هېواد له سفیر ژاو شینګ سره په کتنه کې ویلي، چې چین د افغانستان د خلکو لپاره یو ملګري ګاونډ او مهم همکار دی.

ملي دفاع وزارت څرګنده کړې؛ په دې کتنه کې دواړو لوریو پر اقتصادي همکاریو، د دوه اړخیزو اړیکو پر پیاوړتیا، د سرحدونو، پانګونې او نورو مسایلو په اړه بحث او خبرې کړې دي.

محمد یعقوب مجاهد دغه راز له چین سره په ګډو برخو کې د ملي دفاع وزارت پر ژمنو ټینګار کړی دی.

په بغلان ولایت کې پرون شپه د یوه وسلوال برید له کبله ۱۰ کسان وژل شوي دي.

د بغلان پولیسو ويلي: ۱۰ کسان، چې تېره شپه( د لړم یوویشتمه ) یې د دغه ولایت د نهرین ولسوالۍ په یوه جومات کې ذکر کاوه د ناڅرګندو وسلوالو لخوا وژل شوي دي.

د بغلان ولايت د امنيې قومندانۍ د مطبوعاتو او عامه اړيکو دفتر په خبرپاڼه کې راغلي، چې يادو کسانو د ورځې په اوږدو کې کار کاوه او د شپې جومات او خانقا ته د عبادت لپاره تلل.

د دې برید پړه تر دې دمه هیچا پر غاړه نده اخیستې.

د بغلان د امنيه قومندانۍ د امنيت آمر عبدالغيور خادم ويلي، د دې قضيې په تړاو څو کسان نيول شوي او څېړنې ترې روانې دي.