Connect with us

تازه خبرونه

یو طالب پلاوی له روسي چارواکو سره د خبرو لپاره مسکو ته رسیدلی

Ariana News

خپور شوی

 په

(Last Updated On: وږی ۲۳, ۱۳۹۸)

رویترز خبري آژانس څرګنده کړې، چې دغه طالب پلاوی به چین ایران او د منځنۍ آسیا ځينو هېوادونو ته هم سفرونه وکړي.

د طالبانو او امریکا اوږدې خبرې له ناکامۍ سره مخ شوې؛ نو، ځکه اوس طالبانو د امریکا له سیالانو سره د خبرو لپاره سفرونه پیل کړي دي.

راپورونه وايي؛ د قطر له دفتره درې کسیز طالب پلاوي مسکو ته رسیدلی، چې د افغانستان د سولې په اړه له روسي چارواکو سره خبرې وکړي.

مسکو ته د رسیدلي طالب پلاوي غړي شېر محمد عباس ستانکزي رویترز ته ویلي، چې دا سفر له امریکا سره د خبرو د بیا پیلولو د هڅو برخه نده، بلکې دوی غواړي له افغانستان څخه د بهرنیو سرتېرو د وتلو په اړه د سیمې د هېوادونو نظرونه ترلاسه کړي.

نوموړي دا هم په ډاګه کړې، مونږ اوس هم د خبرو له لارې د سولې غوښتونکي یو. مونږ، چې هر کله هوکړې ته نږدې شوي یو؛ امریکايان پر شا شوي دي. دا درېیم ځل دی؛ دوه ځله یې د اوباما په واکمنۍ کې دا کار کړی دی. جګړه پر مونږ تپل شوې ده. که امریکا سوله نه غواړي، مونږ دفاع ته مجبور یو ان تر سل کلونو پورې.

راپورونه وايي، چې طالب پلاوی به له مسکو څخه چین، ایران او د منځنۍ آسیا یو شمېر هېوادونو ته هم سفرونه ولري.

دغه راز د پاکستان لومړي وزیر ويلي؛ هیله لري، چې د طالبانو او امریکا په خبرو کې راغلی ځنډ لنډمهاله وي او تمه ده، چې د خبرو له بیا پیلیدو مخکې په افغانستان کې اوربند ټينګ شي.

د پاکستان لومړی وزیر عمران خان وایي؛ نه پوهیږو، چې په خبرو کې راغلې  دمه دایمې او که لنډ مهالې ده؛ خو هیله لرو، چې رامنځته شوې دمه لنډ مهالې وي، ځکه افغانان سوله غواړي.

د پاکستان لومړي وزیر دا هم ویلي، چې امریکا په افغانستان کې د یوه ملت پر ضد جګړه کوي.

د نوموړي د څرګندونو له مخې؛ امریکا باید په افغانستان کې د خپلې ماتې پړه پر اسلام آباد بار نکړي.

عمرذان خان څرګنده کړې؛ امریکایان باید له افغانستان څخه ووځي، ترمپ هم غواړي دا کار وکړي او د وتلو پر وخت باید هر اړخیزه سیاسي هوکړه رامنځته شي.

په کابل کې هم باورونه داسې دي، چې طالبان غواړي د سیمې د هېوادونو ملاتړ خپل کړي او له امریکا سره بیا خبرې پیل کړي.

مسکو ته د تللي طالب پلاوي مشري شیر محمد عباس ستانکزی کوي. روسي خبري رسنیو خبر ورکړی، چې دغه پلاوی د افغانستان لپاره د روسیې له ځانکړي استازي ضمیر کابلوف سره کتلي دي.

دا په داسې حال کې ده، چې له امریکا وروسته د افغانستان حکومت هم تر ټاکنو پورې د سولې خبرې درولي دي.

تازه خبرونه

په افغانستان کې د سولې او جګړې برخلیک ناڅرګند پاتې دی – افغان سیاستوال

Ariana News

خپور شوی

په

توسط

(Last Updated On: چنګاښ ۲۵, ۱۳۹۹)

د افغانستان یو شمېر سیاستوالو ویلي، چې په افغانستان کې د سولې او جګړې برخلیک ناڅرګند پاتې دی.

په قطر کې د طالبانو او امریکا تر منځ د سولې د هوکړه لیک له مخې به امریکايي سرتېري په څوارلس میاشتو کې له افغانستان څخه وځي؛ دلته په افغانستان کې د افغانانو د خپلمنځي خبرو او روانې جګړې د پای ته رسیدو برخلیک ناڅرګند دی.

د ملي پخلاینې عالي شورا مشر عبدالله عبدالله ویلي؛ افغانستان د تاریخ په یوه حساس پداو کې دی؛ له یوې خوا د سولې هڅې روانې دي او له بلې خواجګړه روانه ده.

امریکا له خپلو نړیوالو ملګرو غواړي، چې افغانستان ته له سولې وروسته پخپلو پلانونه کار پیل کړي.

د امریکا د پوځ د مرکزي قومندانۍ قومندان جنرال مک کینزي هم په خپل سفر کې افغان ولسمشر ته ډاډ څرګند کړ، چې افغانستان به پخوانیو حالاتو ته نه ستنیږي.

د ولسمشر د ویاند مرستیال دواخان مینه پال له ولسمشر اشرف غنی سره د جنرال مک کینزي د لیدنې په اړه وایي: دواړو خواوو د همکاریو د راتلونکي ګډون او مشارکت په اړه خبرې وکړې.

اټکل داسې و، چې روانه اوونۍ به په قطر کې د افغانانو خپلمنځي خبرې پیل شي؛ خو د زندانیانو د خوشې کولو پر سر اختلافونو له کبله دا چاره هم ځنډنۍ شوه.

د حکومت د سولې مرکچي پلاوي غړي فاروق مجروح ویلي: اوس باید طالبان د ښه نیت ښکارندوی او خبرو ته چمتو شي.

سیاسي شنونکي فهیم صدیقي ویلي، چې په دې حالاتو کې امریکا د چټکې وتنې په فکر کې ده او تر منځ یې د افغانستان خلک قرباني کیږي.

دغه راز واشنګتن پوست ورځپانې هم داسې راپورونه خپاره کړي، چې ګواکې د جګړې د کرښو طالبانو او سیاسي رهبرانو تر منځ د سولې په اړه د نظر بېوالی لیدل کیږي.

دغې ورځپاڼې څرګنده کړې: طالب قومندانان فکر کوي، چې جګړه یې ګټلو ته ورنږدې کړې؛ خو طالبان بیا د دوی تر منځ هر ډول اختلاف ردوي.

Continue Reading

تازه خبرونه

عبدالرشید دوستم په رسمي بڼه د افغانستان درېیم مارشال شو

Ariana News

خپور شوی

په

توسط

(Last Updated On: چنګاښ ۲۵, ۱۳۹۹)

د افغانستان د شمال په شبرغان ښار کې عبدالرشید دوستم د هېواد د درېیم مارشال په توګه د ملي پوځ وروستۍ رتبه خپله او پر سینه یې وروټومبل شوه.

عبدالرشید دوستم د جنبش اسلامي بنسټګر او د افغانستان په سیاست کې یوه د بحث وړ سیاسي او پوځي څېره او د هېواد د ازبکانو تر ټولو غوره مشر پاتې شوی دی.

د آریانا نیوز په دې راپور کې د عبدالرشید دوستم د ژوندانه بېلابېلو اړخونو او هڅو ته یوه لنډه کتنه شوې او ښايي دا پوښتنه، چې نوموړی څوک او ولې د افغانستان درېیم مارشال شو؛ هم ځواب شي.

دوستم د داکتر نجیب په حکومت کې د هغه ټينګ پلوی و؛ خو په ۱۹۹۱ کې یې له هغه لاره بېله کړه او له مجاهدینو سره یې همکاري پیل کړه.

هغه د برهان الدین رباني د واکمنۍ پر مهال( ۱۹۹۲) له طالبانو سره سختې جګړې وکړې او په کورنیو جګړو کې یې د حزب اسلامي له رهبر ګلبدین حکمتیار سره ملګرتیا وکړه.

پر ۱۹۹۷ کال، چې په افغانستان کې کورنۍ جګړې وې؛ د افغانستان په شمال کې یې د ځان لپاره خپله اداره جوړه او د مالي چارو لپاره یې په بهر کې خپلې ادارې ته افغانۍ چاپولې.

هغه د افغانستان په شمال کې د طالبانو پر خلاف جنګي جبهه هم پرانیستې وه، چې هغه وخت یې  پلویانو د دوستم پادشاه لقب ورکړ.

هغه د طالبانو د واکمنۍ له ړنګیدو را وروسته په دوه زره څلورم  میلادي کال کې د افغانستان ولسمشریزو ټاکنو ته ځان نوماند کړ؛ خو نهه په سلو کې رایې یې تر لاسه او څلورم ټاکنیز مقام یې خپل کړ.

پخواني ولسمشر حامد کرزي د واک په لومړي پېر کې د پوځ لوی درستیز وټاکه؛ خو دا دنده یې هغه وخت وځنډول شوه، چې د ترکتبارانو د شورا مشر اکبر بای پرې د اختطاف تور پورې کړ.

د دوه زره څوارلسم کال په ولسمشریزو ټاکنو کې د اشرف غني لومړی مرستیال شو او پر دغه مهال یې د هېواد په شمال کې د طالبانو پر خلاف جنګې لیکې پیاوړې کولې؛ خو پر احمد ایشچي د جنسي تېري پر تور له تورنیدو وروسته ترکیې ته ولاړ او هلته یې پخپله خوښه تبعیدي ژوند روان وساته.

د ولسمشر د لومړي مرستیالۍ پر وخت یې له ولسمشر سره اړیکې ډېرې ترینګلې وې او پر هغه یې کلکې نیوکې هم کولې.

دا داسې مهال و، چې په کور د ننه د عبدالله عبدالله په مشرۍ د ولسمشر اشرف غني خلاف سیاسي ائتلاف رامنځته او دوستم هم د دغه ائتلاف ملګری او له ترکیې څخه کابل ته راستون شو.

هغه د دوه زره نولسم کال په ولسمشریزو ټاکنو کې د عبدالله عبدالله په مشرۍ د ثبات او همپالنې له ټاکنډلې ملاتړ وکړ او د اشرف غني په مشرۍ د دولت جوړوونکې ټاکنډلې پر وړاندې یې هڅې چټکې کړې.

کله، چې یادې ټاکنې لانجمنې شوې؛ نو ولسمشر اشرف غني له عبدالله عبدالله سره، چې ولسمشري یې اعلان کړې وه؛ د واک د وېش پر سر سیاسي معاملې او بیا هوکړې ته اړ شو او عبدالله عبدالله د خپلو غوښتنو په نوملړ کې عبدالرشید دوستم ته د مارشالۍ د رتبې ورکولو غوښتنه وکړه او له اشرف غني سره د سیاسي هوکړې له لاسلیک وروسته ولسمشر د هغه د مارشالۍ حکم لاسلیک کړ. په دې هوکړه لیک کې راغلي، چې عبدالرشید دوستم به د دولت عالي شورا او ملي امنیت شورا غړیتوب هم ولري.

 د یادونې ده، چې عبدالرشید دوستم له شاه ولي خان او محمد قسیم فهیم وروسته د هېواد درېیم جنګیالی دی، چې د واکمنو لخوا مارشال نومول شوی دی.

Continue Reading

تازه خبرونه

پېنځه پوځی اډې مو افغان ځواکونو ته سپارلي ـ پنتاګون

Ariana News

خپور شوی

په

توسط

(Last Updated On: چنګاښ ۲۶, ۱۳۹۹)

د امریکا دفاع وزارت منلې، چې د دوحې د سولې تړون پر بنسټ یې په افغانستان کې له ۵ پوځي اډو ځواکونه ایستلي او افغان سرتېرو ته سپارل شوي؛ خو هڅې مو د افغان ځواکونو پر غښتلي کولو راڅرخي.

د امریکا دفاع وزارت په اعلامیه کې راغلي، چې د دغو ۵ پوځي اډو مسوولیت افغان پوځیانو ته سپارل شو؛ خو پنټاګون په دې اړه نور جزئیات ندي ورکړي، چې یادې اډې د افغانستان په کومو ولایتونو کې دي.

پنتاګون ویلي، چې دغه راز د همدې تړون له مخې مو په افغانستان کې د امریکايي سرتېرو شمېر هم شاو خوا ۸۰۰۰ ته راټيټ کړی دی.

د پنټاګون ویاند هافمن څرګنده کړې، چې امریکايي او ناتو ځواکونه به له ترهګرۍ سره د مبارزې په برخه کې له افغان ځواکونو سره همکاري روانه ساتي.

د نوموړي د څرګندونو له مخې؛ پېنځه پوځي اډې، چې په رسمي توګه له امریکايي پوځونو سره وې؛ افغان سرتېرو ته سپارل شوي دي او د امریکايي سرتېرو شمېر د اته زره شاوخوا ته راټيټ شوی دی. اوس مونږ د افغان ځواکونو په پیاوړي کولو متمرکز یو، نه په شمېر پورې. مونږ د خپل ځان د ساتنې او خوندیتوب لپاره لازم واکونه لرو.

په قطر کې د طالبانو د سیاسي دفتر مسوولین وايي، چې د قطر د سولې هوکړې عملي کول د امریکا او طالبانو دواړو لپاره مهم دي.

مونږ سولې ته د رسیدو لپاره په خبرو توافق کړی دی. په دغه حالت کې دواړه خواوې د بریا احساس کوي.

په قطر کې د طالبانو او امریکا ترمنځ د سولې د هوکړې له مخې ټاکل شوې، چې ټول امریکايي سرتېري په څوارلس میاشتو کې له افغانستان څخه بهر شي. اوس امریکايي چارواکي وايي، چې له افغانستان څخه  د پاتې شاوخوا اته زره سرتېرو وتل به د طالبانو لخوا د ژمنو په عملي کولو پورې تړلي وي.

Continue Reading

Trending