د پاکستان د عالمانو شورا رییس وایي، د مولانا سیمع الحق په وژل کیدو به د ده په ټکو جهاد ډېر ځواکمن شي.

د طالبانو معنوي پلار مولانا سیمع الحق د جمعې پر ورځ ووژل شو. نوموړی د طالبانو معنوي پلار یادیږي، چې د پاکستان حکومت یې وژنه یوه ستره ضایعه بولي.

طالبانو هم د نوموړي ترور غندلی دی.

مولانا سیمع الحق په څرګنده د طالبانو جګړې ته د جهاد نوم ورکاوه او ملاتړ یې ترې کاوه.

په افغانستان او پاکستان کې د سیمع الحق د وژنې پېښې ته ډول ډول غبرګونونه ښکار شوي دي.

د سیمع الحق وژنې ته د پاکستانيو عالمانو د شورا رییس غبرګون ډېر توند او احساساتي دی.

د پاکستان د عالمانو شورا رییس مولانا طاهر اشرفي په یوه احساساتي او ژړغونې وینا  کې وویل: که څوک وایي، چې د مولانا سیمع الحق له وژل کیدو سره به په افغانستان کې جهاد پای ته ورسیږي، تېروتنه کوي. په الله سوګند، چې په افغانستان کې به جهاد د مولانا سیمع الحق له وژل کیدو سره تر دې بریده پیاوړی شي، چې هیڅ باطل به پاتې نشي.

د مولانا سیمع الحق زوی هم ویلي، چې پلار یې نیواک ګرو وژلی دی.

د مولانا سیمع الحق زوی حمید الحق وایي: دا د نیواک ګرو کار دی؛ دا د هغو کسانو کار دی، چې په افغانستان کې جهاد نه خوښوي، په کشمیر کې جهاد نه خوښوي، دوی هغه کسان وژني، چې غواړي امن ټینګ کړي.

د مولانا سیمع الحق په وژل کیدو سره د افغانستان په ټولنیزو شبکو کې بېلابېل غبرګونونه ښکاره شوي دي.

په افغانستان کې د سیاسي شنونکیو باور دا دی، چې طالبانو کلیدي کس له لاسه ورکړ.

سیاسي شنوونکی احمد سعیدي وایي: د سمیع الحق په وژل کیدو طالبانو خپل کلیدي کس له لاسه ورکړ؛ خو د پاکستان اسخبارات د دې ځواک لري، چې نوموړي ته ورته لس نور کسان رامنځته کړي او د جګړې اور بل وساتي.        

سمیع الحق په افغانستان کې د زیاترو خلکو په منځ کې بد نوم لري؛ یو دلیل یې هم دا دی، چې سمیع الحق د طالبانو جګړه جهاد نوموله او ملاتړ یې ترې کاوه.

سیاسي شنوونکی عمر صدر وایي، چې: د سمیع الحق وژل کیدل به د افغانستان د سولې او جګړې پر بهیر کومه اغېزه ونلري.      

د ولسي جرګې غړې آرین یون وایي: پاکستان د خپل هېواد د ګټو لپاره مولانا سمیع الحق وکاروه او په پای کې یې د یوې سوځیدلې پرزې په توګه له مخې لیرې کړ.             

د راپورونو له مخې؛ د طالبانو ډېري مشران د مولانا سیمع الحق په دیني مدرسه کې زدکړې کړي او هغه په طالبانو کې ډېر نفوذ درلود. ښایي له همدې کبله وه، چې د کابل او واشنګتن چارواکي په دې وروستیو کې له هغه سره په اړیکه کې ول او غوښتنه یې ترې کوله، چې د افغانستان د سولې له بهیره ملاتړ وکړي.

د سیمع الحق د وژنې اصلي انګیزه تر دې دمه روښانه نده؛ خو د پاکستان لومړي وزیر، چې چین ته سفر کړی، د دغې پېښې پر جدي څېړنه یې ټینګار کړی دی.

خبریال: شاهپور فرهمند