د کانونو او پټرولیم وزارت چارسمبالي هدایت الله بدري بدخشان ولایت ته په خپل سفر کې د دفاع وزارت له ستر درستیز فصیح الدین فطرت او د بدخشان والي له مرستیال سره په کتنه کې د کانونو د غیر قانوني استخراج پر مخنیوي ټینګار وکړ او له سیمهییزو چارواکو یې وغوښتل، چې په دې اړه همکاري وکړي.

د کانونو او پټرولیم وزارت په خبرپاڼه کې راغلي، چې هدایت الله بدري د شرکتونو له مسوولینو او ځايي خلکو سره په کتنه کې ویلي، چې د کانونو غیر قانوني کېندنې ته اجازه نشته او ټول شرکتونه اړ دي، چې د قانون له مخې قراردادونه لاسلیک کړي.

نوموړي زیاته کړې، چې د کانونو او پټروليم وزارت د سرو زرو د ومنځلو او مسلکي کانونو د استخراج لپاره يوه هر اړخيزه کړنلاره چمتو کړې او کانکېندونکي کولى شي، چې د بدخشان د کانونو او پټروليم له رياست څخه خپل جوازونه ترلاسه او د قانون له مخې خپل کار وکړي.

د کانونو وزارت چارسمبالي ټینګار کړی، چې د کانونو د غیر قانوني استخراج اجازه به هیچا ته ورنکړي او له سرغړونکیو سره به قانوني چلند وشي.

د ایران دولتي رسنیو ویلي، چې د افغانستان سره پر پوله د دغو پوځي روزنیزو هڅو موخه د ایران له ختیځو پولو بهر د ترهګرو له شتوالي او د هغوی له خوځښتونو سره مقابله ده.

ایراني چارواکو ویلي، چې له  افغانستان سره د ۳۰۰ کیلومټره پولې دېوال به د روان کال تر پایه بشپړ شي.

په راپور کې راغلي، چې له افغانستان سره پر ګډه پوله د ایران دغه پوځي روزنیزې هڅې د افغانستان د چارسمبالي حکومت په ګډون د ایران له ګاونډ هېوادونو سره پر نږدې همغږۍ او همکارۍ ترسره کېږي.

 د دغې رسنۍ لخوا په خپرو شویو انځورونو کې لیدل کیږي، چې پوځي وسایل او الوتکې هم په کې شته دی.

دغه پوځي روزنیزې هڅې د رضوي خراسان په سیمه کې د ایران او افغانستان پولې ته څېرمه ترسره شوې.

همداراز ایراني چارواکو ویلي، چې تر اوسه له افغانستان سره پر پوله ۶۵ کیلومټره دیوال جوړ شوی او ۳۰۰ کیلومټره به یې د روان کال تر پایه بشپړ شي.

د پاکستان لومړي وزیر شهباز شریف ادعا کړې، چې د دغه هېواد د پوځ پر مرسته له پاکستان څخه افغانستان ته یې د مالونو د قاچاق مخه نیولې ده.

د پاکستان لومړي وزیرشهباز شریف زیاته ګړې؛ له دې مخکې په پراخه کچه پاکستاني توکي افغانستان ته قاچاق کېدل؛ خو اوس یې د پوځ پر مرسته مخه نیول شوې او صفر ته رسېدلي دي.

نوموړي د پاکستان د کابینې په غونډه کې ویلي؛ د دغه هېواد مرکزي حکومت توانېدلی، چې د پوځ پر مرسته افغانستان ته د مالونو د قاچاق کچه صفر ته راټیټه کړي.

هغه ادعا کړې، چې حکومت د پوځ پر مرسته د ډېرو داخلي او بهرنيو ننګونو د له منځه وړلو توان لري.

د يادونې ده، چې افغانستان له پاکستان او ایران سره د نورو هېوادونوپر پرتله تر ټولو اوږدې پولې لري، چې د سوداګريزو توکو يو له مهمو پولو څخه دى؛ خو د سرحدي تاوتريخوالي او سياسي لاملونو له کبله له پاکستان سره دغه لارې وخت ناوخته تړل کېږي.

د کورنیو چارو وزارت چارسمبالي د غزني امنیه قومندانۍ مسوولانو ته د ظرفیت لوړونې په موخه د جوړې شوې ناستې په پرانیست‌غونډه کې ویلي: د مسوولانو مقام له مسوولیت لوړ ندی.

د کورنیو چارو وزارت د خبرپاڼې له مخې: د کورنیو چارو وزارت چارسمبالي سراج الدین حقاني زیاته کړې: مسوولیت ستر امانت دی، چې باید پر اخلاص، عاجزۍ او د الله تعالی د رضا په پام کې نيولو سره ترسره شي.

نوموړي د نظام او ملت ترمنځ وحدت او واټن د مخنیوي لپاره د سیمه‌ییزو مسوولانو او مجاهدینو چلند او مسلکیتوب ارزښتمن وباله او د اسلامي نظام د وقار ساتنې لپاره يې د دوی پر ښه او مسلکي چلند ټينګار وکړ.

سراج الدین حقاني د اداري او مسلکي زده‌کړو پر اړتیا د ټینګار تر څنګ زیاته کړې؛ د تېروتنو د مخنیوي لپاره باید د مسلکي توب او ظرفیت لوړولو هڅو ته لومړیتوب ورکړ شي.

ویل کیږي، چې د غونډې ګډونوالو ژمنه کړې، چې د خپلو دندو د ښه ترسره کولو لپاره به د مسلکيتوب او اخلاقو معیارونه په پام کې نیسي او د ولس خدمت به د خپلې اصلي دندې په توګه ترسره کوي.