د سې‌شنبه پر سهار(د لیندۍ شپږمه )  په یو لړ ځانګړو مراسمو کې د کرکټ اتلولۍ څلی(جام) کابل ته راورسېد او د هېواد کرکټ لوبغاړو په شتون کې یې تود هرکلی وشو.

دغه کرکټ څلی کابل ته له رسېدو وروسته د افغانستان د کرکټ بورډ لخوا د کابل په شاه دو شمشیره، باغ بابر او قرغې بند په اړوند سیمو کې نندارې ته وړاندې شو.

په دې خبري مراسمو کې د هېواد کرکټ لوبغاړو ګډون وکړ او رسنیو ته یې د دې څلي د نندارې پر ارزښت خبرې وکړې.

دا څلی په داسې حال کې کابل ته راوړل شو، چې د افغانستان کرکټ ملي لوبډلې د کرکټ نړیوال څلي په وروستي پړاو کې له ځلیدو وروسته د پنځوس اوریزو سیالیو اتلولي خپله  او د لومړي ځل لپاره یې دې اتلولۍ ته لار پیدا کړه.

د کرکټ اتلولۍ څلي ۵۰ اوریزه بڼه د ۲۰۲۵ کال په فبرورۍ کې د افغانستان د ملي لوبډلې په ګډون ۸ هېوادونه ترسره کوي.

د افغانستان کرکټ ملي لوبډله په B ګروپ کې له انګلستان، آسټرالیا او سویلي افریقا سره راغلې ده.

ټاکل شوې وه، چې دغه لوبې په پاکستان کې ترسره شي؛ خو پاکستان ته د هند د ملي لوبډلې د نه تګ له کبله به د کرکټ نړيوالې شورا خپله وروستۍ پرېکړه اعلان کړي.

د یادولو ده، چې آریانا ټلویزیون د افغانستان په جغرافیه کې د ۲۰۲۵ کال کرکټ اتلولۍ څلي سیالۍ د ځانګړې او ژوندۍ خپرونې حق تر لاسه کړی دی.

د افغانستان او پاکستان د ۱۹ کلنو کرکټ لوبډلې به نن (سې‌شنبه د لیندۍ شپږمه ) د درې اړخیزو سیالیو په وروستي پړاو کې له یو بل سره مخ شي.

افغانستان او پاکستان په دې درې اړخیزه سیالۍ کې ګډون کړی او هر یو درې بریاوې او یوه ماتې لري.

دا لوبه به له غرمې مخکې ۱۰ بجې د دوبۍ ښار د کرکټ نړیوالې شورا د کرکټ اکاډمۍ په لوبغالي کې ترسره شي.

د افغانستان کرکټ ۱۹ کلنو ملي لوبډلې په دوبۍ کې د درې اړخیزو پنځوس اوره سیالیو په لړ کې متحده عربي اماراتو ته د ۸ ویکټو پر توپیر ماتې ورکړه.

په دې لوبه کې د اماراتو لوبډلې د خپلو ټولو لوبغاړو پر سوځېدو ۸۹ منډې هدف وټاکه او افغانستان په ۲۱.۲ اورونو کې د دوه لوبغاړو پر سوځېدو ترلاسه کړ.

دا د افغانستان کرکټ ۱۹ کلنو لوبډلې درېیمه بریا ده، چې د دغو سیالیو په لړ کې یې پر برخه کیږي.

افغانستان به د سې‌شنبې پر ورځ په پای لوبه کې له پاکستان سره مخ شي.