د پاکستان دفاع وزیر خواجه محمد اصف تېره ورځ په یوه مرکه کې ویلي، چې په کوټه کې ترهګري یوه نیابتي جګړه ده، چې هند د TTP او  BLA په څېر ډلو له لارې زمونږ پر وړاندې روانه کړې ده.

دا په پاکستان کې د چین د پرمختګ د هڅو د شنډولو لپاره یوه دسیسه ده.

خواجه اصف له جیو نیوز سره په مرکه کې ويلي، چې بلوڅ بیلتون پالي او ټي تي پي دواړه ډلې په افغانستان کې پټنځایونه لري او له هغه ځايه خپل بریدونه پلانوي.

نوموړي پر هندوستان د تور پورې کولو پر مهال ویلي، چې د دغو دواړو وسل‌والو ډلو مالي ملاتړ کوي او په افغانستان کې دوی ته د پاکستان د ناامنه کولو لپاره اسانتیاوې برابروي.

اسلامي امارت او هندي چارواکو په دې اړه رسمي غبرګونونه ندي ښودلي؛ خو له دې مخکې د پاکستان دا ډول ادعاوې بې بنسټه یادې شوې دي.

بلوڅ بیلتون پالو د بلوچستان په کويټه ښار کې د رېل په یوه تمځای کې د تیرې ورځې د ځانمرګې برید مسوولیت پر غاړه اخیستی، چې له کبله یې د ۱۹ پاکستانيو پوځيان په ګډون ۲۶ کسان ووژل شول او لږ تر لږه ۵۰ نور ټپیان دي.

د ایران بهرنیو چارو وزیر هغه تور رد کړ، چې د امریکا عدلیې وزارت د ډونالډ ټرمپ د وژنې پر تړاو د سپاه پاسداران درې کسان تورن اعلان کړي وه.

عباس عراقچي په انګلیسي ژبه په یوه څرګندونه کې، چې د ‌شنبې پر ورځ ( د لړم نولسمه ) په ټولنیزو شبکو کې خپره شوه؛ اسرائیل په دې موضوع کې پر لاس لرلو تورن کړل.

هغه دې ته په نغوته کې؛ هرڅوک پوهیږي، چې چا او ولې په تهران کې د لوړې له مراسمو سمدستي وروسته د اسماعیل هنیه د وژلو هڅه وکړه، ولیکل: اوس یو بل غوراوی له نوې سناریو سره رامنځته شوی دی.

اسماعیل هنیه، د حماس یو مشر، چې د امریکا او اروپایي ټولنې لخوا یوه ترهګره ډله ګڼل کیږي؛ د روان کال د اسد پر لسمه په تهران کې ووژل شو.

یوه ورځ مخکې هم د ایران بهرنیو چارو وزارت ویاند اسماعیل بقائي د اسرائیلو دا تورونه د امریکا او ایران ترمنځ د کړکېچ د پېچلي کولو لپاره یوه هڅه یاده کړې وه.

د امریکا عدلیې وزارت د جمعې پر ورځ فرهاد شاکري نومی کس او د هغه دوه ملګري د ډونلډ ټرمپ د وژلو او نورو دسیسو په خاطر د سپاه پاسداران له پلانونو سره د تړاو پزر تور مجرم اعلان کړل.

عباس عراقچي پر ایران تورونه "یوه خندوونکې هڅه بللي او لیکلي یې دي؛ د یوه فرضي قاتل، چې په ایران کې ناست دی او له FBI سره آنلاین خبرې کوي، مرکه د باور وړ نده.

د نیویارک د منهټن فدرالي محکمې د اسنادو له مخې، چې د جمعې پر ورځ خپاره شول؛ فرهاد شاکري، چې اوس په ایران کې دی له FBI سره پېنځه ټیلیفوني مرکې کړي دي.

د دغو اسنادو له مخې؛ فرهاد شاکري ویلي، چې له FBI سره په مرکه کې د همدې لپاره ګډون کوي، څو له قانون پلي کوونکو سره د همکارۍ له لارې د امریکا په زندانونو کې د بند سزا کمولو لاره ومومي.

د محکمې په اسنادو کې د دې زنداني هویت ندی ذکر شوی او یوازې د «شخص-۱» په نوم یاد شوی دی.

عباس عراقچي د ډونلډ ټرمپ د وژلو لپاره پر ایران تورونه رد کړي او هغه یې بې بنسټه بللي دي.

له دې مخکې هم د ایران مشر څو ځله د ډونالډ ټرمپ په اړه ټوکې ټکالې کړې وې او وړاندویېنه یې کړې وه، چې بېرته به سپینې ماڼۍ ته نه ورځي.

له ناندرو سره سره د پاکستان واکمن ائتلاف قانون جوړوونکیو د دوشنبې پر ورځ ( د لړم څوارلسمه ) یو لړ لایحې تصویب کړې، چې له مخې به یې د پوځ د ستر درستیز په ګډون د وسلوالو ځواکونو د مامورینو د کار موده له ۳ کلونو څخه ۵ کلونو ته وغځول شوه.

د پاکستان د قانون جوړوونکیو دغه هڅه به د پاکستان اوسنی لوی درستیز جنرال عاصم منیر، چې له دوه کلونو راپدېخوا په دې دنده کې دی؛ د ۲۰۲۷ کال تر نومبر میاشتې پورې په دې پوځي مقام کې پاتې شي.

د پارلمان غونډه، چې پر ژوندۍ بڼه خپره شوې؛ د پخواني لومړي وزیر عمران خان پر مشرۍ د اپوزیسیون تحریک انصاف پاکستان ګوند د وکیلانو لخوا له سخت اعتراض سره مخ شوه. یو شمېر وکیلانو د دې قانون پاڼي د پارلمان د رییس پر لوري وغورځولې.

د تحریک انصاف ګوند غړي استدلال کوي، چې له مناسب بحث پرته په اساسي قانون کې چټک تعدیل د منلو ندی.

د تحریک انصاف د وکیلانو د څرګندونو له مخې؛ دا اقدام د پاکستان کمزورې ډیموکراسۍ ته زیان رسوي.

دوی همداراز د تحریک انصاف پر غړیو د پرله‌پسې فشارونو په اړه خپل شکایت تکرار کړ او د عمران خان د خوشې کېدو غوښتنه یې وکړه.

دغو وکیلانو ټینګار کړی، چې پخوانی لومړی وزیر د دروغو پر تور په زندان کې دی.

د پاکستان د لومړي وزیر شهباز شریف ائتلافي حکومت ویلي، چې د تحریک انصاف ګوند دغه ادعاوې سیاسي انګیزه لري.

شهباز شریف د روان کال په فبرورۍ کې له ټاکنو وروسته واک ته ورسېد؛ خو عمران خان او د هغه د ګوند غړیو ادعا کړې، چې پوځ د پاکستان پوځ په ټاکنو کې درغلۍ کړې؛ دا تور نه یوازې پوځ، بلکې د حکومت د ټاکنو کمیسیون هم رد کړی دی.

په ۲۰۱۸ کال کې عمران خان د فساد پر وړاندې د مبارزې غوښتنه راپورته کړه او د لومړي وزير په توګه وټاکل شو؛ خو مخکې له دې، چې خپل کاري پېر بشپړه کړي پارلمان د باور له رای بې برخې کړ.

عمران خان د ۲۰۲۳ کال له اګست راپدېخوا د فساد او نورو جرمونو د ناندریزو تورونو له کبله په زندان کې دی او تحریک انصاف ګوند د ایتلافي حکومت تر جبر لاندې دی، چې د پوځ له ملاتړه برخمن دی. عمران خان پر ځان لګېدلي ټول تورونه رد کړي او ادعا لري، چې دا تورونه سیاسي انګیزه لري.