د هند د بهرنیو چارو په وزارت کې د پاکستان، افغانستان او ایران د چارو مسوول جي پي سینګهـ په کابل کې د افغانستان د بهرنیو چارو له چارسمبالي وزیر امیر خان متقي سره وکتل.

په کابل کې د بهرنيو چارو وزارت لخوا په خپره شوې خبرپاڼه کې راغلي، چې په دې کتنه کې دواړو لوریو د افغانستان او هند ترمنځ د خلکو پر تګ راتګ، سياسي او اقتصادي اړيکو خبرې وکړې.

د بهرنيو چارو وزارت چارسمبالي هيله څرګنده کړې، چې د دواړو هېوادونو ترمنځ اړيکې په بېلابېلو برخو کې پراخې شي.

نوموړي دا ټینګار هم وکړ، چې د سوداګریزو اړیکو د پراختیا لپاره باید د افغانانو په ځانګړي توګه سوداګرو ته د هند د ویزې په برخه کې اسانتیاوې زیاتې شي.

نوموړي له افغانستان سره د هند له بشري مرستو هم مننه وکړه او په پرمختیايي برخه کې یې د هند ژمنې هیله بښونکې وبللې.

د بهرنیو چارو وزارت د خبرپاڼې له مخې؛ جي پي سنګهـ له امیر خان متقي سره په لیدنه کې ویلي، چې له افغانستان سره اړیکې د هند لپاره مهمې دي او د دواړو هېوادونو اړیکې لرغونې دي.

دغه هندي ډيپلوماټ ويلي، چې له افغانانو سره د بشري مرستو تر څنګ يې له دغه هېواد سره پراختيايي مرستې هم پيل کړې دي او له اړوند افغان ادارو سره په تخنيکي خبرو بوخت دي.

جي پي سینګهـ د دواړو هېوادونو ترمنځ د اړیکو د پراختیا پر اهمیت د ټینګار تر څنګ زیاته کړې، چې په نږدې راتلونکي کې به د چابهار بندر په اړه د سیمې د هېوادونو، افغانستان او هند د تخنیکي پلاوي ترمنځ خبرې اترې ترسره شي.

دغه راز نوموړي ژمنه وکړه، چې د افغانانو لپاره به د هند د ویزې اسانتیاوې ډېرې شي.

د افغانستان کورنیو چارو وزارت له نشه‌يي توکو او جرمونو سره د مبارزې په اړه د ملګرو ملتونو د دفتر د خپور شوی راپور په غبرګون کې ویلي؛ اسلامي امارت د ملګرو ملتونو هغه سروې او ادعا، چې سږکال په افغانستان کې د تریاکو کښت د ۲۰۲۳ ز.کال پر پرتله ۱۰ سلنه زیات شوی؛ بشپړ ردوي.

د افغانستان کورنیو چارو وزارت ویاند عبدالمتین قانع د چارشنبې پر ورځ( د لړم شپاړلسمه ) دغه راپور له حقیقته لرې وباله.

د یاد وزارت د خبرپاڼې له مخې؛ نشه‌یي توکي یوه ویجاړونکې پدېده ده او د اسلام له نظره یې اسلامي امارت د حرام حکم کړی او له دې پدېدې سره مبارزه یې کاري لومړیتوب دی.

 د امریکا ولسمشریزو ټاکنو د پايلو په تړاو د اسلامي امارت بهرنيو چارو وزارت په خپره شوې خبر پاڼه کې راغلي، چې اسلامي امارت د امریکا له نوي حکومت سره د متوازن بهرني سیاست په رڼا کې د واقعبینانه ګامونو پورته کولو ته هیله من دی.

د خبرپاڼې له مخې؛ اسلامي امارت د دواړو هېوادونو ترمنځ په اړیکو کې داسې پرمختګ  غواړي، چې ورسره د متقابل تعامل په رڼا کې د اړیکو نوی څپرکی پرانیستل شي.

د دغې خبرپانې په یوه برخه کې راغلي؛ د امریکا او اسلامي امارت ترمنځ د دوحې هوکړه د ولسمشر ډونالډ ټرامپ د لومړۍ واکمنۍ پرمهال لاسلیک شوې،چې ورسره شل کلن نیواک پای ته ورسېد.

ویل کیږي، چې ټرامپ به د سيمې او نړۍ د روانو جګړو؛ په ځانګړي توګه په غزه او لبنان کې د پای ته رسولو لپاره رغنده رول ولوبوي.