د اسلامي امارت ویاند او د دوحې په درېیمه ناسته کې د افغان پلاوي رییس ذبیح الله مجاهد د چنګاښ پر دیارلسمه یوې خبري ناستې ته ويلي، چې افغانستان له انزوا راوتلی او له ټولو هېوادونو سره مو د باور فضا رامنځته شوې ده.

د اسلامي امارت پلاوي د افغانستان په اړه له ناستې هېواد ته راستون شو او د دوحې درېیمه غونډه بریالۍ بولي.

نوموړی وايي؛ د دوحې غونډه د دوی له هیلو سره سمه ترسره شوه او د افغانستان په اړه د هېوادونو لید لوری مثبت و.

مجاهد ټینګار کړی، چې د اسلامي امارت پلاوي په دې غونډه کې وکولی شول، چې د افغانستان د چارسمبالي حکومت او خلکو غوښتنې نړیوالو ته ورسوي او وښيي، چې افغانستان په انزوا کې ندی او د اعتماد فضا رامنځته شوې ده.

د نوموړي د څرګندونو له مخې؛ اوس افغانستان له ټولو هېوادونو سره اړیکې لري او دا اړیکې په سمه توګه مدیریت شوي دي.

هغه ویلي: د هېوادونو استازو په افغانستان کې پرمختګونه ومنل او پر خصوصي سکټور د بندیزونو پر لرې کولو او له نشه‌يي توکو سره د مبارزې په برخه کې یې د اسلامي امارت پر لاسته راوړنو راوڅرخېدل.

د ذبیح الله مجاهد وایي: د دوحې د درېیمې غونډې ګډونوال د افغانستان د پرمختګ په اړه د معلوماتو له اورېدو حیران شول او د اسلامي امارت لاسته راوړنې یې ومنلې. خصوصي سکتور او له نشه يي توکو سره مبارزه د اسلامي امارت لپاره دوه مهم مسایل دي، چې د دوحې په غونډه کې پرې بحث شوی. د اسلامي امارت پلاوي دغه راز د ټولو بندیزونو، پر خصوصي سکټور د محدودیتونو د لرې کولو او د افغانستان بانک د کنګل شوې شتمنۍ پر ازدولو ټینګار کړی دی.

مجاهد وايي؛ اسلامي امارت نه غواړي، چې افغانستان یو ځل بیا د سترو قدرتونو د سیالۍ ډګر وګرځي.

ویل کیږي، چې د اسلامي امارت پلاوي د غونډې په څنډه کې د هېوادونو له ځانګړیو استازو سره ۲۴ دوه اړخیزې او څو اړخیزې غونډې کړي او ټینګار شوی، چې اسلامي امارت له ټولو هېوادونو سره د ښو اړیکو او تعامل غوښتونکی دی.

اړوند خبرونه: 

د دوحې د مدني ټولنې په غونډه کې مو د ټولو هېوادونو پر ګډون ټینګار نشو کولی – ملګري ملتونه

ډېري هېوادونه له افغانستان سره د مرستې او همکارۍ اراده لري – ذبیح الله مجاهد

د افغانستان بانک نن چارشنبه د چنګاښ دیارلسمه ویلي، چې د دې بانک د ټولو چارسمبالي ریيس هدایت الله بدري پر مشرۍ پلاوي د اسلامي مالي خدمتونو د بورډ په دوه‌ویشتمه کلنۍ عمومي غونډه کې، چې د جولای پر لومړۍ او دوه‌یمه نېټه په جیبوټي هېواد کې جوړه شوې وه؛ ګډون وکړ.

په دې غونډه کې، چې د نورو اسلامي هېوادونو د ۲۶ مرکزي بانکونو ریيسانو او استازو ګډون کړی و؛ د بورډ د تېر کال د کړنو او مالي مسایلو اړوند راپورونه د غړیو هېوادونو له‌خوا له بحث وروسته تصویب شول.

دغه راز په دې غونډه کې د راتلونکي کال لپاره د شریعت د اصولو پر بنسټ د اسلامي بانکوالۍ اړوند معایرو، د مالي شرکتونو او بانکونو د ښه مدیریت، د ډيجیټلایزیشن اثر پر اسلامي بانکوالۍ او پر نړیواله کچه د اسلامي بانکوالۍ او تمویل د ترویج په اړه پر پلانونو او عملي کړنو بحث او خبرې وشوې.

دوی د یوه باثباته اقتصادي توسعې لپاره پر مالي شمولیت، په اسلامي مالي نظام کې د وقف او زکات پر ارزښت، په دې برخه کې د اړوند بنسټونو پر رامنځته کولو، د مالي  نظام پر برښنایي کیدو د شغل او کار په رامنځته کولو کې د هغو پر اهمیت، مالي تکنالوژۍ یا فینټېک پر وړاندې د شته ګواښونو او پدې اړوند د شریعت له اصولو سره سم د مقرراتو رامنځته کېدو او یو شمېر نورو اړوند موضوعاتو بحثونه تر سره شول.

له یادې غونډې وروسته د افغانستان بانک د ټولو چارسمبالي رییس د اسلامي مالي خدمتونو د بورډ له ریيس سره په ځانګړې لېدنه کې د افغانستان بانک د کنګل شویو زېرمو، بانکي سکټور د اسلامي کېدو، ښونیزو پروګرامونو او یو شمېر نورو اړوند موضوعاتو هم خبرې وکړې.

ویل کیږي، چې د اسلامي مالي خدمتونو بورډ یو نړیوال اسلامي بنسټ دی، چې په کې د افغانستان بانک، د نورو اسلامي هېوادونو مرکزي بانکونه، اسلامي بانکونه او نړیوالې مالي ادارې غړیتوب لري.

د امریکا بهرنیو چارو وزارت ويلي، امریکايي استازو د دوحې په درېیمه غونډه کې د اسلامي امارت له استازو سره په افغانستان کې د زنداني امریکايي اتباعو د خلاصون په اړه خبرې کړې دي.

د امریکا بهرنیو چارو وزارت مرستیال ویاند ویډانت پټیل په یوه خبري کنفرانس کې ویلي، د افغانستان لپاره د امریکا ځانګړي استازي ټوماس ویسټ د دوحې په درېیمه غونډه کې پر اسلامي امارت فشار راوړ، چې په افغانستان کې زنداني امریکايي وګړي خوشې کړي.

ویډانت پټېل زیاته کړې، دا د دوی دوامداره غوښتنه ده او دوی په افغانستان کې د زنداني امریکايي وګړیو پر بې شرطه خوشې کولو ټینګار کوي.

نوموړی وایي: د امریکا ځانګړي استازي ټوماس ویسټ په افغانستان کې په ناحقه د نیول شویو امریکايي وګړیو د سمدستي او غیر مشروطه خوشې کیدو پر اړتیا ټینګار وکړ او څرګندوي، چې که بندیان خوشې نشي د طالبانو په رسمیت پېژندلو کې به د پرمختګ مخه ونیسي.

د اسلامي امارت ویاند او د دوحې د درېیمې ناستې د پلاوي رییس ذبیح الله مجاهد ويلي، چې له امریکايي پلاوي سره یې په دې اړه لنډې خبرې کړي؛ خو په مقابل کې یې د امریکا او ګوانتانامو په زندانونو کې د افغان زندانیانو د خوشې کولو موضوع هم مطرح کړه.

که څه هم اسلامي امارت له ګاونډ او سیمې له هېوادونو سره ښې اړیکې لري؛ خو له غرب او په ځانګړي توګه له امریکا سره یې اړیکې ترینګلي دي  او اسلامي امارت امریکا د خپل نړیوال مشروعیت پر وړاندې تر ټولو لوی خنډ ګڼي.