د کورنیو چارو وزارت د خبرپاڼې له مخې؛ نن ( دوشنبه د لیندۍ پېنځمه ) د روسیې فډراسیون د امنیت شورا عمومي منشي سرګي شویګو د دې وزارت له چارسمبالي سراج الدین حقاني سره په لیدنه کې ډاډ څرګند کړی، چې د روسیې حکومت د طالبانو غورځنګ، چې پخوا یې اسلامي امارت په دې نوم یاداوه؛ له تورنوملړه د لرې کولو بهیر وروستي پړاوونه ته رسولی دی.

هغه دا هیله هم څرګنده کړې، چې دا پړاو به په لنډ وخت کې بشپړ شي او له دې سره به د دواړو هېوادونو تر منځ اړیکې هم پراختیا ومومي.

سرګې شویګو د افغانستان امنیت د سیمې لپاره مهم یاد کړی او وایي: امن افغانستان د سیمې د هوساینې او اقتصادي اړیکو د پراختیا لپاره یو ښه فرصت دی.

د کورنیو چارو وزارت چارسمبالي سراج الدین حقاني یاد پلاوي ته د ښه راغلاست ترڅنګ ویلي، چې په افغانستان کې د بې ثباتۍ عوامل له منځه تلي دي. افغانان اوس خپلواک او پخپل سیاسي برخلیک حاکم دي او خپلې فیصله پخپله کوي.

هغه زیاته کړې، چې مونږ نه یوازې د امن افغانستان، بلکې د ټولې سیمې او خطې د ثبات او هوساینې هیله لرو.

ویل کیږي، چې په دې ناسته کې د روسیې فډراسیون د امنیت شورا عمومي منشي سرګي شویګو، د روسیې د لومړي وزیر اقتصادي مرستیال الکسي آور چوک، د افغانستان لپاره د روسیې ځانګړی استازي ضمیر کابلوف، په افغانستان کې د روسیې سفیر دمتري ژیرنوف او یو شمېر نورو مسوولانو ګډون کړی و.

د ریاست‌الوزراء اقتصادي مرستیالۍ څرګنده کړې، چې نن دوشنبه( د لیندۍ پېنځمه) د ریاست الوزراء اقتصادي مرستیال ملا عبدالغني برادر د روسیې فډراسیون د ملي امنیت شورا د عمومي منشي سرګي شویګو پر مشرۍ له راغلي پلاوي سره وکتل.

په دې لیدنه پر سیاسي اړیکو، اقتصادي همکاریو، سوداګرۍ، ټرانزیټ او پانګونې خبرې وشوې.

د ریاست‌الوزراء اقتصادي مرستیال د هطواد ثبات او امنیت ته په نغوته کې ویلي؛ افغانستان اوس په سیمه کې د اقتصادي همکاریو، سوداګرۍ او ترانزیټ پر مرکز بدل شوی، چې دا نه یوازې د افغانستان، بلکې د سیمې په ګټه دی.

ملا عبدالغني برادر اخوند زیاته کړې؛ اسلامي امارت د هېواد د امنیت او اقتصادي ودې لپاره هڅه کوي، چې په هېواد کې د نشه‌یي توکو کښت بند کړی او ټولې هغه ډلې یې له منځه وړې، چې د افغانستان او سیمې امنیت او اقتصاد ته زیان رسوي.

نوموړي زیاته کړې؛ افغانستان د شمال - جنوب د اقتصادي دهلېز په توګه غواړي  په سیمه کې اقتصادي اتصال عملي او له ستونزو خلاص شي.

هغه ویلي: مونږ هڅه کوو سیمې او لرې پرتو هېوادونو ته د صادراتو ته زمینه برابره کړو، چې په اړه یې له روسیې څخه د همکارۍ غوښتنه کوو.

د روسیې فډراسیون د ملي امنیت شورا عمومي منشي سرګي شویګو د خپلو خبرو پر مهال په افغانستان کې رامنځته شویو سیاسي، اقتصادي او امنیتي پرمختګونو ته په نغوته کې ویلي؛ اوسنی سفر یې د روسیې د ولسمشر له سپارښتنې سره سم  ترسره شوی او روسیه له افغانستان سره د دوه اړخیزو اړیکو د همکارۍ کچې زیاتېدو ته لېواله ده او په همدې موخه به په نږدې وخت کې د دواړو هېوادونو ترمنځ د سیاسي او اقتصادي اړیکو د پراختیا لپاره د اسلامي امارت نوم د روسیې له تور نوملړه لرې کړي.

دغه راز روسي پلاوي له افغان – ټرانس پروژې څخه د ملاتړ او په دغه برخه کې د همکارۍ د څرګندولو تر څنګ ویلي: روسیه د سېنټ پیټرزبورګ اقتصادي فورم پرمهال له افغانستان سره د شویو اقتصادي همکاریو عملي پيل ته چمتو ده او همدا راز روسي پانګوال او دولتي شرکتونه په افغانستان کې د کانونو استخراج، ټرانسپورټ او کرنې په برخو کې هم پانګونې ته لېوالتیا لري.

ویل کیږي، چې دواړو لوریو د ګډ حکومتي کمیسیون پر رامنځته کولو ټینګار وکړ، چې تر چتر لاندې به یې په بېلابېلو برخو کې نورې کمیټې هم فعالیت ولري.

په دغه لیدنه کې د افغانستان اسلامي امارت د صنعت او سوداګرۍ وزارت چارسمبالي نورالدین عزیزي، د اقتصاد وزارت چارسمبالي دین محمد حنیف، د روسیې فډراسیون د لومړي وزیر مرستیال، د افغانستان لپاره د روسیې فډراسیون د ولسمشر ځانګړي استازي ضمیر کابلوف او د دواړو هېوادونو یوشمېر نورو مسوولینو حضور درلود.

د روسیې فډراسیون د امنیت شورا عمومي منشي سرګي شویګو د افغانستان د بریاست الوزراء له سیاسي مرستیال مولوي عبدالکبیر سره په کتنه کې ویلي؛ روسیه غواړي، چې نه یوازې د مسکو او کابل ترمنځ سوداګریزې او اقتصادي اړیکې پراخې شي، بلکې دا هېواد لېواله دی، چې افغانستان یو ځل بیا د شانګهای ټولنې غړی شي. 

ارګ د سرګې شویګو د څرګندونو له مخې، چې د یوه پلاوي پر مشرۍ کابل ته راغلی لیکلي: په دې کتنه کې نوموړي ویلي؛ هېواد یې چمتو دی، چې په افغانستان کې د اوسپنې پټلۍ، ټرانسپورټ، صنعت،برښنا، کانونه او کرنې په ګډون په بېلابېلو برخو کې بنسټیزې پروژې پلي کړي.

هغه زیاته کړې، په افغانستان کې سیاسي او امنیتي پرمختګونو روسي پانګوال په افغانستان کې پانګونې ته لېواله کړي دي.