تازه خبرونه
په کندهار کې ۴ خبریالان له طالبانو سره د همکارۍ پر تور نیول شوي
د ملي امنیت عمومي ریاست په ډاګه کړې؛ د ملت غږ راډیو مشر بسم الله وطندوست، قدرت الله سلطاني او محب الله عبیدي د دې راډیو کارکونکي او ثناالله صیام، چې ځان د چین د شینوا خبري آژانس خبریال بولي؛ تېره اوونۍ د طالبانو تر واک لاندې د سپین بولدک ولسوالي له پوښښ وروسته ونیول شول.
یاد ریاست ویلي؛ دغو خبریالانو د روان ۱۴۰۰ لمریز هجري کال د زمري پر ۳ د کندهار د پخواني امنیه قومندان عبدالرازق په کور کې له یو شمېر طالب مشرانو مولوي منظور، ملا ګل اغا، د کندهار ولایت پخوانی قومندان فیض الله، د پاکستان د استخباراتو دوه غړي او د ملا محمد عمر اخوندزاده زوی ملا یعقوب عمري سره لیدلي او مرکه یې ورسره کړې ده.
د سرچینې د څرګندونو له مخې: د دې خبریالانو د دې ناستې او مرکې موخه د طالبانو ستاینه او د هېواد په بېلابېلو ولایتونو کې د دوی له ناانساني کړنو په ځانګړي توګه په سپین بولدک کې له غمجنو پېښو سترګې پټول دي.
ویل کیږي، چې دغه خبریالان د کندهار د اړوند ادارو له همغږۍ پرته او د قانوني چارواکو له خبرولو پرته د طالبانو تر واک لاندې سیمو ته ننوتلي وه او غوښتل یې عامه ذهنیتونه د طالبانو د ګټې لپاره راوڅرخوي.
د ملي امنیت عمومي ریاست ویلي، چې د ملت غږ راډیو د اطلاعاتو او فرهنګ وزارت لخوا جواز نه درلود او ناقانونه هڅې یې تر سره کولې.
د چین شینوا خبري آژانس هم ویلي، چې ثناالله صیام د دې ادارې کارمند نه و.
ملي امنیت ویلي، چې صیام د شینوا خبري اژانس له نوم څخه ناوړه ګټه پورته کوله او په ناقانوني هحو کې ښکېل و.
دغه راز ویل شوي، چې بسم الله وطندوست په دې وروستیو کې د خپل ماموریت پربنسټ د کندهار والي سره اړیکه نیولې وه، چې طالبانو ته تسلیم شي او طالبان د اختر لمونځ په کندهار ښار کې ادا کړي.
همدارنګه سرچینې څرګنده کړې، چې د کندهار ولایت چارواکي د کندهار ملي امنیت ریاست ته په یوه لیک کې د دغو خبریالانو د نیولو او توقیف غوښتنه کړې ده.
تازه خبرونه
د ازبکستان بشري مرستې بلخ ته راورسېدې
نن پنجشنبه ( د غویي شپږمه ) له ازبکستان څخه د بشري مرستو یوه ټولګه د بلخ په سوداګریز بندر حیرتان کې د دې ولایت سیمهییزو چارواکو ته وسپارل شوه.
د سیمهییزو چارواکو د څرګندونو له مخې؛ په دغو مرستو کې ۶۰ ټنه خوراکي توکي( اوړه، غوړي، غنم، بوره او غوښه ) شته، چې د ازبکستان د سرخاندریا د والي لهخوا د بلخ چارسمبالي والي ته سپارل شوې ده.
د سرخاندریا والي د دغو مرستو موخه د افغانستان له خلکو ملاتړ یاد او د دواړو هېوادونو ترمنځ يې د ښو اړيکو پر پراختيا ټينګار څرګند کړ.
په تېرو دوه کلونو کې دا څووم ځل دی، چې ازبکستان افغانستان ته دا ډول مرستې را لیږي.
کابل او تاشکند دا مهال ښې اقتصادي او سیاسي اړیکي لري او دا دواړه هېوادونه په پام کې لري، چې په روان کال کې د افغان ټرانس د اوسپنې پټلۍ کار هم پیل کړي.
تازه خبرونه
په سیمه او هېواد کې امنیتي پېښې وارداتي دي – امیر خان متقي
نن پنجشنبه ( د غویی شپږمه ) د اسلامي امارت بهرنیو چارو وزارت چارسمبالي امیرخان متقي د افغان-قزاق نندارتون د پرانیستې په مراسمو کې د افغانستان او سیمې امنیتي پېښې وارداتي یادې کړې دي.
نوموړي په دې اړه په خپلو خبرو کې ویلي: متاسفانه زمونږ درې ګاونډي هېوادونه په نوبت سره؛ په یوه هېواد کې د داعش لپاره بشري قوه او افراد تیاریږي؛ مونږ او تاسې ولیدل، چې د نړۍ په بېلابېلو برخو کې یې پېښې تر سره کړې.
بل هېواد د هغې لارې پر سر پروت دی، چې امن خرابوونکي افراد ترې راتېریږي.
او بل هېواد بیا په خپله خاوره کې دوی ته د مرکزیت، د تمویل او پلان جوړونې مراکز ورکړي دي. که دا درې هېوادونه خپل مسوولیت ادا کړي؛ په افغانستان او سیمه کې هیڅ مشکل نشته.
ویل کیږي، چې بد امني پر ګډه همکارۍ او همغږۍ له منځه وړل کیږي.
تازه خبرونه
له اسلامي امارت سره نړیوالې اړیکې ورځ تر بلې پراخیږي – ذبیح الله مجاهد
د اسلامي امارت ویاند ذبیح الله مجاهد افغانستان ته د ګڼشمېر ډیپلوماټیکو استازو راتګ او نورو هېوادونو ته د افغان لوړ پوړیو چارواکو سفرونو ته په نغوته کې ويلي، چې اسلامي امارت په پراخه کچه منل شوی؛ اړیکې ورسره خوندي او لیدنې یې روانې دي.
ذبیح الله مجاهد زیاته کړې؛ له اسلامي امارت سره د نړۍ د هېوادونو اړیکې ورځ تر بلې پراخېږي او اغېزمنتیا یې مخ پر ډېرېدو ده.
د اسلامي امارت ویاند ټینګار کړی: د ځینو خلکو او کړیو دا تصور، چې افغانستان انزوا ته تلی او اقتصاد یې مخ پر خرابېدو دی او له نورو هېوادونو سره یې اړیکې نشي خوندي کېدی؛ ټول دروغ ثابت شول.
د نوموړي د څرګندونو له مخې؛ اوس څرګنده شوه، چې افغانستان له سیاسي او اقتصادي پلوه د ودې او پراختیا پر لوري چټک ګامونه اخلي او دا هڅې به نورې هم ګړندۍ شي.
-
تازه خبرونه3 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ1 day ago
د فلسطین پر رفح ښار اسرائیلي ځواکونو د ځمکنيو بریدونو ګواښ وکړ
-
نړۍ3 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
لوبی4 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
تازه خبرونه3 days ago
راشد خان د افغان بیسیم سوداګریز سفیر شو
-
لوبی3 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
لوبی1 day ago
اټکانرژۍ لوبډلې په نهمه سیالۍ کې سرخپوشانخوافي ته ۱ـ ۰ ماتې ورکړه
-
سیمه ییز خبرونه4 days ago
د ایران ولسمشر پر درې ورځني سفر پاکستان ته ولاړ