د کورنیو چارو وزارت چارسمبالي سراج الدین حقاني ټینګار کړی، چې اسلامي امارت له نړۍ سره د افغانستان اړیکې د اسلامي اصولو پر بنسټ غواړي او هیچا ته به اجازه ورنکړي، چې د دې هېواد له شرعي احکامو سرغړونه وکړي.

سراج الدین حقاني دا خبرې په خوست ولایت کې د حسن قرائت مراسنو ته کړي. په دې غونډه کې د مصر، ایران او پاکستان بهرنیو قاریانو هم برخه اخیستې وه.

د خوست رسنیز دفتر د خبرپاڼې پر بنسټ، د کورنیو چارو وزارت سرپرست په دې مراسمو کې ویلي، چې اسلامي امارت د اسعمار مخالف دی نه له نړۍ سره د تعامل.

هغه زیاته کړې؛ اسلامي امارت له نړۍ سره داسې اړیکې غواړي، چې د اسلامي اصولو او شریعت خلاف نه‌وي.

د فرانس پرس خبري سرچینې د راپور له مخې؛ په سعودي عربستان کې سږکال د درې افغانانو په ګډون له ۱۰۰ ډېر بهرنيان اعدام شوي، چې دا د تېرو دوه کلونو پر پرتله درې چنده زیاتوالی ښيي.

د سعودي د دولتي رسنیو د راپور له مخې؛ د شنبې پر ورځ ( د لړم  شپږویشتمه ) د سعودي عربستان د جنوب لویدیځ په نجران ښار کې یو یمني وګړی د نشه‌یيتوکو د قاچاق پر جرم اعدام شو.

 فرانس پرس، چې د سعودي حکومت د راپورونو او رسمي اعلانونو پر بنسټ خپلې احصائې چمتو کوي ویلي، چې د دې یمني وګړي له اعدام سره سږکال په سعودي عربستان کې د اعدام شویو بهرنیو وګړو شمېر ۱۰۱ ته رسېدلی دی.

په۲۰۲۲ او ۲۰۲۳ کلونو کې هر کال سعودي حکومت ۳۴ بهرنيان اعدام کړي، چې پر بېلابېلو جرمونو تورن ول.

په آلمان کې میشت د اروپا- سعودي بشري حقونو بنسټ ویلي، چې سږ کال په سعودي عربستان کې د بهرنیو اتباعو د اعدام کچه خورا لوړه وه.

د دې بنسټ حقوقي مسوول طه الحاجي ویلي: دا په یوه کال کې د بهرنیو وګړو د اعدام تر ټولو لوی شمېر دی. سعودي عربستان هیڅکله په یوه کال کې ۱۰۰ بهرنیان ندي اعدام کړي.

سعودي عربستان تل د اعدام د سزا د پلي کولو له کبله د بشري حقونو د ټولنو له پراخو نیوکو سره مخ شوی دی.

د بښنې نړیوالې ټولنې د راپور له مخې؛ له چین او ایران وروسته سعودي عربستان په ۲۰۲۳ کال کې درېیم هېواد و، چې تر ټولو زیات اعدامونه یې کړي دي.

فرانس پریس خبري سرچینې راپور ورکړی، چې په سعودي عربستان کې د جنورۍ له لومړۍ نېټې څخه د نومبر تر ۱۷ پورې ټولټال ۲۷۴ کسان اعدام شوي دي.

د درې افغان وګړو تر څنګ ۲۱ پاکستانیان ۲۰ یمنيان ۱۴ د سوریې ۱۰ د نایجریا ۹ مصريان ۸ د اردن او ۷ ایتوپیایان ۳ سعودي وګړي ۳ هنديان او یو- یو د سریلانکا، اریټریا او فیلیپینیان په سعودي عربستان کې اعدام شوي دي.

په ۲۰۲۲ کې له درې کلن ځنډ وروسته سعودي عربستان د هغو کسانو اعدام بیا پیل کړ، چې د نشه‌یي  توکو د قاچاق اړوند جرمونو کمیسیون پورې تړاو لري.

سږ کال په سعودي عربستان کې د نشه‌يي توکو د جرمونو په تړاو ۹۲ کسان اعدام شوي، چې ۶۹ یې بهرنیان دي.

 چاپېریال ساتنې ملي ادارې عمومي رییس مطیع الحق خالص د کړکېچ له نړیوالې ډلې سره د چاپېریال او اقلیم د بدلون په اړه بحث او خبرې وکړې.

په دې کتنه کې مطیع الحق ویلي: د اقلیم بدلون یوه نړیواله پدیده ده، چې هیڅ سرحد نه پېژني او د بشر د ژوند ټول اړخونه یې له ګواښ سره مخ کړي دي.                                                                                 

هغه د اقلیم د بدلون د نړیوالو ننګونو سره د مقابلې لپاره پر ګډو هڅو هم ټینګار وکړ.

نوموړي په افغانستان کې د اقلیم د بدلون د ستونزو او ننګونو په اړه د معلوماتو وړاندې کولو پر مهال ټینګار وکړ، چې د اقلیم بدلون په افغانستان کې د اوبو سکټور، کرنه، حیواني تنوع، ایکوسیسټم او روغتیا اغېزمنه کړې او دغه راز یې له اقلیم سره د مطابقت د پروژو پلي کېدا هم افغانستان کې بدلون اړین یادکړل.

د کړکېچ نړیوالې ډلې مسوولینو د خپلې ادارې د فعالیتونو په اړه معلومات ورکړل او وایي: دا اداره د څېړنو او ارزونو پر بنسټ د اقلیم د بدلون د منفي اغېزو په اړه علمي مقالې چمتو او خپروي.

د چارواکو د څرګندونو له مخې؛ دې ادارې افغانستان د اقلیم د بدلون له اغېزو څخه د یو زیان منونکي هېواد په توګه منعکس کړی او دې موضوع ته یې په نړیوالو فورمونو کې د ویناوو او غونډو له لارو د نړۍ د هېوادونو پام وراړولی دی.

د کړکېچ نړیوالې ډلې مسوولینو ژمنه کړې، چې د علمي مقالو او راپورونو د چمتو کولو له لارې به د افغانستان زیانونه مرستندویه هېوادونو ته رسوي او هڅه به وکړي، چې د مرسته کوونکیو پام ځانته راواړوي.