د افغانستان د بهرنیو چارو وزارت د یکشنبې پر ورځ ویلي، چې د اسلامي امارت نوي ټاکل شوی سفیر عبدالغفار بحر د تاشکند د سفارت د چارو د سمبالولو لپاره ازبکستان ته رسیدلی دی.

د بهرنیو چارو وزارت د ویاند مرستیال ضیا احمد تکل د څرګندونو له مخې؛ عبدالغفار بحر د چارشنبې پر ورځ په ازبکستان کې د افغانستان د نوي سفیر په توګه معرفي شوی دی.

سیاستوال وايي، د دې سفیر ټاکل به د افغانستان په ډیپلوماسۍ کې یو نوی پرمختګ او له ګاونډ هېوادونو په ځانګړې توګه له ازبکستان سره د اړیکو د پراخېدو لامل شي.

کارپوهانو ويلي، له هغه وخته، چې افغانستان او ازبکستان په دې وروستیو کې مهم اقتصادي او سوداګریز تړونونه لاسلیک کړي؛ نو نوي سفیر ته پکار دي، چې د تړونونو د عملي کولو لپاره لا زیاتې هڅې وکړي.

د اقتصادي چارو شنونکي وايي، چې د کابل او تاشکند ترمنځ سیاسي اړیکې؛ ځکه مهمې دي، چې افغانستان او ازبکستان سترې ګډې اقتصادي پروژې لري.

په دې وروستیو کې د دواړو هېوادونو د لوړ پوړیو چارواکو په حضور کې د څه باندې دوه میلیارډ ډالرو پر ارزښت پېنځه سوداګریز او اقتصادي تړونونه په کابل کې لاسلیک شول.

ازبکستان د تېر کال له سلواغې راپدېخوا په تاشکند کې د افغانستان سفارت اسلامي امارت ته وسپاره، چې مشري یې دمګړۍ د مغفورالله شهاب پر غاړه ده.

په قطر کې د اسلامي امارت د سیاسي دفتر په یوه خپره شوې خبرپاڼه کې نیوکه کړې، چې د ملګرو ملتونو په نهه اویایمه عمومي غونډه کې د دوی استازي ته د ګډون بلنه ورکړ شوې نده.

سهیل شاهین په ایکس پاڼه کې لیکلي، چې: د افغانستان د خلکو د ملاتړ او د دغه هېواد پر ټوله خاوره د اسلامي امارت له واکمنۍ سره - سره د ملګرو ملتونو نهه اویایمې عمومي غونډې ته د امارات استازي بلل شوي ندي.

سهیل شاهین په ملګرو ملتونو کې د افغانستان څوکۍ ته د اسلامي امارت نوماندی دی.

هغه زیاته کړې: دا عمل واټنونه نور هم پراخوي او له اسلامي امارت سره د ملګرو ملتونو د تعامل خلاف یوه سیاسي پرېکړه ده.

د ملګرو ملتونو اته‌اویایمه غونډه د ۱۴۰۲ لمریز لېږدیز کال په وږي کې جوړه شوې وه.

په ترکمنستان کې د افغانستان سفارت ويلي، په دې هېواد کې د اسلامي امارت د سفارت چارسمبالي فضل محمد صابر د ملګرو ملتونو د سیمه‌ییزې ډیپلوماسۍ د سیاسي مرکز له چارسمبالي انډري لارین سره وکتل.

په دې کتنه کې لارین د ملګرو ملتونو د سیمه‌ییزې ډیپلوماسۍ د سیاسي مرکز، چې مرکز یې د ترکمنستان په عشق‌آباد کې دی؛ د فعالیتونو بنسټیزې موخې د سیمې له هېوادونو او افغانستان سره مرستې او ملاتړ بیان کړ.

د ملګرو ملتونو دغه چارواکي د اسلامي امارت له هراړخیز پرمختګ، د بېخبنایي او لویو پروژو پلي کېدا، له ګاونډیو او سیمې سره د افغانستان د همکارۍ، د نشه‌یي توکو د کښت او اداري فساد په مخنیوي او د افغانستان خلکو ته د کار پیدا کولو په برخه کې د اسلامي امارت له هلو ځلو ستاینه کړې ده.

فضل محمد صابر په افغانستان کې د تېرو درې کلونو د لاسته راوړنو په اړه هم معلومات وړاندې کړل او د اسلامي امارت پر اقتصاد محوره سیاست یې ټینګار وکړ.

ترکمنستان یو له هغو هیوادونو څخه دی، چې له افغانستان سره یې د اسلامي امارت له راتګ وروسته اړیکې ټینګې کړې دي؛ د ترکمنستان ولسمشر د ټاپي پروژې د پرانیستې په مراسمو کې ویلي، چې ترکمنستان د کابل او عشق‌آباد ترمنځ د اړیکو د ټینګښت هڅه کوي.