د افغانستان لپاره د ایران د سفیر او ځانګړي استازي حسن کاظمي قُمي له ګوښه کېدو وروسته د دغه هېواد د بهرنیو چارو وزارت ويلي، چې د افرادو ادلون او بدلون یوه "عادي خبره" ده.

د ایران بهرنیو چارو وزارت ویاند ویلي، چې په ډیپلوماتیکو مسوولیتونو کې بدلون یوه دودیزه او عادي خبره ده.

اسماعیل بقايي د یوې خبري غونډې پر مهال په افغانستان کې د ایران د سفیر په توګه د حسن کاظمي قُمي له کار ستاینه وکړه او د ایران د سفارت د نوي سفیر په توګه یې د علیرضا بیکدلي له ټاکل کیدو هرکلی وکړ.

د ایران بهرنیو چارو وزارت ویاند اسماعیل بقايي وایي: د بهرنیو چارو وزارت او په بهر کې زمونږ د هېواد په ډیپلوماټیکو استازولیو او قونسلګریو کې د مسؤلیتونو بدلونونه یو عادي کار دی، چې په ټاکلو وختونو کې ترسره کیږي.

درې ورځې مخکې د ایران بهرنیو چارو د وزیر پر حکم حسن کاظمي قُمي په افغانستان کې د ایران د سفیر او ځانګړي استازي په توګه له دندې لرې کړای شو او علي رضا بیکدعلي د نوي سفیر په توګه وټاکل شو.

په کابل کې سیاسي شنونکی سلیم پیګیر علي رضا بیکدلي کارونه د پام وړ یادوي او تمه لري، چې نوموړی به دغه اړیکې نورې هم پیاوړې کړي.

له دې مخکې د بهرنیو چارو وزارت چارسمبالي امیر خان متقي د ایران له پخواني سفیر کاظمي قُمي سره په کتنه کې ویلي وه، چې کابل د ایران له نوي سفیر سره د دوه اړخیزو اړیکو د پراختیا لپاره کار کولو ته چمتو دی.

د روسیې له تور نوملړه د اسلامي امارت د نوم د ایستلو طرحه د دغه هېواد پارلمان ته وسپارل شوه.

تېره ورځ د روسیې فډراتیف د امنیت شورا منشي سرګي شویګو افغانستان ته سفر کړی و او هلته یې د اسلامي امارت له لوړ پوړیو چارواکو، د د رییس الوزراء له مرستیالانو او د دفاع او کورنیو چارو له وزیرانو سره ولیدل.

په دې کتنه کې شویګو د روسیې له تور نوملړه د اسلامی امارت د نوم د ویستلو په اړه د پام وړ پرمختګ اعلان کړ او دا ډاډ یې څرګند کړ، چې دغه بهیر به ډېر ژر بشپړ شي.

د کرملین د رسنیو دفتر څرګنده کړې، چې له تور نوملړه د اسلامي امارت د ایستلو پرېکړه باید لومړی تصویب او رسمي شي.

د روسیې د ولسمشرۍ ویاند دیمیتري پسکوف ویلي، کرملین غواړي، چې له اسلامي امارت سره د اړیکو پراختیا روانه وساتي.

هغه ویلي: مونږ د افغانستان د مشرتابه په اړه خبرې کوو. اسلامي امارت هغه ځواک دي، چې په دې هېواد کې واکمني لري او البته اړیکه هم ورسره ډېرې اړینې دي.

د سپوتنیک خبري سرچینې د راپور له مخې؛ د روسیې پارلمان ته یوه مسوده سپارل شوې، چې له تور نوملړه د اسلامي امارت د ویستلو لپاره یو قضايي میکانیزم معرفي کړي.

سناتور ارنست ولي‌یوف، چې د دې پروژې لیکونکی دی څرګندوي؛ دا سند له تور نوملړه د اسلامي امارت په اټوماټیک ډول د ویستلو معنی نلري.

هغه زیاته کړې: پروژه به یوازې هغه مهال د اړتیا له مخې یو میکانیزم معرفي کړي، چې نه یوازې له اسلامي امارت تداو ولري، بلکې په ټوله کې د یاد نوملړ نورې ښکېلې خواوې هم رانغاړي.

په کابل کې د اسلامي امارت د مشرتابه له لوړ پوړیو غړیو سره له خبرو وروسته د روسیې د لومړي وزیر مرستیال الکسي اورچوک د دې پوښتنې په ځواب کې، چې آیا د افغان – ټرانس د اوسپنې‌پټلۍ په جوړولو کې پرمختګ شوی ویلي: دا پروژه بشپړه شوې ده؛ مونږ دا په ټوله کې د مرکزي آسیا او یوروآسیا د اړیکو د ښه کولو بنسټ ګڼو او د شمال - جنوب د نړیوال لېږد رالېږد دهلیز زموږ د لویې پروژې یو عنصر دی.

د نوموړي د څرګندونو له مخې، د دې پروژې د عملي کېدو لپاره چمتووالى نيول شوى دى.

هغه زیاته کړې: مونږ لېواله یوو، چې افغانستان د ټرانسپورټي اړیکو په برخه کې مهم رول ولوبوي. مونږ د نن ورځې په خبرو اترو کې پدې موضوع بحث وکړ. البته، همکاران هم په ګډه کار کولو ته ژمن دي.

دا په داسې حال کې ده، چې د روسیې فډراتیف د امنیت شورا منشي سرګي شویګو د دوشنبې پر ورځ (د لیندۍ پېنځمه / د نومبر پېنځه‌ویشتمه) د یوه دولتي پلاوي پر مشرۍ په کابل کې د ریاست الوزراء له سياسي مرستيال مولوي عبدالکبير، اقتصادي مرستيال ملا عبدالغني برادر، د ملي دفاع وزارت له چارسمبالي محمد يعقوب مجاهد او د کورنيو چارو وزارت چارسمبالي سراج الدين حقاني سره وليدل.

د افغانستان بهرنیو چارو وزارت ويلي، چې د ایران د ولسمشر ځانګړي استازي حسن کاظمي قُمي او په کابل کې د ایران سفیر د دوشنبې پر ورځ ( د لیندۍ شپږمه) د دغه وزارت له چارسمبالي امیر خان متقي سره د مخه ښۍ لیدنه وکړه.

د بهرنیو چارو وزارت په خبرپاڼه کې راغلي، چې په دې کتنه کې دواړو لوریو پر دوه اړخیزو اړیکو او سیمه‌ییزو تحولاتو بحث او خبرې وکړې.

د بهرنیو چارو وزارت چارسمبالي د ایران د ولسمشر د ځانګړي استازي او سفیر حسن کاظمي قُمي دنده او تر سره شوې هڅې د ستاینې وړ وارزولې.

د بهرنيو چارو وزارت چارسمبالي دا هم ويلي؛ دا وزارت چمتو دى، چې د ايران له نوي سفير سره د دوه اړخيزو اړيکو د پراختيا په برخه کې خپل کار روان وساتي.