د پېښو پر وړاندې د مبارزې ملي چمتووالي ادارې ویلي، چې د لومړنیو تازه معلوماتو له مخې؛ د نورستان ولایت په مرکز پارون کې د ویجاړوونکو سېلابونو له کبله ۲۳ کسان مړه، ۸۰ نور ټپیان او نږدې ۱۰۰ کسان ورک دي.

د دې ادارې مرستیال ویاند تاج محمد همت ویلي، چې تر اوسه د ۱۵ کسانو جسدونه له خاورو او خټو را ایستل شوي او د لټون او ژغورنې عملیات روان دي.

د نوموړي د څرګندونو له مخې؛ سېلابونو اووه کورونه بشپړه او ۲۳ نور څه نا څه ویجاړ کړي دي. همدارنګه، ۷۰ دوکانونه، ۴۰ سپک او درانده موټرونه او ۱۱ هوټلونه هم بشپړ یا نسبي زیانمن شوي دي.

مسوولانو ټینګار کړی، چې دغه شمېرې لومړنۍ دي او د لټون د عملیاتو او د زیانونو د ارزونې له دوام سره ښایي د قربانیانو شمېر او د اوښتو زیانونو کچه لوړه شي.

د نورستان ولایت په مرکز پارون کې راوتلو سختو سېلابونو پراخ زیانونه اړولي دي. د پېښو پر وړاندې د چمتووالي ملي ادارې د لومړنیو معلوماتو له مخې، د دغو سېلابونو له کبله ۲۰ کسان مړه شوي، شاوخوا ۸۰ نور ټپیان دي او له ۱۰۰ ډېر کسان اوس هم ورک ګڼل کېږي.

د یادې ادارې ویاند محمد یوسف حماد ویلي، چې دغه شمېرې لومړنۍ دي او د ژغورنې او پلټنې د عملیاتو له دوام سره ښایي بدلون ومومي.

چارواکو مخکې ویلي ول، چې سېلابونه د دوشنبې ورځې ماسپښین شاوخوا درې بجې پارون ښار وځاپه او د ښاروالۍ ودانۍ، څو هوټلونه، د مخابراتو دفترونه، پارکونه، پلونه او لسګونه استوګنیز کورونه یې زیانمن کړي دي.

د نورستان والي ویاند فریدون صمیم ویلي، چې سېلابونو د ولایت په مرکز کې پراخې ویجاړۍ رامنځته کړي او اټکل کېږي، چې مالي زیانونه یې شاوخوا ۳۵ میلیون امریکایي ډالرو ته ورسېږي.

اسلامي امارت د قربانیانو له کورنیو سره خواخوږي څرګنده کړې او زیانمنو شویو ته یې د مرستو ډاډ ورکړی. په داسې حال کې، چې د ژغورنې ډلې اوس هم په سیمه کې د مرستو او لټون عملیات پر مخ وړي.

د نورستان سیمه‌ییزو چارواکو ویلي، چې د سختو اورښتونو له کبله د مندول ولسوالۍ په بېلابېلو سیمو کې راوتلو سېلابونو کورونو، کرنیزو ځمکو او عامه بنسټونو ته پراخ زیانونه اړولي دي.

د نورستان والي ویاند فریدون صمیم ویلي، چې دغه سېلابونه تېر ماښام د باندول، انیش، اسکندو، منګور، جناخېل، شکرنل، نعلو، اتراراه او یو شمېر نورو مېشتو سیمو ته وغځېدل.

د نوموړي د څرګندونو له مخې، د دې پېښې له کبله شپږ استوګنیز کورونه، د برښنا یوه شبکه، یوه ژرنده، د عمومي سړک ځینې برخې او همدارنګه د خلکو کرنیزې ځمکې او بڼونه زیانمن شوي دي.

چارواکو ټینګار کړی، چې په دې سېلابونو کې خلکو ته د پام وړ مالي او ځاني زیانونه رسېدلي دي.

د نورستان سیمه‌ییزې ادارې له مرستندویه بنسټونو او اړوند ادارو غوښتي، چې د زیانمنو کورنیو د اړتیاوو د پوره کولو لپاره بېړني اقدامات وکړي.

دا په داسې حال مکې ده، چې د ۲۰۱ خالد بن ولید قول اردو د څرګندونو له مخې؛ د نورستان ولایت په مرکز پارون کې د سختو اورښتونو له کبله سېلابونه راووتل، چې هېوادوالو ته یې ځاني او مالي زیانونه اړولي  او څرګندوي، چې سېلاب ځپلیو ته د مرستو لپاره تازه دمي ځواکونه او خوراکي توکي ولېږدول شول.