محمد اشرف غني احمدزى په کال ١٣٢٨ل. هـ كال په کابل کې زېږېدلى دى.

نوموړي لومړنۍ او منځنۍ زده کړې د کابل په استقلال او حبيبه ليسه کې پاى ته رسولې او د ښوونځي په پېر کې يې د امريکا په متحده ايالاتو کې د يو کلن پروگرام (AFS) بروال شوى دى.

احمدزي د لبنان د بيروت په امريکايي پوهنتون کې د سياسي علومو له څانگې د ليسانس دورې له بشپړولو وروسته خپله لومړۍ ماسټري له ياد شوي پوهنتون څخه په سياسي علومو ترلاسه کړه.

ده همدا راز خپله دوه يمه ماسټري د کولمبيا له امريکايي پوهنتون څخه د نړيوالو اړيکو او انسان پېژندنې او درېيمه ماسټري له همدې پوهنتون څخه په نړيوالو اړيکو کې ترلاسه کړې ده.

احمدزي د انسان پېژندنې په برخه کې خپله دوکتورا هم د کولمبيا له پوهنتون څخه اخستې ده.

همدارنگه نوموړي ته يوه افتخاري دوکتورا د امريکا د متحده ايالاتو دسکرانتن د پوهنتون لخوا او بله افتخاري دوکتورا دکاناډا د گلف پوهنتون لخوا ورکړ شوې ده او د يوه کال لپاره يې د پاکستان د کراچۍ او لاهور په مدرسو کې د سيرت نبي (ص) په برخه کې زدهکړې کړې دي. نوموړي د اسلام د سپېڅلي دين د نفاذ، د ښځو د حقونو او ټولنيز عدالت، په قبايلي ټولنه کې د اسلام او دولت جوړښت، داسلامي شريعت په محکمه کې د تشنج او ناورين حل، د افغانستان د معاصرو ادبياتو، له ١٥ مې پېړې څخه تر ١٩ پېړۍ پورې د افغانستان  د ٤ سوه کلن تاريخ او ناکامو دولتونو او د هغو د برياليتوب د لارې په اړه څېړنې کړي او آثار يې ليکلي دي.

احمدزي د ډنمارک داروس، دامريکا د بکلي او جانزهويکنز په پوهنتونونو کې د استاد، دنړيوال بانک دستراتيژۍ او کړنلارې دجوړولو په برخه کې د رييس او د  ٢٠٠١م کال د دسپتمبر له ١١ وروسته د افغانستان لپاره د ملگرو ملتونو استازي (اخضر ابراهيمي) د سلاکار په توگه دندې ترسره کړې دي.

همدارنگه نوموړي د حامد کرزي په مشرۍ له موقتې ادارې وروسته د انتقالي ادارې د ستر سلاکار، په افغانستان کې د مرستو د انسجام ادارې د رييس او په انتقالي دوره کې د ماليې د وزير په توگه او د دې دورې له پاى ته رسيدو وروسته ديوې مودې لپاره د کابل پوهنتون رييس پاتې شوى دى.

اشرف غني احمدزى د تېرو دوه کلونو په اوږدو کې د امريکا د وکيلانو د نړيوال عدالت په پروگرام کې د قانون د حاکميت پروژو د عالي مشورتي کميتې غړى و او د بروکنگ موسسې د پروژې د عالي کميتې ( په نړۍ کې د سولې او امن رامنځته کيدل ) غړيتوب يې هم درلود.

عبدالرحيم وردگ د عبدالغني وردگ زوى، په ١٣٢٣ل کال په وردگ ولايت کې زېږېدلى د ى. نوموړي له هغې وروسته، چې د کابل په حبيبيه لسيه کې يې خپلې لومړنۍ زده بشپړې کړې په حربي پوهنتون کې شامل شو.

وردگ خپلې لوړې پوځي زده کړې په امريکا او د مصر د علي نصر په اکاډمۍ کې ترسره کړي او په کابل کې د حربي پوهنتون د استاد په توگه يې هم کار کړى دى.

هغه پر افغانستان د شوروي د يرغل پرمهال، د پير سيد احمد گېلاني په مشرۍ د ملي محاذ گوند د پوځي برخې د مشر په توگه دنده ترسره کړې ده.

نوموړي د جهاد پرمهال په افغانستان کې د اسلامي محاذ د جبهاتو قوماندان هم پاتې شوى. د ملي دفاع وزارت د پروتوکول مرستيال او د مهاجرت پرمهال د اسلامي محاذ گوند د پوځي مرستيال په توگه يې هم دنده ترسره کړې ده.

عبدالرحيم وردگ د کمونستي رژيم له سقوط وروسته، د اردو دلوى درستيز، د افسرانو قوماندان او د اردو د روزنې د کميسيون د مشر په توگه دندې ترسره کړې دي.

نوموړى وړاندې له دې، چې د ٢٠٠٤م کال په وروستۍ مياشت کې د ولسمشر حامد کرزي لخوا د ملي دفاع د وزير په توگه وټاکل شي، د ملي دفاع وزارت د مرستيال په توگه يې دنده ترسره کوله.

عبدالرحيم وردگ د ٢٠١٢م کال په اگست مياشت کې د پاکستان د راکټي بريدونو په تړاو د ولسي جرگې لخوا سلب صلاحيت شو او وروسته د ولسمشر حامد کرزي لخوا د امنيتي چارو سلاکار وټاکل شو.

وردگ د راتلونکي کال په ولسمشريزو ټاکنو کې د سيالۍ په موخه ځان کانديد کړ او د ولسمشر د سلاکار په توگه له خپلې دندې استعفا وکړه.

د ولسي جرگې پخواني غړي شاه عبدالاحد افضلى او سيد حسين انوري يې لومړى او دوه يم مرستيالان دى.

وردگ په پښتو، دري او انگليسي ژبو روانۍ خبرې کولى شي او په پوځي برخه کې يې يو شمېر کتابونه هم ليکلي دي.

داکتر زلمى رسول د پوهاند داکتر عبدالقيوم رسول زوى او په ١٣٣٢ل کال په کابل کې زېږېدلى دى.

نوموړى له استقلال عالي ليسې څخه له فارغيدو وروسته د لوړو زدهکړو لپاره د فرانسې مرکز پاريس ته واستول شو.

زلمي رسول خپلې لوړې زدهکړې د طب په څانگه کې د دوکتورا تر کچې له فرانسې تر لاسه كړي دي.

د پاريس د زړه د ناروغيو د څېړنيز انستيتيوت داکتر، په پاريس کې د افغانستان د جهاد اړوند د حقيقت افغان خپرونې مسوول او د سعودي عربستان د وسلوالو ځواکونو د روغتون د داکتر په توگه دنده ترسره کړې او د ايتاليا په روم ښار کې د پخواني پاچا محمد ظاهر شاه د دفتر مشرهم پاتې شوی دی.

په افغانستان کې د طالبانو د حکومت له شاتگ وروسته، زلمى رسول د ولسمشر حامد کرزي په مشرۍ په رامنځته شوي حکومت ( ١٣٨١ل کال) کې د افغانستان د ملي امنيت سلاکار شو.

ده د سلاکار په توگه د افغانستان د امنيتي ارگانونو فعاليتونه له بهرني سياست سره همغږي کول او نږدې نهه کاله يې په دې برخه کې کار وکړ.

رسول له سلاکارۍ وړاندې د ملكي هوايي چلند د رييس په توگه هم دنده ترسره کړې او د نورو چارواکو ترڅنگ د افغانستان په اړه په جرمني کې د جوړې شوې نړيوالې بُن غوڼدې گډونوال هم و.

زلمي رسول د ٢٠١٠م کال په پيل کې د بهرنيو چارو د وزير په توگه له ولسي جرگې د باور رايه واخسته او تېره مياشت يې د راتلونکي کال په ولسمشريزو ټاکنو کې د سيالۍ په موخه له خپلې دندې استعفا وکړه.

د ده د وزارت پرمهال افغانستان د امريکا او هند په گډون له يو شمېر غربي هېوادونو جرمني، انګلستان، ايتاليا، ناروې، فنلند، دنمارک، فرانسې، پولند او همدا راز له استراليا سره ستراتيژيک تړونونه لاسليک کړل.

زلمى رسول په پښتو، دري، انگليسي، فرانسوي او ايتالوي ژبو خبرې کولى شي، په عربي ژبه هم پوهېږي. د هغه تر ۳۰ پورې بېلابېل طبي آثار د امريکا او اروپا په چاپي رسنيو کې خپاره شوي دي.

زلمى رسول اوس د راتلونکي کال د ولسمشريزو ټاکنو نوماند دى.

د ملي جبهې مشر احمدضيا مسعود يې لومړى مرستيال او د باميانو پخوانۍ والي حبيبه سرابي يې دوه يمه مرستياله ده.

زلمي رسول واده نه دى کړى.