د سویلي کوریا وکیلانو د چهارشنبه پر ورځ( د لیندۍ څوارلسمه ) له هغې وروسته د ولسمشر یون سوک یول د استیضاح غوښتنه وکړه، چې نوموړي د پوځي حکومت لغو اعلان کړه.

رویټرز راپور ورکړی، چې د سې شنبې پر ورځ ناوخته د پوځي حکومت ناڅاپي اعلان له پارلمان سره یو خنډ رامنځته کړ؛ د سیاسي فعالیت منع کول او رسنۍ سانسورول یې رد کړل؛ ځکه وسلوال سرتېري په سیول کې د ملي شورا ودانۍ ته دننه شول.

د اپوزیسیون ګوندونو قانون جوړوونکیو ائتلاف وویل؛ په پام کې ده، چې د چارشنبې پر ورځ د یون د استیضاح لپاره یوه طرحه وړاندیز کړي، چې باید په ۷۲ ساعتونو کې رای ورکړ شي.

د ائتلاف استازي هوانګ اون ها خبریالانو ته وویل؛ پارلمان باید ژر تر ژره د استیضاح لایحه تصویب او د ولسمشر کار سمدستي وځنډوي.

د خلکو واکمن ځواک ګوند مشر له دفاع وزیر کیم یونګ هیون څخه وغوښتل، چې له دندې ګوښه شي او ټوله کابینه دې استعفا ورکړي.

یون د سې‌شنبې پر ورځ ناوخته په یوه ټلویزیوني وینا کې ملت ته وویل: پوځي حکومت ته اړتیا وه، چې د اټومي وسلو لرونکې شمالي کوریا او د شمال دولت ضد ځواکونو څخه د هېواد دفاع او د آزاد اساسي قانون ساتنه وکړي. که څه هم هغه کوم ځانګړي ګواښ ته نغوته ونکړه.

پوځ ویلي، چې د پارلمان او سیاسي ګوندونو پر فعالیتونو به بندیز ولګول شي او رسنۍ او خپرونکي به د پوځي حکومت تر څارنې لاندې وي؛ خو په څو ساعتونو کې د سویلي کوریا پارلمان، چې له ۳۰۰ غړو څخه ۱۹۰ یې شتون درلود؛ په متفقه توګه د یون ګوند د ټولو ۱۸ غړیو په ګډون د پوځي حکومت د لرې کولو غوښتنه وکړه.

ولسمشر بیا دغه اعلامیه لغو کړه.

له ملي شورا بهر معترضانو چیغې او چکچکې وهلې؛ مونږ وګټله! هغوی چیغې وهلې او یو لاریونکوونکي ډول وهلو.

د چارشنبه پر ورځ په سیول کې د سویلي کوریا ترټولو لوی ائتلاف او د کوریا د سوداګرۍ اتحادیې کنفدراسیون د پرخ لاریون ژمنه کړې، چې د یون تر استعفا پورې به اعتصاب روان وساتي.

د امریکا سفارت په جنوبي کوریا کې له امریکايي وګړو غوښتي، چې هغو سیمو ته له ورتګ ډډه وکړي، چې لاریونونه په کې کېږي.

د سوریې ځواکونو د یکشنبې پر ورځ (د لیندۍ یوولسمه) څرګنده کړې، چې په ادلب ښار کې د روسیې او سوریې جنګي الوتکو د مخالفو وسلوالو د شاته تمبولو لپاره هوایي بریدونه وکړل.

د ادلب اوسيدونکيو ويلي، چې روسي او سوریایي هوایي ځواکونو د دې ښار د استوګنې يوه ګڼ‌میشته سيمه، چې څلور ميليون وګړي یې په خيمو او لنډمهاله سرپناوو کې ژوند کوي؛ بمبارډ کړه.

په سیمه کې د مرستندویه ډلو د معلوماتو له مخې؛ په دغو بریدونو کې لږ تر لږه څلور کسان وژل شوي او لسګونه نور ټپیان دي.

د سوریې او روسیې پوځ ويلي، د دوی موخه د وسلوالو پټنځایونه دي او پر ملکي وګړو یې هر ډول برید رد کړی دی.

پرون د سوریې او روسیې جیټ الوتکو د ادلب ولایت پر نورو ښارونو هم بمبارډ وکړ، چې په بشپړه توګه د یادو وسلوالو په ولکه کې دي. دا په ۲۰۱۱ کال کې د سوریې د کورنۍ جګړې له پیل راپدېخوا پر دوی تر ټولو سخت برید و.

د تېرې جمعې پر ورځ دغو وسلوالو د حلب پر ښار برید وکړ او په بریټانیا کې د سوریې د بشري حقونو د څار ډلې د راپور له مخې، دغه ښار اوس په بشپړه توګه د یادو وسلوالو په ولکه کې دی.

د سوریې پوځ ويلي، چې د دغو جنګیالیو په ناڅاپي برید کې لسګونه سوري پوځیان وژل شوي دي.

دا جنګیالي د سیکولر وسلوالو ډلو یو ائتلاف دی چې د ترکیې لخوا یې ملاتړ کیږي.

هیات التحریر شام نومې اسلامپاله ډله د دې ائتلاف ترټولو تجربه لرونکې نظامي ډله ګڼل کیږي.

د سوریې هیات تحریر شام د امریکا، روسیې او نورو هېوادونو لخوا د یوې وسلوالې ډلې په توګه پېژندل شوې ده.

د اردن پاچا دوه‌یم عبدالله د یکشنبې پر ورځ د سوریې د وسلوالو جنګیالیو او د هغوی د ترکیې په ملاتړ د متحدینو د برید پر وړاندې د خپل هېواد ملاتړ اعلان کړ.

د عراق له لومړي وزیر محمد شیعه السوداني سره په ټیلیفوني خبرو کې پاچا عبدالله ویلي، چې اردن په سوریه کې د خپلو وروڼو ترڅنګ د سوریې د ځمکنۍ بشپړتیا، ازادۍ او ثبات د ساتلو لپاره ولاړ دی.

د سوریې کورنۍ جګړه، چې له ۲۰۱۱ کال راپدېخوا په کې سلګونه زره کسان وژل شوي او میلیونونه بې ځایه شوي اوس هم په رسمي توګه پای ته ندی رسېدلی.

له ۲۰۲۰ کال راپدېخوا د ادلب په شمال لویدیځ کې د جنګیالیو تر کنټرول لاندې سیمې د ترکیې او روسیې په منځګړیتوب د اوربند لاندې دي.

د تحریر شام جنګیالیو د تېرې چارشنبې پر ورځ د حلب پر ښار ناڅاپي برید وکړ او د اړوند اوربند له هوکړې یې سرغړونه وکړه، چې اوس هم د سوریې له حکومتي ځواکونو سره په جګړه کوي.

د امریکا ولسمشر جوبایډن د خپلې ولسمشرۍ په وروستیو ورځو کې پر ځايي وخت د سې‌شنبې پر ورځ (د لیندۍ شپږمه) له سپینې ماڼۍ څخه خبریالانو ته په وینا کې د اسرائیلو او لبنان ترمنځ د جګړې د پای ته رسولو هوکړه تائید کړه او څرګندوي: نن زه د منځني ختیځ څخه ښه خبر لرم. ما د لبنان او اسرائیلو له لومړي وزیرانو سره خبرې کړې او په دې خوښ یم، چې دوی د اسرائیلو او حزب الله ترمنځ د ویجاړونکې جګړې د پای ته رسولو لپاره د امریکا وړاندیز منلی دی.

د امریکا ولسمشر ویلي: دا تړون د تل لپاره د شخړو د ختمولو لپاره ډیزاین شوی او په سیمه‌ییز وخت د چارشنبې له سهاره به عملي شي.

نوموړي زیاته کړې: په راتلونکیو ۶۰ ورځو کې به د اسرائیلو پوځ پر تدریجي بڼه ووځي، اسرائیلي ملکي وګړي به بېرته خپلو کورونو ته ستانه شي او د لبنان پوځ به د خپلې خاورې کنټرول بېرته ترلاسه کړي.

بایډن ادعا کړئ، چې: دا تړون په بشپړ ډول پلي شوی او مونږ به له فرانسې سره په ګډه د دې تړون په پلي کېدا کې مرسته وکړو. د لبنان په جنوب کې به امریکايي ځواکونه ځای پر ځای نشي. که حزب الله له تړون څخه سرغړونه وکړي؛ اسرائیل حق لري، چې له ځانه دفاع وکړي.

امریکايي ولسمشر همداراز ویلي: حماس هم یوازې یو غوراوی لري، چې یرغمل شوي بندیان په ځانګړي توګه امریکایان خوشې کړي.

د بایډن له وینا مخکې د امریکا بهرنیو چارو وزیر انټوني بلینکن په سیمه‌ییز وخت د سې‌شنبې پر ورځ په ایټالیا کې د G7 بهرنیو چارو وزیرانو له غونډې وروسته په یوه خبري کنفرانس کې اعلان وکړ: مونږ په لبنان کې د اوربند هوکړې په وروستي پړاو کې یوو. په لبنان کې د اوربند هوکړې ته رسیدل د امریکا او زمونږ د ملګرو لکه فرانسې د ژورو ډیپلوماتیکو هڅو پایله ده.

د امریکا بهرنیو چارو وزیر زیاته کړې: زه باور لرم، چې په سیمه کې د تاوتریخوالی له کمولو سره د غزې جګړه پای ته رسولی شي. د اسرائیلو او لبنان ترمنځ د اوربند خبرې په وروستي پړاو کې دي او دا اوربند به د غزې د جګړې په پای ته رسولو کې مرسته وکړي.

هغه د حماس پر وړاندې د واشنګټن د ادعاوو له تکرارولو سره ویلي: حماس د خپل ځان د ملاتړ لپاره د څو محاذونو پر پرانیستلو تکیه کړې؛ خو په لبنان کې اوربند به یې له ملاتړه محروم کړي. له جګړې وروسته باید داسې پلان جوړ شي، چې د غزې خلک له حماس پرته ژوند وکړي.

هغه ټینګار کړی: مونږ ګورو، چې هره ورځ د لبنان او اسرائیلو ترمنځ پر دواړو خواوو راکټونه ویشتل کیږي، چې دا د چټک اوربند اهمیت څرګندوي. د لبنان او اسرائیلو تر منځ باید اوربند رامنځته شي، چې شخړه د پراخې سیمه‌ییزې جګړې پر لوري ونه‌غځیږي.

بلینکن وایي: مونږ ژمن یو، چې د ټرمپ له ادارې سره د غزې د اوربند او نورو مسلو په اړه کار وکړو.

ویل کیږي، چې؛ د اوربند له پیلېدو وروسته په سیمه کې د جګړو له کبله بې ځایه شوې کورنۍ بېرته خپلو کورونو ته د ستنېدو په حال کې دي او تر راتلونکیو ۶۰ ورځو یا دوه میاشتو پورې به د لبنان له سویل څخه د اسرائیلو پوځیان وځي او په یاده سیمه کې به د لبنان دولتي ځواکونه ځای پر ځای کېږي.