تازه خبرونه
د هرات یوولسمې امنیتي ناستې پر ټولګډونه حکومت ټینګار څرګند کړ
![](https://www.ariananews.af/wp-content/uploads/2023/11/Herat-Dialogue.jpg)
نن ( د الیندۍ شپږمه ) د تاجکستان په پلازمېنه دوشنبه کې د هرات یوولسمه امنیتي غونډه؛ افغانستان ته له بېلا بېلو اړخونو بیا کتنې تر سرلیک لاندې د یو شمېر سیاسي او علمي شخصیتونو، د بشري حقونو او مدني ټولنې هڅاندو او د سیمې هېوادونو د استازیو په شتون کې ترسره شوه.
له تېرو دوه کلونو راپدیخوا د هرات امنیتي غونډه په تاجکستان کې جوړیږي. د دې غونډې اړوند ګډونوال د افغانستان د سیاسي او اقتصادي ستونزو د اواري لپاره د یوه ټولګډونه حکومت د جوړولو غوښتونکي شول.
دوی وايي، چې له همپالنې پرته افغانستان اقتصادي هوساینه او دایمي ثبات نهشي ترلاسه کولی.
په دې غونډه کې د سیمې د هېوادونو ۱۵۰ سیاسي څېرو، علمي شخصیتونو، د بشري او مدني حقونو هڅاندو( فعالانو ) برخه اخیستې وه.
د تاجکستان د بهرنیو چارو وزارت د ستراتیژیکو څېړنو د څانګې رییس شرف رحیمي ويلي، هېواد یې د یوه آزاد او سولهییز افغانستان غوښتونکی دی او د یوه ټولګډونه حکومت جوړول د ستونزو حل لار ده.
نوموړی وایي: مونږ د افغانستان د ټولو سیاسي قوتونو د استازیو له فعاله ونډې سره د یوه رښتیني ټولګډونه حکومت جوړول او د سولې، ثبات او سوکالۍ ترلاسه کول د افغانستان د سولې د ټینګښت اساسي عامل او ضامن ګڼو.
يو شمېر نور ګډونوال هم وايي، چې افغانستان د دايمي ثبات او اقتصادي سوکالۍ لپاره سيمهييزې اجماع ته اړتيا لري او د افغانستان ګاونډيان بايد له افغانستان سره د همکارۍ په موخه دې پايلې ته رسېدلي وي.
د افغانستان د ستراتیژیکو مطالعاتو د انستیتوت د مشورتي بورد مشر رنګین دادفر سپنتا ویلي: زه د افغانستان ګاونډیانو ته وایم، چې مونږ یو آزاد او بې پرې هېواد غواړو. افغانستان په یوازې ځان نهشي کولی اقتصادي هوساینه او سوله ترلاسه کړي. له سیمهییزې همغږۍ سره مونږ کولی شو پر ستونزو بریالي شو.
په دې غونډه کې يو شمېر نورو سياسي څېرو په تېرو دوه لسيزو کې د امريکا پر پوځي حضور نيوکې وکړې او څرګندوي، چې امريکا افغانستان د مرګ و ژوبلې پر یوه ډګر بدل کړ.
اسلامي امارت ويلي، چې په دا ډول غونډو کې څرګند شوي نظریات شخصي دي. له دې وړاندې هم اسلامي امارت څو ځله ویلي، چې دوی بهرنۍ اقتصادي تګلاره لري او غواړي، چې د سیمې په اقتصادي هوساینه کې فعال رول ولوبوي. اوسنی حکومت یو ټولګډونه حکومت دی، چې ټول اړخونه په کې له ونډې برخمن دي.
تازه خبرونه
افغانستان تجزیه کېدونکی هېواد ندی – عباس ستانکزی
![](https://www.ariananews.af/wp-content/uploads/2024/09/Stanikzai.png)
د بهرنیو چارو وزارت سیاسي مرستیال شېر محمد عباس ستانکزي ويلي؛ د افغانستان اوسنی نظام د قوم او مذهب پر بنسټ نه، بلکې د اسلامي شریعت پر بنسټ ولاړ دی او د دې نظام ساتنه د هر چا دنده ده او هېڅکله به ونه وېشل شي.
د پنجشنبې پر ورځ د وږي پېنځلسمه شېرمحمد عباس ستانکزي په یوه کلتوري پروګرام کې پر یووالي او ځمکني بشپړتیا ټینګار وکړ او وایي، چې له څو کلونو راپدېخوا د افغانستان د قومونو او ولایتونو د وېشلو هڅې روانې دي؛ خو دا هڅې به هېڅکله هم نتیجه ورنکړي او افغانستان نه وېشل کېدونکی دی.
عباس ستانکزی وایي: اوسمهال بېلابېل تبلیغات کېږي؛ خو دا هېواد د افغانستان د اصیلو بچیانو له برکته روغ پاتې شوی او د تباهۍ او تجزیې خوا ته تلی دی او نه به تجزیه شي او نه به هم د تجزیې اجازه ورکړ شي.
د نوموړي د څرګندونو له مخې: افغانستان سیاسي او نظامي ازادي لري؛ خو بې پروا دښمن هم غلی ناست ناست نه دی؛ د استخباراتو، اقتصاد او پروپاګند په سنګر کې د اسلامي امارت پر وړاندې جنګېږي.
هغه زیاته کړې، چې اوس په هېواد کې جګړه نشته، افغانستان په سیاسي، اقتصادي او تعلیمي برخو کې پرمختګ ته اړتیا لري.
ویل کیږي، چې: مونږ باید د بیارغونې په برخه کې فعاله ونډه واخلو؛ خلک له مونږ څخه کار غواړي، یو کپ ډوډۍ غواړي، دوی سوله او امنیت غواړي، دوی سیاسي پرمختګ غواړي. یوازې حکومت ټول کارونه نشي کولی؛ دا د دې ملت د هر فرد دنده ده.
تازه خبرونه
معلوماتو ته د بشپړ لاسرسی نشتوالی د خبریالانو یوه لویه ننګونه ده
د اطلاعاتو او فرهنګ وزارت ويلي چې اطلاعاتو ته دلاسرسي قانون يې چمتو کړى او دغه قانون به د اسلامي امارت د رهبر له ارزونې وروسته توشیح شي.
![](https://www.ariananews.af/wp-content/uploads/2023/08/media-Afghanistan.jpg)
يو شمېر خبريالان معلوماتو ته د لاسرسی قانون له نشتوالي اندېښمن دي او وايي، چې پخپل وخت معلومات نه وررسېږي.
خبریالان له اسلامي امارت څخه غواړي؛ اطلاعاتو ته دې د لاسرسي قانون توشیح او پلی کړي، چې خبریالان وکولی شي پخپل وخت خلکو ته معلومات ورسوي.
د اطلاعاتو او فرهنګ وزارت ويلي چې اطلاعاتو ته دلاسرسي قانون يې چمتو کړى او دغه قانون به د اسلامي امارت د رهبر له ارزونې وروسته توشیح شي.
د دولتي رسنیو د مرکز مشر نعیم الحق حقاني ويلي؛ اسلامي امارت تل هڅه کړې، چې خبریالانو ته معلومات ورکړي او په همدې موخه یې د رسنیو مرکز د دولتي وزارتونو د لاسته راوړنو د بیانولو پروګرام پیل کړی دی.
په افغانستان کې د اسلامي امارت له واکمنۍ درې کاله تېر شول؛ خو اوس هم اطلاعاتو ته د لاسرسي په اړه کوم ځانګړی قانون ندی جوړ شوی او اطلاعاتو ته د لاسرسي نشتوالی د خبریالانو پر وړاندې یوه جدي ننګونه یادیږي.
تازه خبرونه
اسلامي امارت د قرغزستان د ممنوعه ډلو له نوملړه لرې کېدا وستایله
قزاقستان او ازبکستان له دې مخکې د ممنوعه ډلو له نوملړ څخه اسلامي امارت ایستلی او له افغانستان سره د اړیکو د ټینګولو لپاره کار کوي.
![](https://www.ariananews.af/wp-content/uploads/2024/09/MixCollage-05-Sep-2024-12-09-PM-7840.jpg)
د افغانستان اسلامي امارت د پنجشنبې پر ورځ ویلي، چې د قرغزستان له هغه اقدامه ستاینه او هرکلی کوي، چې د اسلامي امارت نوم یې د ممنوعه ډلو له نوملړ څخه ایستلی دی.
د بهرنیو چارو وزارت په خبرپاڼه کې راغلي، چې د قرغزستان دا ګام په سیمه او نړۍ کې د اسلامي امارت د سیاسي درک ښکارندویي کوي او له نورو هېوادونو سره د دوه اړخیزو اړیکو د پياوړتیا په لار کې د خنډ لرې کولو معنا لري.
اسلامي امارت ویلي، چې دا کار د پام وړ وده وکړي او د دواړو هېوادونو ترمنځ به ډیپلوماتیکې اړیکې ورسره پراخې شي.
قزاقستان او ازبکستان له دې مخکې د ممنوعه ډلو له نوملړ څخه اسلامي امارت ایستلی او له افغانستان سره د اړیکو د ټینګولو لپاره کار کوي.
مسکو دا هم ویلي، چې د منع شویو ډلو له نوملړ څخه د اسلامي امارت د لرې کولو لپاره کار روان دی.
-
تازه خبرونه4 days ago
د افغانستان چارسمبالی حکومت باید له داعش سره په مبارزه کې یوازې پاتې نشي – عزیزوف
-
لوبی4 days ago
د افغانستان فوټسال ملي لوبډلې ته کویټ ماتې ورکړه
-
تازه خبرونه5 days ago
په تېره یوه اوونۍ کې له افغانستان څخه څه باندې ۷۲ زره کسان وتلي
-
لوبی3 days ago
د نیوزیلینډ کرکټ ملي لوبډله له افغانستان سره د ټسټ لوبې لپاره هند ته ورسېده
-
نړۍ3 days ago
په امریکا کې د یوه ښوونځي زدهکوونکي ۱۳ کسنو ته مرګ او ژوبله اړولې
-
تازه خبرونه3 days ago
معلوماتو ته د بشپړ لاسرسی نشتوالی د خبریالانو یوه لویه ننګونه ده
-
تازه خبرونه4 days ago
جورجیت ګانیون د یوناما د سیاسي مرستیالي په توګه وټاکل شوه
-
نړۍ4 days ago
د اوکراین په لویدیځ کې مو هوايي بریدونه پیل کړل – روسیه