د تېرې شپې( د مرغومي ۲۴) د بمي چاودنې له کبله د سیمې د خلکو په سلګونه کورونه ویجاړشوي او له حکومته د مرستې او همکارۍ غوښتنه کوي.

د نهمي امنیتي حوزې اړوند د کابل بای په سیمه کې د تېرې شپې موتر بم چاودنې خلکو ته میلیونونه افغانۍ مالي زیانونه رامنځته کړي دي. د بمي چاودنې له سیمې په سلګونه متره لیرې او نږدې د خلکو د استوګنې خټین کورونه، پلورنځي او ورځيني اقتصادي فعالیتونه پوره له منځه تللي دي.

دوی ويلي، چې په میلیونونه افغانۍ زیانمن شوي او حکومت باید ورسره مرسته او همکاري وکړي.

د سیمې اوسیدونکی عبیدالله وایي، چې زمونږ کورونه بیخي سم له منځه تللي او په میلیونونه افغانۍ زیانمن شوي یو؛ حکومت باید دا کمپ لدې ځایه لیرې کړي.

د سیمي یو اوسیدونکی رحیم الله نومی وایي، چې مونږ لږ څه ترې لیري یو؛ خو بیا هم زمونږ کورونه بیخي په بد حالت کې دي.

د دغې پېښې د قربانیانو کورنۍ حکومت د امنیت په ساتلو کې ناکامه بولي.

دغه کورنۍ وایي، دا اووم ځل دی، چې په کابل بای سیمه کې دا ډول خونړۍ پېښې رامنځته کېږي او حکومت اوس هم په دې اړه بې غوره دی.

د پېښې یوشمېر ټپیان پر حکومت د نیوکې ترڅنګ وایي، ځینو ټپیانو په روغتونونو کې د وسایلو د نشتوالي له امله ژوند له لاسه ورکړی دی.

د صنعت او سوداګرۍ عالي شورامسوولین هم دغه حالت اندېښمن کړي او زیاتوي، چې حکومت باید نظامي مرکزونه د استوګنې له سیمي وباسي او دا د ژوند او صنعت لپاره یو تهدید دي.

د صنایعو او پانګونې دعالي شورا د عامل پلاوي رییس شبیر بشیري وایي، چې دا یوه د کار او تولید سیمه ده، د لته د استوګنې کورونه دي او لدې وړاندې ځای د چاودنې موخه وه. حکومت باید دا کمپ له ښاره لیرې بل ځای ته ولیږدوي.

 د اقتصادي چارو کارپوهان وايي، له هغو خلکو سره، چې مالي زیان ورورسیدلی؛ حکومت باید ورسره مالي همکاري وکړي، چې خپلې ورځنۍ چارې روانې وساتي.

د اقتصادي چارو کارپوه خان آقاه رضایي وایي؛ مونږ نشو ویلي، چي دغه کمپ دلته ولي دی؟ دلته د نړیوالو معتبرو بنسټونو مرکزونه دي او حتا نظامي مرکزونه شته، خو حکومت باید له زیانمنو کسانو سره مرسته وکړي.

د اقتصادي چارو کارپوهان بیا وايي؛ حکومت باید ټول هغه مرکزو نه، چي نظامي وي او یا پرې د برید احتمال وي؛ له صنعتي او د استوګنې له سیمو وباسي، چې په داسې پېښو کې عام خلک او خصوصي سکتور ته زیان ونه رسیږي.

د روغتیایي سرچینو د څرګندونو له مخې په دې موتر بم چاودنه کې، چې تېر ماښام ګرین ویلیچ نومي مرکز ته نږدې تره سره شوې د مالي زیانونو  تر څنګ ۴ کسان وژل شوي او ۱۱۴ نور ټپیان دي.    

خبریال: اسلم حجاب