د ولسي جرګې د کورني امنیت کمیسیون غړي وايي چې د پاکستان د اي، اس ، اي سره د استخباراتی اطلاعاتو د تبادلې په هوکړه لیک کې تر لاسلیک دوولس ۱۲ ساعته وروسته ګوتې وهل شوي دي.

دوی وايي د همدې لاسوهنې له کبله د ملي امنیت د شورا او ملي امنیت د رییس تر منځ ستونزه رامنځ ته شوې ده.

دغه کمیسیون لاسلیک شوی هوکړه لیک لغوه بولي او زیاتوي چې په هوکړه لیک کې د لاسوهنې د سپیناوي لپاره به د ملي امنیت سلاکار حنیف اتمر غونډې ته راوغواړي، خو د ملی امنیت د شورا ویاند بیا وایي چې د ملی امنیت شورا په هوکړه لیک کې هیڅ لاسوهنه نده کړې.

د ولسي جرګي امنیتي او د نړیوالو چارو کمیسیونونو د ملي امنیت د شورا سلاکار او ملی امنیت رییس د پاکستان او افغانستان تر منځ د استخباراتی اطلاعاتو د تبادلي د هوکړه لیک په اړه ورغوښتي وو.

غونډې ته یوازې د ملي امنیت ريیس حاضر شو، خو خبري رسنیو ته د خبرو د ثبت او تصویر اخیستو اجازه ورنکړل شوه.

د تړلو دروازو تر شا له خبرو وروسته د جرګې یو شمیر غړو، د ملی امنیت د رییس له قوله وویل چې په هوکړه لیک کې له لاسلیک دوولس ساعته وروسته ګوتې وهل شوي دي.

د ولسي جرګې غړې شکیبا هاشمي:

“نبیل ۵ ثانیې هم د هوکړه لیک په اړه اطلاع نه درلود دا یو خیانت و چې تر ۱۲ ساعت وروسته بعضی مسایل په کي زیات شوي او دا د ملي امنیت د رییس مداخله وه چې د هوکړه لیک مخه یی ونیول.“

ځینو نورو ویل چې دغه هوکړه لیک د دواړو هیوادنو د استخباراتي مرستیالانو تر منځ په پټه لاسلیک شوي حکومت او حکومت نه غوښتل چې ملت خبر شي:

د ولسي جرګې غړی صالح محمد صالح:

“موږ خبر یو چې د حسام او جنرال حیان تر منځ هوکړه لیک لاسلیک شوی، دولت نه غوښتل چې څوک خبر شي. کله چې موضوع افشا شوه، نو دوی ورخطا شول او وویل چې اصلاحات راولو اصلاحات له چارسره اوس سند په اسلام اباد کې دیی.“

دولسي جرګي غړي الماس زاهد:

“پاکستان غوښتل په دي هوکړه لیک سره د ډیورند کرښه پر موږ ومني.“

که څه هم چې د ملی امنیت سلاکار حنیف اتمر غونډی ته نه وو راغلی؛ خو د ملي امنیت د رییس د خبرو پر مهال غونده سری شوه او پرمطبوعاتو سانسور وضع شو.

په غونډه کې پریکړه شوې چې د ملي امنیت سلاکار به په هوکړه لیک کې د لاسوهنې له کبله عمومي غونډې ته را غواړي.

د کورنی امنیت د کمیسیون مرستیال عبدالحی اخند زاده:

“موږ به دملي امنیت سلاکار غوندې ته وغواړو تر څو موږ ته ځواب راکړي چې ولي په دې هوکړه لیک کې بدلون راغلی او ولې یې د دغه هوکړه لیک په اړه دلچسپي درلوده چې د دواړه امنیتی ارګانونو تر منځ د جنجال لامل شوه.“

په همدې وخت کې د ملي امنیت د شورا سلاکار وایي چی دوی په دغه هوکړه لیک کی کوم مداخله نده کړی.

د ملی امنیت د شورا ویاند نجیب الله منلی:

“د ملی امنیت د شورا دنده د امنیتی بنسټونو تر منځ همغږي ده؛ خو د دغو اسنادو تخنیکی برخه دویته نه راجع کیږی او په دی هوکړه لیک هم دوی مداخله نده کړي.”

خبریالانو هڅه وکړه چې په دې هکله د ملی امنیت د رییس نظر هم تر لاسه کړي، خو ښاغلي نبیل له رسنیو سره خبرو ته حاضر نه شو.

خبریال: عبدالعزیز کریمی