د ولسمشر پخوانی حقوقي سلاکار عبدالعلي محمدي وايي چې ولسمشر د بهرنیانو د فشارونو له امله د سمارت سېټي ښارګوټي تړون فسخه او د نوموړي دنده یې وځنډوله.

نوموړي دا څرګندونې د ولسي جرګې په استجوابیه غونډه کې وکړې او زیاته یې کړه چې د ښارجوړونې وزارت پرته له دې چې له دوی سره مشوره وکړي د خلیل الله فيروزي او نبي زاده وردګله ساختماني شرکت سره یې تفاهم لاسلیک کړی.

 د ښار جوړونې وزیر د هغه دا ادعا رد کړه او ویې ویل چې د ښاعلي محمدي د مکتوب پر اساس یې دغه تفاهم لیک لاسلیک کړي دي.

ولسي جرګې دسمارټ سېټي ښارګوتي د قرارداد د څرنګوالي په موخه چې د کابل بانک په قضیه کې د محکوم خلیل الله فيروزي سره لاسلک شوی، د ماليې،ښارجوړوني وزیران، د ولسمشر حقوقی سلاکار چې دنده یې ځنډول شوې او د کابل بانک د تصفیې د کمیسیون غړي استجواب کړل.

د ولسي جرګې غړيو اړوند چارواکې تورن کړل چې د قانون خلاف یې د کابل بانک په قضیه کې له محکوم خلیل فيروزي سره د دغه ښارګوټي د جوړېدو تړون لاسلیک کړی دی. خو ځینې نور بیا د پورونو د ترلاسه کولو له پاره دا اقدام ستایي او وايي چې د قضیې تر شا سفارتونه لاس لري او قضیه جنجال ته بیایی.

د ولسي جرګې غړې ناهید فرید وايي: “د قانون پر اساس څوک چې پوروړي وي پرته د هغه شخصي کور نور ټول جایداونه يېاخیستل کېږي تاسو ددې پرځای چې دهغه ځمکه ونسئ له هغه سره تړون لاسلیک کوئ. “

د ولسي جرګې غړی همایون همایون بيا وايي:”دغه اقدامات د حسن نیست په موخه شوي یو شمېر سفارتونو وکیلانو ته دنده ورکړې چې قضیه خرابه کړي ترڅو د ا مسله نوره هم جنجالي شي.”دولسمشر پخواني حقوقي سلاکار عبدالعلي محمدي وويل چې ولسمشرد کابل بانک د تورنو څخه د پیسو د ترلاسه کولو له پاره کمیسیون جوړ کړ او یوازينۍ موخه يېله تورنو څخه د پورونو ترلاسه کول و چي دتړون له مخې په سلو کې پنځوس د خلیل الله فيروزي پورونه ترلاسه کېدل، خو نوموړي وویل چې ولسمشر د بهرنیانو د فشار له امله د نوموړي دنده تعلیق او د ښارګوټي قرارداد یی فسخ کړ.”

عبدالعلی محمدي د ولسمشرپخوانی حقوقی سلاکار وايي: “کله چې قرارداد فسخ اعلام شو ولسمشر ته نږدي چارواکې ماته وویل چې قضیه د رسینو او بهرنیانو له اعتراضونو سره مخامخ شوې ته باید استعفا ورکړې ځکه زموږ زور نه ورته رسېږي. او بیا زما د دندې د ځنډېدوله پاره پر ولسمشر زور اوفشار واچول شو.”همدارازاښاغلي محمدي وویل چې نوموړی د ښارګوټي په اړه هېڅ راز امر نه دی صادرکړی یوازې د کابل بانک د تصفیې د کمېسیون له لارې د ښارجوړونې وزارت ته مکتوب لېږي خو د ښار جوړوني وزارت د دغه ښارګوټي د تفاهم په اړه له هغه سره سلا مشوره نه ده کړې او د ښار جوړونې وزیر بیا د نوموړي دا ادعا رد کړه. “د ښار جوړونې وزیر سیدسعادت منصور نادري وايي: “ښارجوړوني وزارت ته رسمِ مکتوب راغلی تړون لاسلیک شوی و موږ یوازېتفاهم لاسلیک کړ او موږ ته د عبدالعلي له خوا په مکتوب کې ویل شوي و چې دښارګوټي د جوړېدو اجازه راکړل شوې وه.”خو د ماليې وزیر بیا وویل چې دماليې وزرات د ښارګوټي او د کابل بانک په قضیه کې ښکېل نه دی او هېڅ مسولیت نه لري.

 دمالیې وزیر اکلیل حکیمي وايي: “د ماليي وزیر د کابل بانک د قضیي او د ښارګوټي د جوړېدو په اړه هېڅ مسولیت نه لري دا مسولیت دویته نه متوجه کېږی.”

 خو د اړوندو چارواکو څرګندونو ولسي جرګې ته قناعت ورنه کړ له همدې امله ولسي جرګې دمرکزي پلټنوله پاره کمیسیون ته دنده وسپارله چې قضیه بیا هم وڅېړي او په اړه يې ولسي جرګې ته راپور وړاندي کړي.

خبريال: عبدالعزیز کریمي