تازه خبرونه
د محب خبرو د ولسمشرۍ له اختلافاتو پرده پورته کړه- قادرشاه
د محمد حنیف اتمر د رسنیو دفتر وایي؛ د زلمي خلیلزاد په اړه د حمدالله محب خبرې ښیي، چې ولسمشر غني له طالبانو سره د امریکا د مذاکراتو په تړاو سخت اختلاف لري او دا د کړکیچ ستر ټکی دی.
حمدالله محب؛ زلمی خلیلزاد تورنوي، چې له ولسمشر غني څخه د قدرت اخیستو په هڅه کې دی؛ خو د امریکا د بهرنیو چارو وزارت نوموړی د دغو څرګندونو له کبله احضار کړ او ویې ویل، چې پر خلیلزاد برید پر وزارت برید دی.
په کابل کې هم د محب څرګندونو ته ځینې تاوده او ساړه غبرګونونه راپارولي دي.
د محمد حنیف اتمر ویاند قادر شاه وایي، د محب خبرې د سولې بهیر او ولسمشریزو ټاکنو په تړاو د ولسمشر غني د جدي اندېښنو ښودنه کوي او اړتیا ده، چې د ولسمشر غني د حکومت پر بدیل کار وشي.
نوموړي له سیاسي څېرو او خلکو غوښتي، چې د ولسمشر غني د کاري دورې له پای ته رسیدو سره جوخت د ملي وحدت حکومت پر بدیلې ادارې ملي اجماع رامنځته کړي، چې د حکومت نیمګړې پالیسي نوره پای ته ورسیږي.
د ولسمشرۍ ټاکنو ځینې احتمالي نوماندان او سیاسي ډلې هم وایي، ارګ د سولې بهیر او د کابل– واشنګتن اړیکې د خپلو شخصي ګټو لپاره یرغمل کړي.
د ولسمشرۍ نوماند شیدا محمد ابدالي ویلي؛ د سولې بهیر باید د حکومت د ګټو او سپارښتونو لپاره محدود نشي، بلکې باید پراخ بنسټه وي، چې د شخړې په پای کې ترې کار واخیستل شي.
نوموړي زیاته کړې، چې نن باید دا فرصت له لاسه ورنکړو؛ خلک غواړي، چې د سولې بهیر دې ملي وي او حکومت یې باید له سیاسي او ځانګړیو ګټو لپاره وسیله ونګرزوي.
دغه راز ځینې نورې سیاسي ډلې د کابل– واشنګتن په وروستیو کړکیچنو اړیکو کې د واشنګتن خواته دریدلي دي.
د جنبش ملي ګوند مرستیال عبدالله قرلق وایي، چې په اوسنيو سیاسي شرایطو کې به دا سمه نه وي، چې له امریکا سره خپلې دیپلوماتیکې اړیکې کړکېچنې کړو. دا، چې د سولې بهیر غوره پایلې ولري؛ باید اړیکې مو نورې هم ښې شي.
سرور دانش، چې د امریکا د سفیر له مرستیال سره غږیدلی د دغو خبرو په تړاو یې د ناوړه پوهاوي پر مخنیوي ټینګار کړی او وایي، چې د کابل– واشګتن په ستراتیژیکو اړیکو کې باید د ناوړه پوهاوي مخنیوی وشي او د دې لپاره، چې حالات عادي روان وي باید واشنګتن د سولې خبرو په تړاو افغان حکومت خبر کړي.
د یادونې ده، چې له ۲۰۱۴ کال راپدیخوا دا د دوه ستراتیژیکو ملګرو په اړیکو کې یو بېساری کړکېچ دی.
خبریال: باعث حیات
تازه خبرونه
د ازبکستان بشري مرستې بلخ ته راورسېدې
نن پنجشنبه ( د غویي شپږمه ) له ازبکستان څخه د بشري مرستو یوه ټولګه د بلخ په سوداګریز بندر حیرتان کې د دې ولایت سیمهییزو چارواکو ته وسپارل شوه.
د سیمهییزو چارواکو د څرګندونو له مخې؛ په دغو مرستو کې ۶۰ ټنه خوراکي توکي( اوړه، غوړي، غنم، بوره او غوښه ) شته، چې د ازبکستان د سرخاندریا د والي لهخوا د بلخ چارسمبالي والي ته سپارل شوې ده.
د سرخاندریا والي د دغو مرستو موخه د افغانستان له خلکو ملاتړ یاد او د دواړو هېوادونو ترمنځ يې د ښو اړيکو پر پراختيا ټينګار څرګند کړ.
په تېرو دوه کلونو کې دا څووم ځل دی، چې ازبکستان افغانستان ته دا ډول مرستې را لیږي.
کابل او تاشکند دا مهال ښې اقتصادي او سیاسي اړیکي لري او دا دواړه هېوادونه په پام کې لري، چې په روان کال کې د افغان ټرانس د اوسپنې پټلۍ کار هم پیل کړي.
تازه خبرونه
په سیمه او هېواد کې امنیتي پېښې وارداتي دي – امیر خان متقي
نن پنجشنبه ( د غویی شپږمه ) د اسلامي امارت بهرنیو چارو وزارت چارسمبالي امیرخان متقي د افغان-قزاق نندارتون د پرانیستې په مراسمو کې د افغانستان او سیمې امنیتي پېښې وارداتي یادې کړې دي.
نوموړي په دې اړه په خپلو خبرو کې ویلي: متاسفانه زمونږ درې ګاونډي هېوادونه په نوبت سره؛ په یوه هېواد کې د داعش لپاره بشري قوه او افراد تیاریږي؛ مونږ او تاسې ولیدل، چې د نړۍ په بېلابېلو برخو کې یې پېښې تر سره کړې.
بل هېواد د هغې لارې پر سر پروت دی، چې امن خرابوونکي افراد ترې راتېریږي.
او بل هېواد بیا په خپله خاوره کې دوی ته د مرکزیت، د تمویل او پلان جوړونې مراکز ورکړي دي. که دا درې هېوادونه خپل مسوولیت ادا کړي؛ په افغانستان او سیمه کې هیڅ مشکل نشته.
ویل کیږي، چې بد امني پر ګډه همکارۍ او همغږۍ له منځه وړل کیږي.
تازه خبرونه
له اسلامي امارت سره نړیوالې اړیکې ورځ تر بلې پراخیږي – ذبیح الله مجاهد
د اسلامي امارت ویاند ذبیح الله مجاهد افغانستان ته د ګڼشمېر ډیپلوماټیکو استازو راتګ او نورو هېوادونو ته د افغان لوړ پوړیو چارواکو سفرونو ته په نغوته کې ويلي، چې اسلامي امارت په پراخه کچه منل شوی؛ اړیکې ورسره خوندي او لیدنې یې روانې دي.
ذبیح الله مجاهد زیاته کړې؛ له اسلامي امارت سره د نړۍ د هېوادونو اړیکې ورځ تر بلې پراخېږي او اغېزمنتیا یې مخ پر ډېرېدو ده.
د اسلامي امارت ویاند ټینګار کړی: د ځینو خلکو او کړیو دا تصور، چې افغانستان انزوا ته تلی او اقتصاد یې مخ پر خرابېدو دی او له نورو هېوادونو سره یې اړیکې نشي خوندي کېدی؛ ټول دروغ ثابت شول.
د نوموړي د څرګندونو له مخې؛ اوس څرګنده شوه، چې افغانستان له سیاسي او اقتصادي پلوه د ودې او پراختیا پر لوري چټک ګامونه اخلي او دا هڅې به نورې هم ګړندۍ شي.
-
تازه خبرونه4 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ2 days ago
د فلسطین پر رفح ښار اسرائیلي ځواکونو د ځمکنيو بریدونو ګواښ وکړ
-
نړۍ4 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
لوبی5 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
تازه خبرونه4 days ago
راشد خان د افغان بیسیم سوداګریز سفیر شو
-
لوبی2 days ago
اټکانرژۍ لوبډلې په نهمه سیالۍ کې سرخپوشانخوافي ته ۱ـ ۰ ماتې ورکړه
-
لوبی4 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
سیمه ییز خبرونه4 days ago
د ایران ولسمشر پر درې ورځني سفر پاکستان ته ولاړ