تازه خبرونه
د المان د بهرنيو چارو وزير: د كابل واشنګټن امنيتي تړون زمونږ د ټولو اروپايي ملګرو لپاره مهم دى
د افغانستان د بهرنيو چارو وزير وايي، افغان ولسمشر ليواله دى، چې له امريكا سره له ټاكنو مخكې امنيتي تړون لاسليك كړي. ده زياته كړه، چې د تړون د لاسليك لپاره د افغان ولسمشر حامد كرزي شرطونه لاپرځاى دى خو په دې اړوند خبرې لاهم روانې دي.
د كابل واشنګټن د امنيتي تړون پر سر د لانجو په لړ كې د المان د بهرنيو چارو وزير كابل ته راغلى دى.
د المان د بهرنيو چارو وزير فرانك والتر شتاين ماير وايي، په افغانستان كې د الماني سرتېرو برخليك د كابل واشنګټن د امنیتي تړون سره تړلى دى.
د المان د بهرنيو چارو وزير د كابل واشنګټن امنيتي تړون نه يوازې د امريكا لپاره بلكې، زمونږ او زمونږ د ټولو اروپايي ملګرو لپاره مهم دى. كه تړون لاسليك نه شي، له افغانستان سره به زمونږ مرستې بندې شي او له دوه زره څوارلسم كال وروسته به په افغانستان كې زمونږ يو سرتېرى هم پاتى نه شي.
ښاغلى ماير په دې باور دى، چې په افغانستان كې د سولې د خبرو عملي پېل د دغه هېواد د حالاتو په ښه كېدو كې مرسته كولى شي.
نوموړی همدارنګه وایي، د افغانانو لپاره ملي روغه جوړه ډېره مهمه ده. له وسله والو طالبانو سره د سولې له خبرو پرته ښايي دغه هېواد له كړاوونو سره مخامخ شي. زه تمه لرم، چې د افغانستان راتلونكى حكومت به هم د نړيوالې ټولنې د همكاريو غوښتنه وكړي.
په همدې حال كې د افغانستان د بهرنيو چارو وزير ضرار احمد عثماني وايي، كه څه هم د امنيتي تړون لپاره د افغان ولسمشر حامد كرزي شرطونه پر ځاى دي، خو نوموړى ليواله دى، چې له ټاكنو مخكې دا تړون لاسليك كړي.
د افغانستان د بهرنيو چارو وزير ډاډ څرګند كړ، چې راتلونكې ټاكنې به پر خپل وخت كېږي او افغان ځواكونه د ټاكنو د امنيت خوندي كولو لپاره تيار دي.
تازه خبرونه
د ازبکستان بشري مرستې بلخ ته راورسېدې
نن پنجشنبه ( د غویي شپږمه ) له ازبکستان څخه د بشري مرستو یوه ټولګه د بلخ په سوداګریز بندر حیرتان کې د دې ولایت سیمهییزو چارواکو ته وسپارل شوه.
د سیمهییزو چارواکو د څرګندونو له مخې؛ په دغو مرستو کې ۶۰ ټنه خوراکي توکي( اوړه، غوړي، غنم، بوره او غوښه ) شته، چې د ازبکستان د سرخاندریا د والي لهخوا د بلخ چارسمبالي والي ته سپارل شوې ده.
د سرخاندریا والي د دغو مرستو موخه د افغانستان له خلکو ملاتړ یاد او د دواړو هېوادونو ترمنځ يې د ښو اړيکو پر پراختيا ټينګار څرګند کړ.
په تېرو دوه کلونو کې دا څووم ځل دی، چې ازبکستان افغانستان ته دا ډول مرستې را لیږي.
کابل او تاشکند دا مهال ښې اقتصادي او سیاسي اړیکي لري او دا دواړه هېوادونه په پام کې لري، چې په روان کال کې د افغان ټرانس د اوسپنې پټلۍ کار هم پیل کړي.
تازه خبرونه
په سیمه او هېواد کې امنیتي پېښې وارداتي دي – امیر خان متقي
نن پنجشنبه ( د غویی شپږمه ) د اسلامي امارت بهرنیو چارو وزارت چارسمبالي امیرخان متقي د افغان-قزاق نندارتون د پرانیستې په مراسمو کې د افغانستان او سیمې امنیتي پېښې وارداتي یادې کړې دي.
نوموړي په دې اړه په خپلو خبرو کې ویلي: متاسفانه زمونږ درې ګاونډي هېوادونه په نوبت سره؛ په یوه هېواد کې د داعش لپاره بشري قوه او افراد تیاریږي؛ مونږ او تاسې ولیدل، چې د نړۍ په بېلابېلو برخو کې یې پېښې تر سره کړې.
بل هېواد د هغې لارې پر سر پروت دی، چې امن خرابوونکي افراد ترې راتېریږي.
او بل هېواد بیا په خپله خاوره کې دوی ته د مرکزیت، د تمویل او پلان جوړونې مراکز ورکړي دي. که دا درې هېوادونه خپل مسوولیت ادا کړي؛ په افغانستان او سیمه کې هیڅ مشکل نشته.
ویل کیږي، چې بد امني پر ګډه همکارۍ او همغږۍ له منځه وړل کیږي.
تازه خبرونه
له اسلامي امارت سره نړیوالې اړیکې ورځ تر بلې پراخیږي – ذبیح الله مجاهد
د اسلامي امارت ویاند ذبیح الله مجاهد افغانستان ته د ګڼشمېر ډیپلوماټیکو استازو راتګ او نورو هېوادونو ته د افغان لوړ پوړیو چارواکو سفرونو ته په نغوته کې ويلي، چې اسلامي امارت په پراخه کچه منل شوی؛ اړیکې ورسره خوندي او لیدنې یې روانې دي.
ذبیح الله مجاهد زیاته کړې؛ له اسلامي امارت سره د نړۍ د هېوادونو اړیکې ورځ تر بلې پراخېږي او اغېزمنتیا یې مخ پر ډېرېدو ده.
د اسلامي امارت ویاند ټینګار کړی: د ځینو خلکو او کړیو دا تصور، چې افغانستان انزوا ته تلی او اقتصاد یې مخ پر خرابېدو دی او له نورو هېوادونو سره یې اړیکې نشي خوندي کېدی؛ ټول دروغ ثابت شول.
د نوموړي د څرګندونو له مخې؛ اوس څرګنده شوه، چې افغانستان له سیاسي او اقتصادي پلوه د ودې او پراختیا پر لوري چټک ګامونه اخلي او دا هڅې به نورې هم ګړندۍ شي.
-
تازه خبرونه3 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ3 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
نړۍ1 day ago
د فلسطین پر رفح ښار اسرائیلي ځواکونو د ځمکنيو بریدونو ګواښ وکړ
-
لوبی4 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
تازه خبرونه3 days ago
راشد خان د افغان بیسیم سوداګریز سفیر شو
-
لوبی1 day ago
اټکانرژۍ لوبډلې په نهمه سیالۍ کې سرخپوشانخوافي ته ۱ـ ۰ ماتې ورکړه
-
لوبی3 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
سیمه ییز خبرونه4 days ago
د ایران ولسمشر پر درې ورځني سفر پاکستان ته ولاړ