سیمه ییز خبرونه
د وردگو په سيد آباد كې په لومړي ځل ۳۱ امريكايي ځانگړي پوځيان ووژل شول
د وردگو په سيد اباد ولسوالۍ کې تېره شپه د آيساف يوه چورلكه د عملياتو پرمهال غورځېدلې ده.
د وردگو ولايت چارواكي وايي، چې:
په دې پېښه كې د آيساف سرتېرو ته مرگ و ژوبله هم اوښتې، خو كره شمېره يې نه ده معلومه .
وسله والو طالبانو ويلي، چې:
دا چينوك ډوله چورلكه د سيداباد ولسوالۍ د تنگي د زرين ويالې په سيمه كې دوى ويشتلې، چې ۳۸ سرتېري په كې وژل شوي دي.
وسله والو طالبانو د يوې خبر پاڼې په خپرولو سره ويلي، چې:
له پېښې وروسته په نښته كې اته طالبان هم وژل شوي دي.
د سيد آباد ولسوالۍ چارواكو هم منلې، چې چورلكه د عملياتو پر مهال د كلي په منځ كې غورځيدلې ده، خو آيساف په دې اړه څه نه دي ويلي.
د سيدآباد ولسوال ډاکتر مسلم پژوک اژانس ته ويلي، چې:
چورلکه د ولسوالۍ د تنگي سيمې د يوه کلي په منځ کې غورځېدلې ده.
سره له دې، چې پژواک له آيساف سره په دې اړه اړيکه نيولې، خو د دغه خبر تر خپرېدو يې په اړه څه نه دي ويلي.
طالب وياند ذبيح الله مجاهد څرگنده كړې، چې:
بيگاه شپه ۱۱بجې د ميدان وردگو ولايت سيدآباد ولسوالۍ د تنگي جوی زرين سيمه کې امريکايي عسکرو غوښتل پر يوه کور چې مجاهدين په کې ول، چاپه ووهي، چې د سخت مقاومت سره مخ شول او په راکيټي بريد سره يې په لومړي سرکې يوه لويه چينوک چورلكه رانسکوره شو، چې ټول ۳۸ تنه امريکا يي عسکر په كې ځای په ځای شول.
وروسته جگړه وغځيده او زمونږ ۸ تنه مجاهدين هم د شهادت لوړمقام ته ورسيدل ، له سيمې تازه معلومات ښيي، چې هلته اوس هم امريکايي عسکر د خپلو مړو په ټوليدو لگيادي او د چورلكو ټوټې او پرزې اوس هم په سيمه کې خورې دي.
د سيمې اوسيدونکي وايي، چې:
په وردگو کې تراوسه پورې بهرنيو ځواكونو ته په يو ځل دومره لوی زيان نه و اوښتی.
فاکس نیوز ته امریکا يي چارواکو دا هغه پوځیان ورپېژندلي، چې پراوسامه یې عملیات کړي وه.
د یادولو وړده، چې د اوسامه بن لادن ترمرگ وروسته امریکا وویل، چې دا پوځیان یې یوازې په ډېرو مهمو برخو کې عملیات کوي. تراوسه دا هم نه ده روښانه، چې دا پوځیان د کومو ځانگړيو عملیاتو لپاره وردگو ولایت ته تللي وه.
سیمه ییز خبرونه
امریکا دې د بشري حقونو په اړه دوه ګوني سیاست ودروي – ترکیه
د رویټرز خبري آژانس د راپور له مخې؛ ترکیې د چارشنبې پر ورځ امریکا تورنه کړې، چې د بشري حقونو په اړه دوه ګونی سیاست پالي او وایي، چې واشنګټن د بشري حقونو کلنی راپور په غزه کې د اسرائیلو د بریدونو په غندلو کې پاتې راغلی دی.
د ترکیې د بهرنیو چارو وزارت په خبرپاڼه کې راغلي، چې د امریکا دې کلني راپور په غزه کې روان غیر انساني بریدونه په سمه توګه راځلولي ندي. دا راپور پر سیاسي انګیزو له بې طرفۍ او معقولیت څخه لرې چمتو شوی دی.
ترکیې له واشنګټن وغوښتل، چې د بشري حقونو په اړه دوه ګونی سیاست ودروي.
دغه راز په دې راپور کې د سوریې له کردي ملیشې سره د امریکا اړیکو ته هم ګوته نیول شوې، چې انقره یې یوه ترهګر ډله ګڼي.
په غزه کې د روغتیايي چارواکو د څرګندونو له مخې؛ اسرائیلي ځواکونو له ۳۴ زره ډېر فلسطینیان وژلي، چې ډېر یې ملکيان او ماشومان دي. دا سیمه پر کنډواله بدله شوې او د خوراکي توکو سخت کمښت د قحطۍ وېره راپارولې ده.
اسرائیلو د اکټوبر پر اوومه د حماس د وسلهوالې ډلې د هغه برید په ځواب کې خپل هوایي او ځمکني بریدونه پیل کړل، چې د اسرائیلي ځواکونو د څرګندونو له مخې په کې ۱۲۰۰ کسان ووژل شول.
ترکیې په غزه کې د جګړې له کبله اسرائیل غندلی او د اوربند غوښتنه یې کړې ده.
ترکیې پر لویديځو هېوادونو هم نيوکه کړې، چې له اسرائيلو يې بشپړ ملاتړ کړی دی.
سیمه ییز خبرونه
د غزې په شمال کې د قحطۍ خطر ډېر دی
د بشري چارو لپاره د امریکا ځانګړي استازي د سې شنبې پر ورځ ویلي، چې اسرائیلو په وروستیو اوونیو کې غزې ته د مرستو رسولو لپاره د پام وړ ګامونه پورته کړي؛ خو د پام وړ کار پاتې دی، ځکه په دې سیمه کې د قحطۍ خطر ډېر دی.
د بشري چارو لپاره د امریکا ځانګړي استازي ډېوېډ سټېټرفیلډ خبریالانو ته ویلي، اسرائیلو په دې وروستیو دوه نیمو اوونیو کې د پام وړ ګامونه پورته کړي دي.
ډېوېډ سټېټرفیلډ څرګنده کړې: اوس هم د پام وړ کار پاتې دی، چې باید ترسره شي؛ خو پرمختګ شوی دی.
هغه ویلي، چې په ټوله غزه کې په جګړي توګه شمالي سیمې د قحطۍ له ډېر خطر سره مخ دي.
نوموړي ویلي، چې د فلسطین په کوچنۍ ګڼ میشته سیمه کې له اړو خلکو سره مرستې ته اوس ډېره اړتیا ده.
ملګرو ملتونو له اوږده وخت راپدیخوا په غزه کې د مرستې رسولو او د هغې د وېشلو په لار کې له خنډونو څخه اندېښنه ښودلې او څرګنده شوې، چې له تېرو شپږ میاشتو راپدیخوا د اسرائیلو لخوا د غزې د واکمنې اسلامي وسلهوالې ډلې حماس پر ضد هوايي او ځمکني بریدونه ترسره تر سره کیږي.
د اسرائیلو پوځي کمپاین د اکتوبر له میاشتې راپدیخوا، چې حماس د اسرائیلو په سویل کې جګړه پیل کړه، چې له کبله یې د بشري ناورین ترڅنګ د ۲ اعشاریه ۳ میلیون خلکو کورونه له ځمکې سره اوار شوي دي.
د ملګرو ملتونو د فلسطیني کډوالو ادارې (UNRWA) مشر فیلیپ لازاریني د سې شنبې پر ورځ ویلي، چې د اپریل پرپرتله غزې ته د تلونکو لاریو منځنی شمېر د ورځې ۳۱۶ ته لوړ شوی دی.
ویل کیږي، چې اوس کثافاتو راټولولو ته پاملرنه ډېره شوې او هڅه کیږي، چې په سویلي غزه کې د ناروغیو د خپریدو مخه ونیول شي.
سیمه ییز خبرونه
د ایران ولسمشر پر درې ورځني سفر پاکستان ته ولاړ
د ایران ولسمشر ابراهیم رییسي نن سهار ( دوشنبه د غویی درېیمه) د یوه لوړ پوړي سیاسي او اقتصادي پلاوي پر مشرۍ د پاکستان پلازمېنې اسلامآباد ته ورسېد.
د ایران اړوند رسنیو خبر ورکړی، چې دغه درې ورځنی سفر به د پاکستان له لوړ پوړو چارواکو سره د اقتصادي او سوداګریزو اړیکو پر پراختیا او پیاوړتیا، د دوه اړخیزو خبرو اترو او سیمهییزو سلامشورو په پام کې نیولو سره ترسره شي.
ټاکل شوې، چې د ایران ولسمشر به په دې سفر کې د دغه هېواد له ولسمشر اصف علي زرداري سره هم وګوري.
دغه راز د ایراني رسنیو د څرګندونو له مخې؛ پاکستان ته د ایران د ولسمشر د سفر پر مهال د دواړو هېوادونو ترمنځ د دواړو هېوادونو د مشرانو په حضور کې د سوداګرۍ، روغتیا، اقتصاد، امنیت او عدالت په برخو کې د اړدوند وزیرانو لهخوا د همکاریو یو شمېر سندونه لاسلیک شي.
دا سفر د پاکستان په بلوچستان ایالت کې د ایران له برید او د ایران په سیستان او بلوچستان ایالت کې د پاکستان له ځوابي بریدونو یوازې درې میاشتې وروسته رامنځته شوی دی.
-
تازه خبرونه3 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ1 day ago
د فلسطین پر رفح ښار اسرائیلي ځواکونو د ځمکنيو بریدونو ګواښ وکړ
-
نړۍ3 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
تازه خبرونه3 days ago
راشد خان د افغان بیسیم سوداګریز سفیر شو
-
لوبی4 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
لوبی3 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
لوبی1 day ago
اټکانرژۍ لوبډلې په نهمه سیالۍ کې سرخپوشانخوافي ته ۱ـ ۰ ماتې ورکړه
-
سیمه ییز خبرونه4 days ago
د ایران ولسمشر پر درې ورځني سفر پاکستان ته ولاړ