د بهرنیو چارو وزیر صلاح الدین رباني وايي چې یو شمېر بهرنیو اتباعو افغاني پاسپورتونه ترلاسه کړي چې له کبله یې یو شمېر هېوادونو افغانانو ته د ویزې ورکول سخت کړي دي.

هند هم د هغو هېوادنو په ډله کې دی چې افغانانو ته یې د وېزې شرایط سخت کړي دي. ښاغلی رباني چې مشرانو مشرانو جرګې را بللی و، هغه وويل چې د افغانانو له خوا د سولې هڅې د کمزوري دریځ په معنی نه دي.

د مشرانو جرګې غړو بیا ویل چې د فعالې دېپلوماسۍ له لارې باید په پاکستان فشارونه زیات کړل شي.

صلاح الدین رباني چې د مشرانو جرګې له خوا غوښتل شوي و، سعودي عربستان ته د افغان کارګرانو د لیږد په برخه کې د هوکړه لیک نشتون او د افغان کارګرانو له خوا له پاکستاني پاسپورټ څخه ګته پورته کول یو له هغو لاملونو څخه دي چې افغان کارګرانو ته د وېزې په ورکولو کې سعودي عربستان ستونزې جوړوې.

هغه ټینګار کوي چې په کمپیوټري پاسپورټونو کې تخنیکې ستونزې د دې لامل شوې چې یو شمېر عربې هېوادونه د بهرنیو چارو وزارت له تایید پرته افغان کارګرانو ته ویزه نه ورکوي.

د بهرنیو چارو وزیر صلاح الدین رباني وايي: “افغان پاسپورتونه له بهرنيانو سره ليدل شوي دي، هند هم له همدې کبله افغانانو ته د وېزې ورکول سخت کړي دي.”

د بهرنیو چارو وزیر له ګاونډیو هېوادونو څخه وغوښتل چې د افغانستان د سولې په لړۍ کې رښتينی او صادقانه رول ولوبوي.

صلاح الدین رباني زیاتوی: “د سولې په بهير کې تازه پرمختګ نشته، بايد چې ټول ګاونډيان د سولې په بهير کې صادقانه همکاري وکړي، ځکه چې د افغانستان ثبات د ټولې سيمې په ګټه دی.”

خو یو شمېر سناتوران وایي د افغانستان په کورنیو چارو کې د پاکستان له لاسوهنو په ځانګړي توګه د دغه هېواد د پوځيانو د پولې سرغړونو څخه په تنګ شوي نو باید نړیواله ټولنه په دغه هېواد فشار راوړې چې په افغانستان کې د ترهګری له ملاتړ لاس په سر شي.

سناتور شیرمحمد اخندزاده وايي: “افغان کډوال چې په هر هېواد کې مېشت دي بايډ چې د هغه هېواد پارلمان ته د پاکستان له لاسوهنې شکايت وکړي.”

سناتور فیصل سمیع وايي: “د طالبانو له شوراوو څخه په پاکستان کې د ننه ملاتړ کېږي آن د هغه ځانمرګي بريد کوونکي فاتحه چې څو ورځې وړاندې يې په لسم رياست بريد وکړ په پاکستان کې واخيستل شوه.”

د کمپیوټري پاسپورټونو وېش په تېرو کلونو کې د افغانستان یو له سترو لاسته راوړنو څخه بلل کېږي د راپورونو پر بنسټ یو شمېر هغه هېوادوال چې په بهرنیو هېوادونو کې مېشت دي پرته له دې چې په افغانستان کې حضور ولري افغاني پاسپورتونه يې ترلاسه کړي دي.