Connect with us

تازه خبرونه

په ننګرهار کې د قابله ګانو د روزنې پر یوه مرکز برید شوی

خپور شوی

د

(Last Updated On: لړم ۲, ۱۴۰۱)

سیمه ییزو چارواکو ویلي؛ د جلال آباد ښار په درېیمه ناحیه کې د ادآ موسیسې اړوند د قابله ګانو د روزنې پر یوه مرکز ډله ییز برید شوی، چې تر دې دمه د درې کسانو له وژل کیدو او اته نورو د ټپی کیدو خبر ورکړ شوی دي.

امنیتي سرچینې وایي، چې ځانمرګو بریدګرو د شنبې له غرمې مخکې څه نا څه یوولس نیمې بجې د ښار د درېیمې ناحیې اړوند د ګولایي عربان د اړوند سیمې پر روغتیایي روزنیز مرکز برید کړی، چې په کې ښځې او ماشومان زیانمن شوي دي.  

د ننګرهار والي ویاند عطاالله خوږیاڼی وايي، برید ګرو لومړی د روزنیز مرکز په دروازه کې چاودنه کړې او وروسته څو بریدګر د مرکز ودانۍ ته د ننه شوي او جګړه یې پيل کړې ده.

هغه زیاتوي، له یاد مرکز څخه شاوخوا پنځوس تنه روغ رمټ ژغورل شوي؛ خو یو شمېر نادرکه دي.

عیني شاهد سخي ګل وايي، بریدګرو د مرکز دروازه پر ماین والوځوله او انګړ ته د ننوتلو سره سم یې ډزې پیل کړې دي.  

د ننګرهار د عامې روغتیا رييس داکتر نجیب الله کاموال وايي، د پېښې له ځای څخه پېنځه ټپيان روغتونو ته وړل شوي، چې حالت یې ښه دی.

نوموړي زیاته کړې، چې برید د قابله ګانو پرهغه مرکز شوی، چې د ولسوالیو د کلینیکونو لپاره یې قابله ګانې روزلې.

هغه زیاتوي، په مرکز کې پر ښځو سربېره ماشومان هم شته.

سیمه ییزو چارواکو ویلي، چې د دغه روزنیز مرکز ودانۍ اور اخیستی او یو شمېر قابلې په ودانۍ کې دننه بندې پاتې دي.

ځينې سرچینې وايي، د قابلو په دې روزنځي کې د مامورینو په ګډون شاوخوا ۷۰ کسان ول، چې ۶۵ یې ژغورل شوي او د پاتې د مندلو هڅې روانې دي. هغوی، چې احوال یې نشته د کورنۍ غړي یې د برید په ځای کې د لیدو په تمه دي.

دې جګړې اته ساعته دوام کړی دی.

امنیتي ځواکونه سیمې ته رسیدلي او د بریدګرو په وړاندې یې عملیات پیل کړي دي.

د ننګرهار امنیه قومندان  غلام سنايي ستانکزی وایي، چې د پېښې له ځای څخه د جلال آباد حوزوي روغتون ته درې مړي او اته ټپيان لیږدول شوي دي.   

امنیه قومندان وايي، د مهارولوعملیات د بندو کسانو د ژغورلو له کبله اوږده شوي دي.

له برید سره همهاله د جلال آباد ښار په تالاشۍ څلور لاره کې یو تن ناپېژانده وسلوالو پر ډزو وژلی.

دغه راز په یوه بل برید کې ناپېژانده وسلوالو د درونټې په سیمه کې یوه ښځينه پولیسه پر ډزو وژلې ده.

تر دې دمه د دغو پېښو پړه چا پر غاړه نده اخیستې.

ننګرهار یو سرحدي ولایت دی، چې له پاکستان سره نه یوازې ګډه پوله لري، بلکې داعشیان هم په کې پراخې هڅې تر سره کوي.

خبریال: رحمت الله زیارمل

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!