عاجل خبرونه

په افغانستان کې 63% کې ښځې تذکرې یا پیژند پاڼې نه لري

(Last Updated On: November 22, 2017)

ملګري ملتونه وايي چې په افغانستان کې درې شپېته په سلو کې ښځې تذکرې یا پیژند پاڼې نه لري. یوناما وايي چې د تذکرو نشتوالی په ټاکنو کې د ښځو د ګډون مخه نیسي.

همداراز یوناما له حکومت غواړي چې په ټاکنو کې د ښځو ګډون ته زمینه برابره کړي.

که څه هم د را روانو پارلماني ټاکنو برخلیک لا روښانه، نه دی؛ خو په کابل کې د ملګرو ملتونو مرستندویه دفتر یوناما په یوه غونډه کې په دې خبرې وکړې چې څنګه کیدای شي، په ټاکنو کې افغانې میرمنې پراخ ګډون وکړي. یوناما وايي چې له یوې خوا امنیتي ستونزو د ښځو ورځ تیاره کړې او له بلې خوا ناوړه دودونه د هغوی د ټولنیز فعالیت مخه نیولې ده.

کلیپ: په کابل کې د ملګرو ملتونو د ښځو د څانګې ريیسه، ربیکا تاوا رایس و وېل: «ملګري ملتونه غواړي چې له افغان حکومت سره د ژمنو په عملي کولو کې مرسته وکړي.

 ښځې باید په ټاکنو کې پراخه ونډه واخلي. افغانې ښځې په سیاسي او ټولنیزو برخو کې له ګڼو ستونزو سره مخامخ دي.

 دري شپته په سلو کې میرمنې تذکرې نه لري؛ خو له دې ټولو ستونزو سره سره ښځې باید په ټاکنو کې ګډون وکړي»

ملګري ملتونه وايي چې ښځې په دموکراتیکو بهیرونو کې مهم رول لري او زیاتوي چې د دوه زره څوارلسم کال په ولسمشریزو ټاکنو کې د ښځو ونډه بېسارې وه.

په افغانستان کې د ملګرو ملتونو ځانګړی استازی، تدامیچي یاما موتو وویل: «که ټاکل شوي وي چې ټاکنې په بشپړ ډول سراسري وي، باید ښځې د دې بهیر یوه برخه وي؛ ځکه ښځې د  وګړو نیمایی برخه جوړوي، ښځې باید عین فرصت ولري چې نارینه یې لري. امنیتي ګواښونه او ناوړه فرهنګونه د ښځو په وړاندې اصلي خنډونه دي او ملګري ملتونه باید له افغان حکومت سره همکاري وکړي څو د ښځو رول په ټاکنو کې پیاوړی شي».

له بلې خوا د ټاکنو د خپلواک کمیسیون مسولین وايي چې ښايي په را روانو ټاکنو کې د ښځو ګډون پیکه وي.

د ټاکنو د خپلواک کمیسیون کمیشنره؛ ملیحه حسن و وېل: «دا څرګنده ده چې د ټاکنو کمېسیون په ټاکنو د مېرمنو د پیکه ګډون په هکله اندېښمن دی»

ټاکل شوې چې پارلماني او د ولسوالیو د شوراګانو ټاکنې د راتلونکي کال د چنګاښ په شپاړسمه وشي، خو څارونکي بنسټونه او سیاسي ډلې باوري نه دي چې ټاکنې به په خپل وخت تر سره شي.

About Ariana News

Avatar

Check Also

د لوګر په خروار کې ۹۰ میله وسلې ترلاسه شوي

(Last Updated On: July 16, 2019)د لوګر امنیتي چارواکو څرګنده کړې، چې د دې ولایت …