عاجل خبرونه

له افغانستان څخه د نړیوالو ځواکونو د وتلو مهالوېش اعلام شوی ندی- خلیلزاد

(Last Updated On: February 7, 2019)

د افغانستان د سولې لپاره د امریکا د بهرنیو چارو وزارت استازی وایي، له افغانستان څخه د نړیوالو ځواکونو د وتلو لپاره مهالوېش تر دې دمه اعلام شوی ندی.

د افغانستان د سولې لپاره د امریکا د بهرنیو چارو وزارت ځانګړي استازي زلمي خلیلزاد په خپل تویت کې څرګنده کړې؛ په وروستیو ورځو کې د طالبانو ځینو چارواکو ادعا وکړه، چې له امریکا سره پر یو مهالوېش هوکړه شوې؛خو له افغانستان څخه د امریکایي ځواکونو د وتو په تړاو تر دې دمه هیڅ مهالوېش اعلام شوی ندی.

دا په داسې حال کې ده، چې پاکستان له ترهګرو څخه پر ملاتړ تورن شوی؛ خو له افغانستان څخه د امریکایي ځواکونو د احتمالي وتو پرېکړې په وېره کې هم اچولی دی.

د پاکستان د بهرنیو چارو وزیر شاه محمود قریشي وایي، چې له چمتوالي پرته ناڅاپي وتل به خطرناک وي؛ هیڅوک نه غواړي په افغانستان کې ګډوډي، بې نظمي او کورنۍ شخړې وي، نو له افغانستان څخه باید د امریکایي ځواکونو وتل محتاطانه وي.

داسې ښکاري، چې طالبان دا مهال په دیپلوماسۍ کې ښه فعال ښکاري؛ له امریکایانو سره د خبرو او سیمه ییزو سفرونو تر څنګ یې جنګي ماشین هم فعال ساتل شوی دی.

اوس پوښتنه دا راپورته کیږي، چې ولې طالبان د امریکایي ځواکونو د وتلو غوښتنه کوي؟

سیاسي فعال حسن حقیار وایي، چې ډېر ژر به یوه بله ناسته جوړه شي، چې دا به د سولې تازه خبرو ته یو لړ خنډونه له مخې لیرې کړي. مونږ هیله من یو، چې حکومت هم طالبانو ته ورته لږ څه ځان ور نږدې کړي.

خلیلزاد وایي، د طالبانو او امریکایانو خبرې دوام کوي او ژر به په دوحه کې د دواړو لوریو تر منځ بله ناسته هم تر سره شي.

د افغان حکومت له استازيو پرته دا کیدونکې ناسته به څومره وکولی شي، چې د افغانانو تر منځ خبرو اترو د پیل لپاره زمېنه برابره کړي او یا هم په دې برخه کې ستونزه ووسي؟

سیاسي فعال سلیمان کاکړ وایي؛ طالبان ښیي، چې دوی په خپلو خبرو کې نه د سیمې له هېوادونو، نه له امریکایانو او نه هم له حکومت سره رښتیني دي. هغوی باید د هوکړو لپاره سمه لار غوره کړي.

زلمی خلیلزاد له طالبانو سره د خبرو اترو په برخه کې د امریکایي پلاوي مشري کوي، چې په قطر کې د دواړو لوریو تر منځ څلورمه مخامخ ناسته تر سره شوې او ښاغلي خلیلزاد د دغې شپږ ورځنۍ ناستې په پای کې ویلي وه، چې له طالبانو سره د سولې پر ټولیز چوکات هوکړه شوېده.

وبه لیدل شي، چې د دوحې راتلوونکې ناسته به څه ګلان وکري.

خبریال: علی اصغري

About Ariana News

Avatar

Check Also

په کابل کې ځانمرګي ۶۰ کسانو ته مرګ و ژوبله رامنځته کړې

(Last Updated On: September 17, 2019)کورنیو چارو وزارت په ډاګه کړې، چې نن له غرمې …