عاجل خبرونه

په بادغیس کې امنیتي ځواکونه له زیانونو سره مخ دي

(Last Updated On: April 5, 2019)

د بادغیس ولایت په بالامرغاب ولسوالۍ کې د دولتي ځواکونو او طالبانو په روانه جګړه کې نږدې دېرش سرتېرو ژوند له لاسه ورکړی، لسګونه نور تريتم دي، چې کیدی شي طالبانو نیولي وي.

پر بالامرغاب ولسوالۍ د طالبانو له پراخ برید وروسته اوس راپورونه وایي، چې وسلوال یې د ولسوالۍ بازار ته نږدې شوې او د بازار ځینې برخې یې نیولې دي.

مدني  مخکښ صدیق الله کاکړ څرګنده کړې، چې د بادغیس په بالامرغاب کې سخته جګړه روانه ده او د امنیتي ځواکونو نږدې ۵۰ سرتېرو خپل خوږ ژوند په کې له لاسه ورکړی دی.

د نوموړي د څرګندونو له مخې؛ په ولسوالۍ کې یوازې یو کندک د حکومت تر ادارې لاندې دی.

هغه عکسونه، چې په ټولنیزو رسنیو کې لاس په لاس کیږي ښیي، چې ځینې سرتېري طالبانو نیولي دي.

سرچینو ویلي، چې طالبانو د ولسوالۍ ځینې برخې لاندې کړي؛ خو ملي امنیت شورا او ملي دفاع وزارت دغلته د ځمکنیو او هوایي عملیاتو خبره کوي، چې موخه یې د طالبانو پر شا تمبول دي.

دوي وایی، دې جګړه کې طالبانو ته درانده تلفات اوښتي دي.

د ملي دفاع وزارت ویاند قیس منګل وایي، دې ولسوالۍ ته کمکي ځواکونه  رسیدلي او د ځمکې او هوا له لارې عملیات پیلېدونکي دي، چې طالبان پر شا وتمبول شي.

د ملي امنیت شورا ویاند طارق آرین وایي، چې په بالامرغاب ولسوالۍ کې د طالبانو پر مرکزونو هوایي او ځمکني بریدونه روان دي، درنده مرګ و ژوبله وراوښتې او سرتېري مو د پرمختګ په حال کې دي.            

بالامرغاب په بادغیس کې ستراتیژیکه ولسوالي ده. له یوې میاشتې څخه په لږ وخت کې دا دوه یم ځل دی، چې طالبان پرې برید کوي. شاوخوا ۱۱ ورځې مخکې هم طالبانو پر دې ولسوالۍ برید کړی و. په دې پېښه کې د ملي اردو شل سرتېري وژل شوي او ځینې نور ترکمنستان ته اوښتي وه.

About Ariana News

Avatar

Check Also

په لومړي ځل په هېواد کې یوه سوداګریزه سړخونه جوړه شوه

(Last Updated On: November 14, 2019)په لومړي ځل په هېواد کې یوه ستره سوداګریزه سړخونه …