تازه خبرونه
پر خبریالانو ځانمرګی برید یو بشري جنایت دی
د افغانستان د آزادو رسنیو ملاتړ ادارې په کابل کې پر خبریالانو ځانمرګی برید یو بشري جنایت ګڼي او د ملګرو ملتونو د جرمونو له نړیوالې محکمې غواړي، چې دغه برید په جدي توګه وڅېړل شي.
د کابل په شش درک کې پر خبریالانو شوی ځانمرګي برید، چې په کې ۹ خبریالانو خپل خوږ ژوند له لاسه ورکړی او شپږ نور ټپیان دي؛ د رسنیو ملاتړو ادارو تند غبرګون را پارولی او دغه پېښه یو ستر جنایت بولي.
د خبریالانو د خوندیتوب کمیټې غړي، چې پر خبریالانو د شوي برید په سیمه کې یې له رسنیو سره خبرې کولې، وویل، چې دا ډول بریدونه د بیان د آزادۍ د کاروان مخه نشي نیولای.
د خبریالانو د خوندیتوب کمیټې مشر صدیق الله توحیدي وایي: د کابل په زړه او شنه سیمه کې دغه برید د حکومت د ناغیړیو ښکارندویي کوي. د افغانستان خبریالان د ملګرو ملتونو د جرمونو له نړیوالې محکمې غواړي، چې دغه برید په جدي توګه وڅېړل شي.
د افغانستان د آزادو خبریالانو د انجمن رييس رحیم الله سمندر وایي: مونږ د افغانستان رسنۍ او د خبریالانو فدراسیون په یوه غږ له نړیوالې محکمې او امنیت شورا غواړو، چې دا جنایت ثبت کړي.
د افغانستان د بشري حقونو خپلواک کمیسیون پر ملکي او بې دفاع وګړیو بریدونه بشري جنایت ګڼي او له نړیوالو بنسټونو غواړي، چې دغه موضوع جدي وڅېړل شي.
د بشري حقونو خپلواک کمیسیون رییسه سیما سمر وایي، پر ملکي تاسیساتو او ملکي وګړیو برید له نړیوالو قوانینو ښکاره سرغړونه ده، چې نړیواله محکمه یا نړیواله جزایي محکمه باید پرې بشپړه ځېړنه وکړي.
ولسمشرۍ ماڼۍ او اجرائيه ریاست هم پر ملکي خلکو بریدونه غندلي او د بشر ضد جنایت یې ګڼي.
د ولسمشر ویاند هارون چخانسوري وایي: دا وحشیانه برید محکوموو. دا برید پر ملکي کسانو، د بیان پر آزادۍ او د افغانستان پر رسنیو تر سره شوی او د بشریت پر وړاندې ښکاره جنایت ګڼل کیږي.
د اداري اصلاحاتو او ملکي خدمتونو د کمیسیون رييس نادر نادري وایي: د دغې او نورو ورته ډلو جنایت د بښنې نه دی، چې باید بشپړ وڅارل شي؛ ملي او نړیوال بنسټونه متعهد دي او غواړي، چې عاملان یې د قانون منګولو ته وړاندې شي.
په دې وروستیو کې پر خبریالانو بریدونه زیات شوي او خبریالان په سختو شرایطو کې خپلې دندې تر سره کوي. په کابل کې پر خبریالانو له خونړي برید څو ورځې مخکې په کندهار کې د کابل نیوز خبریال عبدالمنان ارغند د وسلوالو کسانو لخوا پر ډزو ووژل شو او دادی نن په خوست کې د بي بي سي خبریال احمد شاه ترور شو.
تازه خبرونه
وروستیو سیلابونو په افغانستان کې ۱۵۰۰ کورنیو ته زیانونه رسولي
د مرستو رسولو اسلامیک ریلیف ټولنې څرګنده کړې، چې د تېرې اوونۍ بارانونو او سېلابونو په افغانستان کې مالي او ځاني زیانونو اړولي دي.
د دې ټولنې په راپور کې راغلي، چې د وروستیو سېلابونو له کبله شاوخوا ۱۵۰۰ کورنۍ زیانمنې شوي او سلګونه څاروي هم له منځه تللي دي.
اسلامیک ریلیف ټولنې زیاته کړې، چې د وروستیو اورښتونو په پایله کې ۹۰۰ کورونه جزوي او یا بشپړ ویجاړ شوي او ۹۳ زره هکټاره کرنیزه ځمکه زیانمنه شوې ده.
په داسې حال کې، چې په دې وروستیو ورځو کې سختو بارانونو او سیلابونو د افغانستان خلکو ته ځاني او مالي زیانونه اړولي دي، د نړیوالو مرستندویه موسسو د راپورونو پر بنسټ افغانستان له بېسارې بېوزلۍ او اقتصادي بحران سره مخ دی.
دا په داسې حال کې ده، چې له دې مخکې له پېښو سره د مبارزې وزارت ویلي وه، چې په دغو پېښو کې ۹۹ کسان وژل شوي او ۶۴ نور ټپیان دي.
تازه خبرونه
امریکا به افغانستان ته ورته په اوکراین کې هم له شرمېدلې ماتې سره مخ شي – روسیه
د روسیې بهرنیو چارو وزارت ویلي، چې امریکا به افغانستان او ویټنام ته ورته په اوکراین کې هم له شرمېدلې ماتې سره مخ شي.
د رویټرز د څرګندونو له مخې؛ د روسیې بهرنیو چارو وزارت ویاندې ماریا زاخارووا د یکشنبې پر ورځ ویلي: د روسیې پر وړاندې په ګډه جګړه کې ورځ تر بلې د واشنګټن ډوبېدا به ویټنام او افغانستان ته ورته د امریکا لپاره پر یوه لویه او شرمېدلې ماتې بدله شي.
هغې زیاته کړې، چې امریکا غواړي اوکرایین تر پایه وجنګېږي.
زاخارووا ویلي، چې روسیه به د اوکراین په جګړه کې د نورې ډېرې لاسوهنې لپاره د امریکا د کړنو پر وړاندې له قید او شرط پرته پرېکنده ځواب ورکړي.
امریکا د ۱۹۷۵ او ۱۹۹۵ کلونو ترمنځ د ویټنام په جګړه کې له ۵۸ زره څخه ډېر نظاميان له لاسه ورکړل، چې د کمونیسټ پلوه شمالي ویټنام پر بریا او په سویل کې د هغې د واکمنۍ له پای ته رسېدو سره پای ته ورسېده. په دې جګړه کې سلګونه زره ملکي وګړي ووژل شول.
په افغانستان کې هم امریکا د ۲۰۰۱ او۲۰۲۱ کلونو تر منځ ۲ زره ۴۵۹ سرتېري له لاسه ورکړل او له ۲۰ زره ډېر نور یې ټپیان شول.
تازه خبرونه
اوبه له افغانستان سره د اړیکو پراخولو اړین عامل دی – ایران
د افغانستان لپاره د ایران ځانګړي استازي حسن کاظمي قُمي اوبه د دوه اړخیزو اړیکو د پراختیا یو اړین عامل یاد کړی او هیله من شوی، چې د اوبو بهیر به روان وساتل شي.
حسن کاظمي قُمي دغه څرګندونې د یکشنبې پر ورځ (د غویی دوهیمه) په کابل کې د بهرنیو چارو وزارت له چارسمبالي امیرخان متقي سره په کتنه کې کړې دي.
د افغانستان بهرنیو چارو وزارت د خبرپاڼې له مخې؛ د ایران استازي د ایران سیستان ولایت ته د هلمند د سیند د اوبو په لاره کې د پرتو خنډونو د لرې کولو له کبله مننه کړې ده.
د بهرنیو چارو وزارت چارسمبالي دا هم ویلي؛ سږ کال په هېواد کې بارانونه شوي، چې په پایله کې یې له څو کلنې پرلهپسې وچکالۍ وروسته د هلمند سیند اوبه د افغانستان نیمروز ولایت او د ایران سیستان ته روانې شوې.
امیر خان متقي د افغانستان او ایران اړیکې دوستانه او مثبتې وبللې او په ټولو اړوند برخو کې یې د امکان تر حده د اړیکو د پراختیا غوښتونکی شو.
په دې کتنه کې د ایران ځانګړي استازي پر غزه د اسرائیلو د بریدونو په اړه د اسلامي امارت له دریځ او په دمشق کې د ایران پر کونسلګرۍ د برید له غندنې مننه وکړه.
-
لوبی5 days ago
د افغانستان فوټسال ملي لوبډلې له ایران ماتې وخوړه
-
نړۍ2 days ago
د جاپان دوه پوځي چورلکې بحر ته وغورځېدې
-
تازه خبرونه5 days ago
ملګرو ملتونو تېر کال په افغانستان کې د اوبو ۴۷۰ کیلومټره کانالونه جوړ کړل
-
تازه خبرونه2 days ago
د پاکستان سرحدونو وزیر د افغان کډوالو پر باعزته ستنېدا ټینګار وکړ
-
نړۍ5 days ago
د جمعې په ورځ به د م.م امنیت شورا په م.م کې د فلسطین د بشپړ غړیتوب په اړه رای ورکړي
-
لوبی1 day ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
تازه خبرونه5 days ago
تېر ۲۰۲۳ کال د افغانستان د خلکو لپاره د سترو ننګونو کال و -راپور
-
تازه خبرونه2 days ago
چینایي سوداګر کابل ته د پنجشېر اوبو لیږدولو په پروژه کې پانګونې ته لیوالتیا لري