د کانونو او پټرولیم وزارت یو ۲۰ کسیز تخنیکي او مسلکي پلاوی د کانونو اندتون(انسټیټوټ ) او د تخنیکي تفتیش ریاست د رییسانو تر مشرۍ لاندې د وړتیا لوړونې او مسلکي ودې په روزنیز پروګرام کې د ګډون لپاره پر ۲۸ ورځني سفر ازبکستان ته ولاړ.

د کانونو او پټرولیم وزارت د څرګندونو له مخې؛ د دې سفر اصلي موخه د معیاري لابراتوارونو له بېلابېلو تخنیکي څانګو لیدنه، له پرمختللیو لابراتواري تجهیزاتو او طریقو سره بلدتیا او د کانونو په برخه کې د عملي تجربو تبادله ده.

یاد سفر د افغانستان او ازبکستان ترمنځ د تخنیکي او علمي همکاریو په چوکاټ کې ترسره کېږي او د لابراتواري معیارونو د ښه‌والي، د کیفیت کنټرول او د کانونو په برخه کې د تخنیکي وړتیاوو پر لوړولو راڅرخیږي.

د اسلامي امارت د لوړو زده‌کړو وزیر ندا محمد ندیم د یکشنبې پر ورځ( د مرغومي یوویشتمه ) عمان ته ولاړ، چې د دواړو هېوادونو ترمنځ علمي همکاري پراخه او پیاوړې کړي.

د لوړو زده‌کړو وزارت د معلوماتو له مخې؛ په دې سفر کې به له اړوند عماني چارواکو سره لیدنې ترسره شي، چې په کې به د علمي همکاریو پر پراختیا، علمي تجربو تبادلې، لوړو زده‌کړو بنسټونو ترمنځ د اړیکو ټینګښت او د افغانستان او عمان ترمنځ د تعلیمي تعاملاتو پراخولو خبرې وشي.

همدارنګه ټاکل شوې، چې ندا محمد ندیم او ورسره مل پلاوی به د لوړو زده‌کړو په برخه کې د دوه‌اړخیزو همکاریو د پیاوړتیا لپاره په عمان کې له یو شمېر علمي او تعلیمي بنسټونو څخه لیدنې وکړي.

د لوړو زده‌کړو وزارت څرګنده کړی، چې له کابل پولی‌تخنیک پوهنتون څخه په یولړ مراسمو کې یو زر او اته انجنیران د لیسانس او ماسترۍ پر کچه فارغ شول.

د لوړو زده‌کړو وزیر ندا محمد ندیم په دې مراسمو کې فارغان د نظام، ټولنې او کورنۍ پر وړاندې مسوول وبلل او د زده‌کړو د دوام او پرله‌پسې زده‌کړې پر ارزښت یې ټینګار وکړ.

ندا محمد ندیم ویلي: «د فراغت سند تاسې ته د یو عادي کاغذ په توګه نه درکول کېږي، بلکې دا یو ستر امانت دی او له دې وروسته تاسې د نظام، ټولنې او خپلې کورنۍ پر وړاندې ستر مسوولیتونه لرئ.»

د دې فارغانو څخه ۷۵۷ انجنیران د لیسانس له کچې او ۲۵۱ انجنیران د ماسترۍ له پروګرام څخه فارغ شوي دي.