د افغانستان بهرنیو چارو وزارت ویلي، چې د افغانستان اسلامي امارت د بشردوستانه عمل په توګه جورج ګلزمن نومی یو امریکايي بندي له زندان څخه خوشې کړی دی.

د افغانستان اسلامي امارت د تل په څېر یو ځل بیا یادونه کوي، چې ټولو مسلو ته د خبرو، تفاهم او ډیپلوماسۍ له لارې د حل لار موندلی شي.

د بهرنیو چارو وزارت په برپاڼه کې راغلي: “د امریکايي وګړي د خوشې کولو ګام په ښه نیت اخیستل شوی دی. دا ښیي، چې اسلامي امارت د متقابل احترام او ګټو پر بنسټ له ټولو خواوو په ځانګړي توګه له امریکا سره رښتینو خبرو ته چمتو دی.”

د افغانستان بهرنیو چارو وزارت ویلي، چې تولې له فتنو ډکې ډلې لکه داعش ځپل شوې دي او له افغانستان څخه هیچا ته ګواښ نشته.

د نوموړي د څرګندونو له مخې، افغانستان د سیمې او نړۍ په ثبات کې مثبت رول لوبولی شي او اوس هم کولی شي له نړۍ سره خپلې ستونزې په ښه توګه حل کړي.

د بهرنيو چارو وزارت له متحده عربي اماراتو او قطر څخه هم مننه کړې، چې پدې اړه يې مهم او اغېزمن رول لوبولى او د اسلامي امارت او امريکا ترمنځ د اړيکو په اواري کې يې مهم ګامونه پورته کړی دی.

د بندیانو په چارو کې د امریکا د ولسمشر ځانګړي استازي ادم بوئلر او د افغانستان لپاره د امریکا پخواني ځانګړي استازي زلمي خلیلزاد په کابل کې د بهرنیو چارو وزارت له چارسمبالی( سرپرست) امیر خان متقي سره ولیدل.

د بهرنیو چارو وزارت د خبرپاڼې له مخې؛ دا  لیدنه، چې نن پنجشنبه( د کب نهه‌ویشتمه) ترسره شو په کې پر دوه اړخیزو اړیکو، بندیانو تبادلې او په امریکا کې افغانانو ته قونسلي خدماتو چمتو کولو خبرې وشوې.

امیر خان متقي کابل ته د ياد پلاوي راتګ په دوه اړخيزو اړيکو کې ښه پرمختګ بللی او يوځل بيا يې ټينګار کړی، چې اسلامي امارت د خپل متوازن بهرني سياست په رڼا کې ټولو لوريو سره مثبتې اړيکې غواړي.

هغه زياته کړې:«دا مهمه ده، چې افغانستان او امریکا پر دې وتوانېږي، چې مسئلې د خبرو له لارې اوارې کړي. پکار ده، چې دواړه هېوادونه د شل کلنې جګړې له اغېزو راووځي او يو له بل سره سياسي او اقتصادي مثبتې اړيکې ولري»

د بنديانو په چارو کې د امريکا د ولسمشر ځانګړي استازي اډم بوئلر ويلي، چې د افغانستان او امريکا ترمنځ د بنديانو په برخه کې پرمختګ د باورجوړونې پر لور ښه ګام دی او په افغانستان کې يې د مخدره موادو پرخلاف او د امنيت د ټينګښت پر لوري هڅې د ستاينې وړ یادې کړې.

دواړو لوريو د خبرو پر دوام ټينګار وکړ او د خبرو له لارې يې د اړيکو تقويت مهم وباله.