تازه خبرونه
په کندهار او هلمند کې سیلابونو ۵۹ کسانو ته مرګ و ژوبله اړولې
د کندهار ولايت مسوولينو ویلي؛ د سيلابونو له کبله د قربانيانو شمېر مخ پر زياتيدو دى، چې تر اوسه دوى ته د ٢٠ کسانو د مړیني او ٢٦ نورو د زخمي کيدو تر څنګ د سلګونه کورونو د ويجاړیدو راپور رارسیدلی دی.
د جمعې پر شپه په کندهار کې د اورښتونو له کبله سيلابونو خلکو ته د مالي زيانونو تر څنګ ځاني زيانونه هم اړولي، چي اوس هم د زيانونو کچه مخ پر زياتيدو ده.
د کندهار ښار اوسيدونکي وايي، چي سلګونه کورونه یې ويجاړ شوي او تر دې دمه حکومت ورته مرستې ندي رسولي.
د کندهار مرستيال والي عبدالحنان منيب وايي؛ د تېرو دوه ورځو په اوږدو کي د سيلابونو له کبله ٢٠ کسانو ژوند له لاسه ورکړى او ٢٦ نور ټپيان دي، چي اوس هم د سروې ډلې کار کوي او کيدى شي دزیانونو کچه نوره هم لوړه شي.
هغه زیاتوي؛ د سيلابونو له کبله په کندهار ښار او ولسواليو کې ١٥٩٦ کورونه ويجاړ شوي، چي دوى به له سروې وروسته ورته اړيني مرستي ورسوي.
د کندهار د طبیعي پېښو پر وړاندې د مبارزې ریيس مسعود احمد پښتون وايي؛ له مرکز څخه د شل ميليون افغانيو په کچه د مرستې غوښتنه شوې، چي په راتلونکیو څو ورځو کي به ټولو زيانمنو کورنيو ته مرستي ورسيږي.
هغه دا هم ویلي، چې دا مهال د البسې او خوراکي توکو مرسته ورسره شوې، چي دا بسنه نکوي.
دغه راز د هلمند والي ویاند عمر ځواک هم وايي؛ په دې ولایت کې څه باندې ١٠٠ کورونه ويجاړ شوي، چي ٦ تنه په کي مړه او ٧ نور ټپيان دي.
د دې ولايت مسوولين وايي، چي د هوا پېژندني د ادارې له خبر سره يې سم په کندهار ښار او ولسواليو کي چمتوالى نيولى و؛ خو د سيلابونو کچه دومره لوړه وه، چي د دوى پر چمتوالي سربېره يې بيا هم زيات زيانونه واړول.
خبریال: بريالي رحيمي
تازه خبرونه
د بیات بنیاد د روژې مرسته د بلخ ولایت اړمنو ته ورسېده
بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.
د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.
نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.
هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.
بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.
تازه خبرونه
په تېرو ۶ میاشتو کې ۸ زره ۷۴۷ جنايي پېښې ثبت شوي
د کورنیو چارو وزارت ویاند عبدالمتین قانع د پنجشنبې پر ورځ (د وري نهمه) په یوه خبري ناسته کې د ۱۴۰۲ لمریز لېږدیز کال د وروستیو شپږ میاشتو هڅې او پرمختګونه رسنیو ته وړاندې کړل.
د عبدالمتین قانع د څرګندونو له مخې؛ د ۱۴۰۲ کال په تېرو شپږ میاشتو کې ۸ زره ۷۴۷ جنايي پېښې ثبت شوي، چې ۷ زره ۲۳۳ یې کشف او ۱۵ سوه ۲۵ نورې تر څېړنې لاندې دي.
قانع زیاته کړې؛ ۱۲ زره ۵۴۰ کسان د بېلابېلو جنايي جرمونو پر تړاو نیول شوي دي.
نوموړی وایي؛ په دې موده کې ۲۱ انسان تښتوونکي وژل شوي، ۱۸ کسان یې له منګولو ازاد شوي او ۱۷۲ د انسان تښتونې پر تور نیول شوي دي.
د کورنیو چارو وزارت ویاند د پاسپورټونو د وېش په اړه څرګنده کړې، چې په تېرو شپږ میاشتو کې ۸۳۷ زره پاسپورټونه خلکو ته وېشل شوي او په کابل کې به د وېش درې نورې نوې ادارې جوړې شي.
قانع ویلي: د پاسپورټ رياست لهخوا هره ورځ لس زره پاسپورتونه هېوادوالو ته وېشل کېږي.
د دوی د څرګندونو له مخې؛ د نشهیي توکو کښت، تولید او قاچاق هم صفر ته رسېدلي او په هېواد کې د نشهیي توکو د تولید اته ماشینونه او د نشهیي توکو د تولید ۳۷۷ کارخونې کشف او له منځه وړل شوې دي. دوی د پولیسو د مسلکي کیدو، له فساد سره د مبارزې او د وسلو په راټولولو کې هم لاسته راوړنې لري.
هغه دا هم ويلي، چې په دې موده کې د هېواد په ډېرو ولايتونو کې کومه امنيتي پېښه نده رامنځته شوې او نه هم کوم امنيتي ضد فعاليتونه ترسره شوي دي.
د قانع د څرګندونو له مخې، امنیتي کچه د تېرو څو لسیزو پر پرتله بې سارې ده.
تازه خبرونه
د ټاپي ګاز شرکت اجرائیه رییس له وروستیو پرمختګونو خوښي څرګنده کړه
د کانونو او پټرولیم وزارت چارسمبالي شهاب الدین دلاور د پنجشنبې پر ورځ ( د وري نهمه ) د ټاپي پروژې له اجرائیوي رییس او په کابل کې د ترکمنستان له سفیر سره وکتل او د دغې پروژې د پرمختګونو په اړه یې خبرې وکړې.
د ترکمنستان او افغانستان، پاکستان او هند (ټاپي) د ګازو نلیکې د پروژې اجرائیوي رییس مراد امانوف د پروژې له وروستي پرمختګه خوښي وښوده او د پروژې د عملي پیل په اړه یې خبرې وکړې.
د افغانستان د کانونو او پټرولیم وزارت چارسمبالي شهاب الدین لاور ويلي، چې د ټاپي پروژې لومړني کارونه چټک روان دي او په نږدې راتلونکي کې به د دې نلليکې د غځولو چارې پيل شي.
ویل کیږي، چې د ترکمنستان سفیر یاد هېواد ته د افغان پلاوي د وروستي سفر په اړه معلومات وړاندې کړل او څرګندوي، چې په نږدې راتلونکي کې به د دغه هېواد یو پلاوی هرات ولایت ته سفر وکړي.
TAPI د طبیعي ګاز یوه نللیکه ده، چې د آسیا پراختیایي بانک په ګډون د ګالکینیش – TAPI نللیکې شرکت لهخوا پراختیا مومي.
دغه نللیکه به د ترکمنستان له ګالکینیش ګازو څخه طبیعي ګاز د افغانستان له لارې پاکستان او بیا هند ته لېږدوي.
-
تازه خبرونه2 days ago
په پاکستان کې ځانمرګي د ۵ چینايي انجینرانو په ګډون ۶ کسان ووژل
-
سوداگري3 days ago
افغانستان ته د پاکستان راغلی پلاوی پر اقتصادي همکاریو خبرې کوې
-
تازه خبرونه3 days ago
بیات بنیاد په ننګرهار کې اړمنو کورنیو ته د روژې مرستې ووېشلې
-
تازه خبرونه4 days ago
په هرات کې له ۵۰۰ ډېر لرغوني آثار موزیم او آرشیف ته سپارل شوي
-
تازه خبرونه4 days ago
د ښځو پر وړاندې د اسلامي امارت فرمانونه افغانستان پر بهرنیو مرستو متکي ساتي – رینا امیري
-
تازه خبرونه3 days ago
د پاکستان په تورخم کې سرحدۍ ځواکونو د فډرالي څېړنو ادارې ۶ کارکوونکي وهلي
-
تازه خبرونه1 day ago
په کابل کې سلګونه اړمنې کورنۍ د بیات بنیاد د روژې له مرستو برخمنې شوې
-
سوداگري2 days ago
د افغانستان او پاکستان د سوداګرۍ استازیو پر ننګونو خبرې وکړې