Connect with us

تازه خبرونه

په مسکو کې نړیواله درې اړخیزه ناسته تر سره شوه

Ariana News

خپور شوی

 په

(Last Updated On: April 25, 2019)

په مسکو کې د افغانستان د سولې بهیر په اړه د پنجشنبې پر ورځ( د غویي ۵، چې د اپریل له ۲۵ سره سمون خوري) د امریکا، روسیې او چین درې اړخیزه ناسته تر سره شوه.

دغه درې اړخیزه ناسته د افغانستان پر سوله او له طالبانو سره د امریکا پر خبرو راڅرخیدلې، چې په کې د امریکا، روسیې او چین استازي د ساعتونو لپاره د تړلو دروازو تر شا کیناستل.

د امریکا، روسیې او چین استازي د افغانستان پر حالت، په دوحه کې له طالبانو سره د امریکا د خبرو او د سولې بهیر پر راتلوونکې مشورې کوي.

افغان حکومت  د دې ناستې هرکلی کوي او هیله من دی، چې د نړیوالې اجماع په را منځته کولو او سولې ته د رسیدو په لار کې مرسته وکړي.

د بهرنیو چارو وزارت سرپرست صلاح الدین رباني وایي؛ مونږ د سیمې او نړۍ د هېوادونو له هڅو مننه کوو، چې د افغانستان سوله او ثبات غواړي. مونږ هیله من یو، چې د دغو ناستو پایله د افغانستان د سولې او ثبات لپاره یوه نړیواله اجماع رامنځته کړي.           

پخوانی ولسمشر هم خوشبین دی او وایي، د نړیوالو قدرتونو همکاري به د سولې بهیر تر بریالیتوبه ورسوي.

پخوانی ولسمشر حامد کرزي ویلي؛ باوري یم، چې د افغانستان د سولې بهیر به د نړۍ د قدرتونو؛ امریکا، روسیې او چین په همکارۍ بریالۍ شي. زه هیله من یم، چې په مسکو کې به د چین، روسیې او امریکا د استازیو ناسته  یو ګډ دریځ رامنځته کړي.

دغه راز د ایران د بهرنیو چارو وزیر امریکا په افغانستان کې د سولې بهیر په تړاو د ناسمو سیاستونو پر ترسره کولو تورنوي او وایي، تر اوسه پورې د دې هېوادونو هڅې  له طالبانو سره د سولې لپاره هیڅ لاسته راوړنه نلري.

د ایران د بهرنیو چارو وزیر جواد ظریف ویلي؛ ایران له طالبانو سره رسمي اړیکه لري، خو دا پدې معنا نده، چې له افغان حکومت پرته دا خبرې تر سره شي. مونږ په هغو ناستو کې ګډون نکوو، چې افغان حکومت په کې حضور ونلري؛ دا یو اصل دی.

همدارنګه د افغانستان د بیا رغاونې لپاره د امریکا پر مرستو د څار ځانګړې ادارې رییس له طالبانو سره د سولې تر هوکړې وروسته حالاتو اندېښمن کړی دی.

د افغانستان د بیا رغاونې لپاره د امریکا پر مرستو د څار ځانګړې ادارې مشر جان ساپکو  وایي، چې مونږ په افغانستان کې څه باندې یو تریلیون دالر ولګول او ټولې دا پیسې به له خطر سره مخ شي؛ خو که مونږ د سولې له هوکړې وروسته تېروتنه وکړو.

د مسکو درې اړخیزه ناسته په داسې حال کې جوړیږي، چې په وروستیو کې د افغانستان سولې لپاره د امریکا ځانګړي استازي افغانستان او  سیمې هېوادونو ته خپل تازه سفرونه پیل کړي دي.

تازه خبرونه

راشد خان غواړي افغانستان د نړۍ له غوره لوبډلو سره ولویږي

Ariana News

خپور شوی

په

توسط

(Last Updated On: October 21, 2020)

د کرکت ملي لوبډلې ستوري راشد خان له اړوند بنستونو غوښتي، چې ده ته دې د افغانستان د لوبو د ښوالي لپاره د نړۍ له غوره لوبډلو سره د لوبو فرصتونه ورکړي.

نوموړي په یوه مرکه کې ویلي؛ د لوبغاړي په توګه د ودې کولو لپاره باید تاسې له غوره لوبډلو پر وړاندې ولوبیږئ.

هغه ویلي: کله، چې زه په ۱۷ کلنۍ کې آی پی ایل ته راغلم؛  ما لوبغاړي، د هغوی روزنه او ځان جوړونه ولیده زه پوه شوم، چې د ښه کیدو او وړتیاوو لپاره باید څومره کار وشي.

راشد خان زیاته کړې؛ مونږ له تېرو پېنځه کلونو راپدیخوا په دوه نړیوال جامونو کې دوه ځله له آسترالیا، انګلند او نیوزیلنډ سره لوبه کړې. زه هیله من یم، چې مونږ د دوی پر وړاندې ولوبیږو او پاتې لوبغاړي هم د پرمختګ ورته فرصت خپل کړي.

راشد خان دا هم ویلي، چې د کرکت لوړې درجې ته د افغانستان له رسیدو حیران شوم؛ خو ډېر ویاړ هم پرې کوي.

د کرکت د ډګر دغه ستوري په ډاګه کړې؛ کله، چې ما څو کاله مخکې نور لوبغاړي ولیدل، ما حتی فکر نه کاوه، چې یوه ورځ به زه د نورو لپاره یوه بېلګه شم.

د نړیوال کرکت بورد له بشپړ غړیتوب وروسته افغانستان د ویست اندیز، آیرلند او بنګله دیش پر وړاندې یوازې څلور تیست لوبې ترسره کړي.

آسترالیا، انګلند، سویلي افریقا او نیوزیلند په کرکت تیست کورنۍ کې څلور غوره لوبډلې دي، چې تر دې دمه یې له افغانستان سره سیالۍ ته ښه راغلاست ندی ویلی.

Continue Reading

تازه خبرونه

حکمتیار په پاکستان کې د سولې بهیر په اړه له قریشي سره خبرې وکړې

Ariana News

خپور شوی

په

توسط

(Last Updated On: October 20, 2020)

د پاکستان د بهرنیو چارو وزیر شاه محمود قریشي د حزب اسلامي له مشر ګلبدین حکمتیار سره په کتنه د افغانستان د سولې په بهیر کې د خرابوونکیو له شتون خبرداری ورکړی دی.

د حزب اسلامي رهبر حکمتیار پرون پاکستان ته درې ورځنی سفر کړی، چې موخه یې له پاکستانيو حکومتي چارواکو سره د افغان سولې پر بهیر بحث او خبرې دي.

د حزب اسلامي له مشر سره په دې کتنه کې د پاکستان د بهرنیو چارو وزیر شاه محمود قریشي د افغانستان د سولې له بهیره خپل ملاتړ یو ځل بیا په ډاګه کړ او وایي، چې په افغانستان کې د جګړې لپاره هیڅ نظامي حل نشته.

د پاکستان د بهرنیو چارو وزارت ویاند زاهد حفیظ ویلي: د بهرنیو چارو وزیر قریشي لد حزب له رهبر  ګلبدین حکمتیار سره د دوه اړخیزو اړیکو په اړه خبرې وکړې. پاکستان تل د افغانستان د سولې له بهیره ملاتړ کړی. مونږ اوس هم په دوحه کې د افغانانو تر منځ خبرو اترو ته هیله من یو.

دغه راز د حزب اسلامي رهبر ويلي؛ اسلام آباد په افغانستان کې د جګړې دوام ته هیله من ندی او چمتو دی، چې د افغانستان د سولې په بهیر کې مثبت رول ولوبوي.

په داسې حال کې، چې د دوحې د سولې خبرو له ناڅرګند برخلیک سره مخ دی او د افغانستان په ځینو برخو کې تاوتریخوالی روان دی؛ نو تمې دا دي، چې اسلام آباد به د دې وضعیت د پای ته رسولو لپاره خپلې هڅې ونسپموي.

پاکستان د افغانستان د سولې په بهیر کې یو له مهمو لوبغاړیو څخه دی او له همدې کبله افغان چارواکي او سیاسي مشران غواړي په افغانستان کې د سولې د خوندي کولو لپاره ورسره ګډ کار وکړي.

Continue Reading

تازه خبرونه

عبدالله او روحاني د سولې بهیر په اړه خبرې تر سره کړې

Ariana News

خپور شوی

په

توسط

(Last Updated On: October 20, 2020)

د ملي پخلاینې عالي شورا مشر د سیمه ییزو هېوادونو د مشرانو د ملاتړ تر لاسه کولو لپاره د دوشنبې پر ورځ د ایران له ولسمشر حسن روحاني سره د افغانستان د سولې د روان بهیر او دوه اړخیزو همکاریو په اړه بحث او خبرې کړې دي.

عبدالله عبدالله د ایران له ولسمشر حسن روحاني سره له کتنې وروسته څرګنده کړې: مونږ د افغانستان د سولې بهیر، په دوحه کې د روانو خبرو او دوه اړخیزو اړیکو په اړه نظرونه تبادله کړل.

داکتر عبدالله د سولې په اړه د ایران د ولسمشر له ملاتړه مننه کړې او وایي، چې ایران د ګاونډ په توګه کولی شي په افغانستان کې د سولې بهیر په پرمختګ کې ارزښتمن رول ولوبوي.

د ایران ایرنا خبري آژانس سره په خبرو کې  عبدالله عبدالله ویلي؛ د افغانستان خلک د ټولو افغانانو لپاره تل پاتې او د منلو وړ سوله او همدارنګه په تېرو ۱۹ کلونو کې د لاسته راوړنو ساتنه غواړي.

هغه دا هم په ډاګه کړې، چې د سیمې هېوادونو ترمنځ همکاري کولی شي د سولې بهیر او روانو خبرو اترو ته وده ورکړي او بریالۍ پایله ترلاسه شي.

د نوموړي د څرګندونو له مخې؛ د ګاونډ هېوادونو مرسته او ملاتړ زمونږ لپاره په سیمه ییزه او نړیواله کچه د مشورې لپاره ډېر ارزښت لري.

د ملي پخلاینې عالي شورا د رسنیو  دفتر څرګنده کړې؛ داکتر عبدالله عبدالله او ورسره پلاوی یې سهار ایران ته له دوه ورخني سفره کابل ته راستانه شول. نوموړي په دې سفر کې د ایران له ولسمشر، بهرنیو چارو وزیر، د ولسي جرګې له مشر او نورو چارواکو سره د سولې د بهیر، د دوحې د خپلمنځي خبرو او دوه اړخیزو همکاریو په اړه بحث او خبرې کړې دي.

د یادونې ده، چې د سولې بهیر ته د سیمه ییزو هېوادونو د مشرانو د ملاتړ تر لاسه کولو په لړ کې د ملي پخلاینې عالی شورا مشر او ورسره پلاوي یې پاکستان او هند ته هم سفرونه تر سره کړي دي.

Continue Reading
Advertisement

Trending