د بیات بنیاد چارواکو ويلي، چې په کابل کې د دوی د روژې مرستې لسګونه اړمنو کورنیو ته ووېشل شوې.

دوی ویلي؛ په دې مرستو کې اوړه، وريجې او غوړي شته، چې له یوې رڼې سروې وروسته مستحقو کسانو ته ووېشل شول.

د بیات بنیاد چارواکو زیاته کړې، چې دا مرستې نه یوازې د روژې په میاشت کې، بلکې په ژمي او بېړنیو حالاتو کې یې هم وېشلو ته ژمن دي.

د بیات بنیاد مرستیال حاجي محمد اسماعیل ویلي: “نن مونږ د روژې مرستې هم پیل کړې، چې اوړه، وریجې او غوړي په کې دي. زمونږ مرستې په کابل او نورو ولایتونو کې وېشل کیږي. “

محمد اسماعیل زیاته کړې: “بیات بنیاد د ژمي په موسم او د روژې د مبارکې میاشتې په ورځو او نورو اړینو وختونو کې لومړني ګامونه پورته کوي.”

دغه راز هغه کورنۍ، چې مرستې یې ترلاسه کړي؛ له نورو مرستندویه بنسټونو او ټولنو هم غواړي، چې بیات بنیاد ته ورته له اړو خلکو سره د مرستې لپاره راودانګي.

د مرستې ترلاسه کوونکي وایي: ” کراچي‌وان یم؛ زما په کورنۍ کې لس غړي دي. معیوب او معلولین لرم. د ورځې کار نه‌کیږي. له بیات بنیاد او همکارانو ه یې مننه، چې له زمونږ سره یې مرسته وکړه.”

له نږدې دوه لسیزو راپدېخوا بیات بنیاد په هره روژه کې د مرکز او ولایتونو زرګونه اړمنو کورنیو ته د خوراکي او غیر خوراکي توکو مرستې چمتو کوي او وېشي.

‏د افغانستان ماليې وزارت د معاشونو د نورم او اجراء په اړه په يوه خبرپاڼه کې ویلي، چې د معاشونو د نورمونو د بدلون په تړاو خپرې شوې اوازې او ليستونه ناسم او درواغ دي.

د ماليې وزارت په خبرپاڼه کې راغلي؛ د تېرو څو ورځو راپدېخوا په یو شمېر رسنيو او ټولنیزو پاڼو کې، چې د امارتي ادارو د معاشونو د نورم د بدلون په اړه کوم لیستونه او اوازې خپرېږي؛ مطلق ناسم دي.

ماليې وزارت په همدې اوونۍ کې د معاشاتو د اجراء خبر هم ورکړی او زياتوي:« دا وزارت هېوادوالو ته ډاډ ورکوي، چې د امارتي ادارو معاشات به په دې اوونۍ کې د پخوا په څېر اجراء شي».

دا په داسې حال کې ده، چې د حکومت مامورینو د سلواغې او کب میاشتو معاشونه ندي اخیستي.

د بهرنیو چارو وزارت ویلي؛«د اسرائیلي اشغالګر رژیم په تازه بریدونو کې، چې له کبله یي له ۳۰۰ ډېر بې گناه فلسطینیان د میرمنو او ماشومان په ګډون “شهیدان” او ټپیان کړل» پر کلکو ټکو غندي.

د دې وزارت د خپرې شوې خبرپاڼې له مخې: “د صهیونستي یرغلګرو دا وحشیانه عمل نه یوازې له بشري حقونو او نړیوالو قوانینو سرغړونه ده، بلکې د انسانیت له بنسټیزو ارزښتونو سره هم ښکاره تضاد لري”.

دغه راز بهرنیو چارو وزارت یو ځل بیا له ذیدخله هېوادونو وغوښتل، چې د فلسطین له مظلومو خلکو خپل ملاتړ څرګند کړي او د اشغال د پای ته رسولو لپاره عملي او پرېکنده ګامونه واخلي.

اسلامي امارت ویلي، چې دوی “د فلسطینیانو حقه مبارزه او مشروع مقاومت د هغو یو ثابت حق ګڼي او ملاتړ یې کوي.”