Connect with us

تازه خبرونه

په قطر کې د طالب استازیو او امریکایانو شپږم پړاو خبرې پای ته ورسیدې

خپور شوی

 په

(Last Updated On: غویی ۲۰, ۱۳۹۸)

زلمي خلیلزاد په دې پړاو کې شوی پرمختګ پڅ ګڼلی؛ خو طالبانو په ټوله کې دا خبرې مثبتې ارزولي دي.

له نهه ورځو خبرو اترو وروسته له طالب استازیو سره د زلمي خلیلزاد خبرې پای ته ورسیدې. په دې خبرو کې له څلورو مسایلو څخه دوه مسایل په ژور ډول تربحث لاندې راغلل.

خبرې اترې د زیاترو د تمې خلاف پای ته رسیدلي دي.

سیاسي هڅاند نظر محمد مطمئن ویلي؛ دواړو خواوو له څلورو مسایلو څخه پر دوه مسایلو هوکړې ته رسیدلي، چې د نړیوالو ځواکونو د وتلو څرنګوالی او په ترهګرۍ ضد هڅو کې د ښکېلتیا تضمین دی.

نوموړی زیاتوي، ځینو هېوادونو په قطر کې له امریکایانو سره د هوکړه لیک د وروستي کیدو مخه نیولې؛ ځکه هغو غواړي، چې لومړی دې اوربند وشي او له حکومت سره دې خبرې تر سره شي.

دغه راز طالبانو او امریکایانو هم د دې خبرو په تړاو متفاوت غبرګونونه ښکاره کړي دي.

زلمي خلیلزاد د دوحې ناستې ته په نغوته کې څرګنده کړې، چې په دې پړاو خبرو کې د جګړې د پای لپاره دوامداره؛ خو ورو پرمختګونه حاصل شول.

نوموړي په خپل یوه تویت کې څرګنده کړې، چې مونږ په قطر کې خبرې اترې سر ته ورسولې؛ مونږ په افغانستان کې د جګړې پای ته رسولو لپاره د چوکات په ټاکلو کې پرمختګ کړی دی. اوس مونږ د دې چوکات د پلي کولو لپاره پر مهمو ټکو کار کوو. د خبرو اترو اوسنی بهیر بشپړ نه دی، مونږ چټک پرمختګ ته اړتیا لرو؛ مونږ اوس په وړاندیزونو کې یو، چې ټول لوري دې خپل  کلک دریځونه نرم کړي.

طالبانو په یوه اعلامیه کې پرته لدې، چې جزئیات ورکړي، په ټولو کې ددې پړاو خبرې ښې بللي دي.

د طالبانو د څرګندونو له مخې؛ په دې پړاو خبرو کې پر هغې مسودې بحث وشو، چې په تېرو پړاوونو کې ترتیب شوی و او په ځينو مواردو کې پرمختګونه هم وشول او ځینې برخې اوس هم پاتې دي او په ټولو کې دا خبرې مثبتې وې او دواړو لوریو د یو او بل نظریات په زغم واوریدل.

دا په داسې حال کې ده، چې د ځینو سرچینو د څرګندونو له مخې؛ د سیمې یو شمېر هېوادونه د پاکستان په ګډون د امریکایانو او طالبانو د وروستۍ هومکړې غوښتونکي ندي.  

د سولې عالي شورا مرستیال دین محمد وایي، چې اوربند او له حکومت سره خبرې باید لومړی ترسره شي.          

دا خبرې په داسې حال کې پای ته رسیږي، چې طالبانو خپل بریدونه پراخ کړي دي. د جګړو د شدت له  کبله ملکیان هم خوندي ندي. اوس دواړه لوري اووم پړاو خبرو ته چمتووالی نیسي؛ خو څرګنده نده، چې دا بهیر به کله پیل شي.

خبریال: شاهپور فرهمند

تازه خبرونه

پر افغانستان د نړیوالې ټولنې بندیزونه به داعش پیاوړی کړي – سهیل شاهین

خپور شوی

په

توسط

(Last Updated On: ليندۍ ۶, ۱۴۰۰)

اسلامي امارت خبرداری ورکوي، چې پر افغانستان د نړیوالې ټولنې د بندیزونو دوام به داعش پیاوړی کړي.

په افغانستان کې د داعش د فعالیت پراخیدو په اړه له اندېښنو وروسته سهیل شاهین یورو نیوز ته خپله اندېښنه په ډاګه کړې او خبرداری ورکوي، چې که پر افغانستان د نړیوالې ټولنې بندیزونه روان وساتل شي؛ نو ورسره به داعش پیاوړی شي.

سهیل شاهین، چې اسلامي امارت ملګرو ملتونو ته د افغانستان د استازي په توګه ټاکلي له یورونیوز سره په مرکه کې زیاته کړې، چې د امریکا لخوا د افغانستان د شتمنیو کنګل کولو فقر ډېر او اقتصاد زیانمن کړی او د داعش د جلب او جذب لپاره یې زمینه برابره کړې ده.

نوموړی وایي: بندیزونه د بېوزلۍ د رامنځته کېدو او په هېواد کې د اوسني بشري ناورین د زیاتېدو لامل کېږي، چې د داعش د ځواکونو د استخدام لپاره زمینه برابروي او له دې وضعیت څخه دوی ګټه پورته کوي.

په هېواد کې وروستیو پرمختګونو او په افغانستان کې د داعش خراسانۍ څانګې د پراخېدو آوازو روسیه او د منځنۍ آسیا هېوادونه په ځانګړي توګه تاجکستان اړ کړي، چې له افغانستان سره په سرحدي سیمو کې ګډې پوځي روزنیزې هڅې وکړي. ازبکستان او قزاقستان هم په دې وروستیو کې د بریک په سرحدي ښارګوټي کې ګډ پېنځه ورځني پوځي روزنه ترسره کړې ده.

د ازبکستان د دفاع وزارت ډاګه کړې؛ د دواړو هېوادونو په سرحدي سیمو کې د وسلوالو ډلو د کشف او شنډ لپاره له سل ډېرو پوځیانو په ګډه پوځي روزنه ولیدله. په دې پوځي روزنه کې پر زغره والو موټرو او پوځي تجهیزاتو سربېره، جنګي الوتکې او پوځي چورلکې هم وکارول شوې.

پوځي شنونکي جنرال ثمر سادات ویلي؛ په افغانستان کې د تروریستي پروژو ایجنټان د ګاونډ هېوادونو او نړۍ د استخباراتو لخوا لوی ښودل کیږي، چې پر پښو ودرېږي او هڅې ترسره کړي.

د افغانستان اسلامي امارت دفاع وزارت لوی درستیز له الجزیرې سره په مرکه کې ټینګار کړی، چې نوی افغان پوځ به په هېواد کې ثبات ټينګ کړي او دا پوځ به پر بهرنیو مرستو تکیه نکوي.

د ملي دفاع وزارت لوی درستیز قاري فصیح الدین بدخشانی وایي: زمونږ تازه دمي ځواکونه د خلکو، جریانونو او ګوندونو دي او د اسلامي عقیدې له مخې د افغانستان د ساتنې لپاره چمتو شوي دي.

په همدې حال کې د اسلامي امارت او امریکا استازیو نن د قطر په پلازمېنه دوحه کې د خبرو نوی پړاو پیل کړی، چې له افغانستان څخه د تروریستي ګواښونو د له منځه وړلو په اړه خبرې اترې یې د اجنډا یوه برخه ده.

Continue Reading

تازه خبرونه

افغان پلاوي له قطري استازیو سره پر ګډو همکاریو خبرې وکړې

خپور شوی

په

توسط

(Last Updated On: ليندۍ ۶, ۱۴۰۰)

د افغانستان اسلامي امارت د بهرنيو چارو وزارت چارسمبالي مولوي امير خان متقي په مشرۍ یو لوړ پوړي پلاوي تېره شپه د قطر په بهرنیو چارو وزارت کې د بېلا بېلو وزارتونو او ادارو له استازیو او مشرانو سره ګډه ناسته ترسره کړې ده.

له مولوي متقي سره په دې پلاوي کې د پوهنې، روغتیا، مالیې، امنیت او د افغانستان بانک استازي مل دي.

د بهرنيو چارو وزارت وياند عبدالقادر بلخي څرګنده کړې؛ په دې ناسته کې پر سیاسي، بشري، اقتصادي او ښوونیزو او روزنیزو موضوعاتو پراخې ‏خبرې شوي دي.

په دې غونډه کې د قطر هېواد استازیو ويلي، چې د افغانستان د خلکو تر څنګ ولاړ دي او مرستې به ورسره وکړي.

افغان پلاوي د قطر هېواد له مرستو او په تېرو مذاکراتو کې د دوی له مثبت رول څخه مننه کړې.

دا په داسې حال کې ده، چې نن به د قطر پر کوربتوب د افغان او امریکایانو تر منځ پر سیاسي او ټولنیزو مسایلو پرخې خبرې تر سره شي.

Continue Reading

تازه خبرونه

له افغانستان څخه اخیستل شوی درس مو د راروانې ناستې موضوع ده – ناټو

خپور شوی

په

توسط

(Last Updated On: ليندۍ ۶, ۱۴۰۰)

د ناټو سرمنشي ینس سټولټنبرګ پرون (جمعه د لیندۍ ۵ ) څرګنده کړې، چې د دې ټولنې د بهرنیو چارو وزیران به راتلونکې اوونۍ په افغانستان کې د دې سازمان پر فعالیتونو او اخیستل شویو درسونو خبرې وکړي.

د ناټو عمومي منشي ینس سټولټنبرګ ویلي، چې د افغانستان د تېر حکومت او پوځي ځواکونو له چټک سقوط وروسته ما د خپل تعامل هر اړخیزه ارزونه پیل کړې ده.

سټولټنبرګ زیاته کړې، چې ناټو د ترهګریزو بریدونو د مخنیوي لپاره افغانستان ته تللې وه.

نوموړی وایي؛ د سپټمبر له یوولسمې وروسته زمونږ پر وړاندې له افغانستان څخه ترهګریز برید نه دی شوی؛ خو مونږ باید پوه شو، چې په وروستیو کلونو کې نړیوالې ټولنې له ترهګرۍ سره د مبارزې له بنسټیزې موخې څخه لوړې غوښتنې په نظر کې نیولې وې، چې مونږ له تلفاتو او پانګونې سره سره و نشو کولی هغهه ترلاسه کړو.

د ناټو عمومي منشي په افغانستان کې د بشري وضعیت په اړه هم اندېښنه څرګنده کړې ده.

هغه وایي: په افغانستان کې بشري وضعيت ډېر خراب، کړکېچن او ډېر ستونزمن دی او له شک پرته دا د ټولو لپاره د ډېرې اندېښنې وړ او ژمی هم په رارسېدو دی. مونږ پوهېږو، چې ډېر خلک په ژمي کې له کړاوونو سره مخ دي.

سټولټنبرګ له افغانستان سره د ناټو د غړیو هېوادونو له روانو بشري مرستو هرکلی کړی او دا یې د افغانستان له خلکو سره د ناټو د غړیو هېوادونو ژمنتیا نومولې ده.

د ناټو عمومي منشي زیاته کړه، چې د افغانستان پر راتلونکي به له پاکستان سره خبرې وکړي.

هغه وایي: ناټو له کلونو راپدیخوا له پاکستان سره منظمې اړیکې لري؛ نه یوازې د افغانستان د وضعیت په اړه، بلکې ورسره سیاسي اړیکې او منظمې پوځي اړیکې او خبرې اترې هم لرو، چې باید روانې وساتل شي؛ ځکه، چې په سیمه کې، په ځانګړې توګه د افغانستان د راتلونکي په اړه ډېرې ننګونې اوس هم شته.

سټولټنبرګ وايي، د ناټو د بهرنیو چارو وزیران به د اوکراین په پولو کې د روسي ځواکونو د زیاتوالي په اړه هم خبرې وکړي.

هغه ویلي: په دې اړه هڅې کړکیچ زیاتوي او د غلطې محاسبې خطر لري. روسیه باید شفافه وي، تاوتریخوالی کم کړي. د روسیې پر وړاندې د ناټو چلند بدل شوی ندی. مونږ خپله دفاع پیاوړی کوو او په دې اړه له روسیې سره خبرو ته چمتو یو.

هغه وایي، چې د ناټو د بهرنیو چارو وزیران به په بېلاروس کې له کډوالو سره د ناوړه چلند په اړه هم خبرې وکړي.

سټولټنبرګ زیاته کړه، چې په دې غونډه کې به د روسیې د تېري، د چین د اقداماتو او د اقلیم د بدلون په ګډون پر نورو مسایلو هم خبرې وشي.

ټاکل شوې، چې دغه غونډه راتلونکې سې شنبه د لاتویا په پلازمېنه ریګا کې ترسره شي.

Continue Reading

Trending

آریانا نیوز: ټول حقونه خوندي دي