Connect with us

تازه خبرونه

په دوحه کې د طالب او امریکایي استازیو خبرې له دمې وروسته بیا پیل شوې

Ariana News

خپور شوی

 په

(Last Updated On: کب ۱۱, ۱۳۹۷)

طالبانو ته نږدې سرچینو ویلي؛ امریکایي پلاوي طالبانو ته  وړاندیز کړی، چې په درې تر پېنځه کلونو کې به له افغانستان څخه خپل ځواکونه وباسي، خو طالبانو ویلي، چې دا ځواکونه دې په شپږ میاشتو کې ووځي.

په تېرو دوه ورځو کې طالبان او امریکایان په خپلو کې وغږېدل؛ تازه د شنبې پر سهار( د کب ۱۱) دواړه خواوې د یوه میز تر شا کیناستې او خبرې له سره پیل شوې، چې د اختلاف غټ ټکي په کې د بهرنیو ځواکونو د وتلو لپاره مهالوېش دی.

د حرکت انقلاب اسلامي افغانستان ګوند رییس مولوي قلم الدین ویلي؛ امریکایانو د طالبانو استازیو ته وړاندیز کړی، چې بهرني ځواکونه به په درې تر پېنځه کلونو کې ووځي، خو طالبانو دا نده منلې او له شپږ میاشتو تر یوه کال پورې له افغانستان څخه د بهرنیو ځواکونو وتل غواړي. په داسې حال کې، چې طالبانو د بهرنیو ځواکونو د وتلو د اړوند نېټې په اړه څه ندي ویلي.

طالبانو ته نږدې سرچینو ويلي؛ ښایي روانې خبرې اترې څو ورځې نورې هم وغزیږي، چې د سولې  پر وروستۍ هوکړې سلا وشي.

پخوانی طالب سید اکبر آغا وایي؛ امریکایان غواړي، چې  تر ۵ کلونو پورې به افغانستان خوشې کړي؛ ځکه د افغانستان له حکومت سره په امنیتي تړون کې د بهرنیو ځواکونو حضور لس کلن دی، چې باید دغه موده پوره کړي.

د دوحې د مذاکراتو په اوج کې افغان حکومت پرېکړه کړې، چې له طالبانو سره به د مرکچي پلاوي ترکیب بدل کړي. لدې مخکې زلمي خلیلزاد هم ویلي وه، چې په کابل کې د سولې خبرو لپاره پلاوی د جوړېدو په حال کې دی.

د ولسمشر ویاند هارون چخانسوري ویلي، چې له طالبانو سره د مرکچي پلاوي په ترکیب کې بدلون راځي او سیاسي ډلې به هم په دې نوملړ کې ور زیاتې شي.

سرچینو ویلي، چې د طالبانو او امریکایانو تر منځ د سولې لومړنۍ هوکړې مسوده هم تیاره شوې او ښایي د دوحې په دې پړاو خبرو کې د دواړو خواوو د تائید وړ وګرځي. په داسې حال کې، چې د دې مسودې جزییات تر اوسه ډاګیز شوي ندي.

پخوانی پوځي محمد رادمنش وایي؛ تر هغې، چې سیاسي ډلې، حکومت او مدني بنسټونه د دغو خبرو برخوال ونه ګڼل شي په دې اړه به وروستۍ پایله تر لاسه نشي.

د طالب بندیانو خلاصون او اوربند، دوه نور بحثونه دي، چې د قطر په مذاکراتو کې پرې د طالبانو او امریکایانو استازي خبرې کوي.

خبریال: باعث حیات

تازه خبرونه

مایک پمپیو او ملا برادر د افغانستان د سولې په اړه خبرې کړي

Ariana News

خپور شوی

په

توسط

(Last Updated On: زمری ۱۴, ۱۳۹۹)

په قطر کې د طالبانو د سیاسي دفتر ویاند او غړي سهیل شاهین په ډاګه کړې، چې د دوشنبې پر ماښام د سیاسي دفتر مشر ملا برادر او ورسره پلاوي یې د ویدیو کنفرانس له لارې د امریکا له بهرنیو چارو وزیر مایک پمپیو سره د خپلمنځي خبرو د پیل او روان وضعیت په اړه خبرې کړي دي.

نوموړي څرګنده کړې، چې دواړو لوریو د خپلمنځي خبرو د پیل لپاره د پاتې طالب بندیانو خوشې کول مهم وباله او دغه راز یې د لوی اختر په مناسبت له اعلان شوي اوربنده هم هرکلی کړی دی.

د امریکا بهرنیو چارو وزارت تر دې دمه په دې اړه څه ندي ویلي.

 دمګړۍ د طالبانو او افغان حکومت تر منځ د خپلمنځي خبرو بنسټیز خنډ؛ د طالبانو او امریکایانو لخوا افغان حکومت ته د ۵۰۰۰ طالب بندیانو د سپارل شوي نوملړ له مخې د پاتې ۴۰۰ طالب بندیانو نه خوشې کول دي.

د طالب مشرانو او امریکایانو تر منځ د سولې په اړه دغه ویدیوي خبرې په داسې حال کې تر سره کیږيو، چې افغان ولسمشراشرف غني یې د خوشې کولو د پرېکړې لپاره مشورتي لویه جرګه راغوښتې.

ټاکل شوې، چې په دې اړه مشورتي لویه جرګه د روانې اوونۍ د جمعې پر  ورځ تر سره شي.

د روان زېږدیز کال د فبرورۍ پر ۲۹ د قطر په دوحه کې د امریکایانو او طالب استازیو تر منځ په افغانستان کې د سولې رامنځته کولو تړون لاسلیک شوی، چې له مخې به یې افغان حکومت د طالبانو د نوملړ له مخې د دوی ۵۰۰۰ بندیان خوشې کوي او طالبان به ۱۰۰۰ حکومتي بندیان له بنده خوشې کوي.

طالبانو د اختر تر لومړۍ نېټې ۱۰۰۰ حکومتي بندیان بشپړ خوشې شوي اعلان کړل او حکومت هم تر دې دمه د ورسپارل شوي نوملړ له مخې ۴۵۰۰ طالب بندیان خوشې کړي او له پاتې ۵۰۰ څخه یې ۴۰۰ خطر ناک او وېروونکي پېژندلي دي، چې دې کار یې اندېښنې راپارولي دي.

د یادونې ده، چې په وروستیو څلور اوونیو کې دا د مایک پمپیو او ملا برادر تر منځ دوه یم ویدیوي لیدنه ده.

Continue Reading

تازه خبرونه

د جمعې پر ورځ د ۴۰۰ طالب بندیانو د خوشي کولو په اړه مشورتي جرګه جوړیږي

Ariana News

خپور شوی

په

توسط

(Last Updated On: زمری ۱۴, ۱۳۹۹)

په کابل کې د څلورسوه طالب بندیانو د خوشي کولو د پرېکړې په اړه تر راتلونکیو څلور ورځو مشورتي جرګه جوړیږي.

د سولې مشورتي جرګه، طالب بندیان، د تاوتریخوالي کموالی او د سولی خبرو پيل په روانه اوونۍ کې د حکومت مهم بحثونه دي.

حکومت پرېکړه کړې، چې د ۴۰۰ طالب بندیانو د خوشي کولو په موخه تر راتلونکیو ۴ ورځو د  سولې مشورتي جرګه را وبولي.

د دغې جرګې غړي به د سولې مشورتي شورا او ملي پخلاینې عالي شورا غړي وي.

ولسمشرۍ ویلي، تراوسه روښانه نده، چې څوک به د دې جرګې مشري کوي.

د ولسمشرۍ ویاند صدیق صدیقي وایي: مشورتي لویه جرګه د زمري پر ۱۷ یا د اګست پر۷ تر سره کیږي او د سولې مشورتي لویې جرګې ته ورته به یې غړي د بېلابېلو مدني ټولنو ، رسنیو او سیمه ییزې شوراګانو استازي وي، چې په اوه به یې د دې جرګې د تر سره کولو کمیسیون سباته پوره جزئیات وړاندې کړي.

اوس پوښتنه داده، چې حکومت ولې د پېنځه زره طالب بندیانو د خوشي کولو په اړه مشورتي لویه جرګه جوړه نه کړه؟

حقوق پوهانو ویلي؛ د ۴۰۰ طالب بندیانو د خوشي کولو په اړه د مشورتي لویې جرګې جوړېدل ننداریزه او سیاسي ګڼي او وایي، مشورتي لویه جرګه حقوقي اړخ نلري او په دې اړه پرېکړه هم نشي کولی.

د حقوقو پوهنځي استاد نصرالله ستانکزي د مشورتي جرګې له جوړېدو سره مخالفت کړی او وایي مشورتي لویه جرګه حقوقي اړخ نلري او نشي کولی حق العبدي ستونزه حل کړي. دا فردي حق دی. د ۴۶۰۰ بندیانو خوشې کول د حکومت خپله خوښه نه، بلکې د سیاسي فشارونو پایله وه. د جمعې ورځې کړنه یې یو ننداریز او سیاسي حرکت دی؛ که سر ه کرښه هم وباسي، اړینه دهؤ چې دا بندیان به خوشې کوي.

حکومت په داسې وخت کې د سولې مشورتي جرګې د را بللو پرېکړه کړې، چې تراوسه هم د کرونا ویروس د خپرېدو د ډېروالي وېره شته.

د عامې روغتیا وزارت چارسمبالي احمد جواد عثماني ویلي، چې  د روغتیایي سپارښتنو له په پام کې نیولو سره د جرګې جوړېدل ستونزه نلري.

په ورته وخت کې د ولسمشر دوه یم مرستیال سروردانش په کابل کې د امریکا سفارت له مرستیال سره اړیکه نیولې او هغه ته یې ویلي، چې دا جرګه به د تېرو لویو جرګو تجربو ته په پام  د ۴۰۰ طالب بندیانو د برخلیک په اړه مثبته پایله ورکړي.

Continue Reading

تازه خبرونه

د ننګرهار پر محبس برید د بریدکوونکیو پر وژل کیدو پای ته رسیدلی

Ariana News

خپور شوی

په

توسط

(Last Updated On: زمری ۱۳, ۱۳۹۹)

امنیتي ځواکونو د ننګرهار په مرکزي زندان کې د څه نا څه ۲۰ ګړیو جګړه د جنګیالیو پر وژل کیدو پای ته رسولې او وضعیت یې تر خپلې څارنې لاندې راوستی؛ خو د ښار اړوند سیمې اوس هم د خلکو د تګ راتګ لپاره تړل شوې دي. 

په ننګرهار ښار کې پلورنځي تړل شوي او د دوشنبې پر ورځ هم خلکو ته ویل شوي وه، چې په کورونو کې پاتې شي.

دا په داسې حال کې ده، چې د هېواد د دفاع وزارت لوی درستیز یاسین ضیا جلال آباد ښار ته رسیدلی، چې د بریدګرو پر ضد دعملیاتو مشري تر سره کړي.

نن له غرمې وروسته دغه زندان افغان ځواکونو ونیوه، چې په کې لږ تر لږه ۵ بریدګر وژل شوي دي.

امنیتي چارواکو ویلي، چې محبس ته مخامخ ودانۍ هم اوس له بریدکوونکیو پاکه شوې ده.

داعش جنګیالیو تېره ورځ ماښام مهال د محبس پر ور موتربم برید ترسره کړ؛ د ودانۍ انګړ ته وردننه شول او څه نا څه ۲۰ ساعته یې له افغان ځواکونو سره جګړه وکړه.

ویل کیږي، چې د جګړې د پیل پر مهال ۱۷۰۰ بندیان په زندان کې دننه ول، چې یو شمېر یې د داعش غړي وه.

د جګړې په بهیر کې سلګونه بندیان بریالي شول، چې وتښتي؛ خو امنیتي ځواکونو یو شمېر بېرته ونیول.

یو شمېر نیول شویو بندیانو آریانا نیوز ته ویلي؛ ۶ بریدګر زندان ته رادننه شول او دوی ته یې د وتلو سپارښتنه وکړه.

د دوی د څرګندونو له مخې؛ بندیانو ته وویل شول که ونه وځي، نو وبه وژل شي.

یوی امنیتي سرچینې ویلي، چې تښتیدلي بندیان طالبان،  داعشیان او مجرمان ول.

د ننګرهار والي ویاند عطا الله خوږیاڼي ویلي؛، چې په دې پېښه کې ۳۰ کسان وژل شوی او ۵۰ نور ټپیان دي.

خوږیاڼي زیاته کړې؛ په دې دله ییز برید کې امنیتي ځواکونو، بندیانو او عامو وګړیو ته ځاني زیان اوښتی دی.

د ننګرهار ولایت د عامې روغتیا ریاست ویاند ظاهر عادل آریانا نیوز ته ویلي، چې د ۱۳ ټپیانو روغتیایي حالت د اندېښنې وړ دی.

د داعش دغه ډله ییز برید یوه ورځ وروسته له هغې رامنځته شو، چې د افغانستان ملي امنیت ریاست ځواکونو جلال آباد ښار ته نږدې د دغو جنګیالیو یو استخباراتي مشر اسدالله اورکزی په یو لړ عملیاتو کې وواژه.

Continue Reading

Trending