د بلخ پخواني والي او د جمعیت اسلامي اجرائیه رییس عطا محمد نور په خپلو تازه څرګندونو کې ویلي، چې په افغانستان لوی ملي ائتلاف کې د افغانستان د ژغورنې ائتلاف د غړیو په ګډون د لوی کندهار، لوی پکتیا او لوی ختیځ  مشران د جمعیت اسلامي، وحدت اسلامي او جنبش ملي تر چتر لاندې برخه لري.

ویل کیږي، چې د خلکو محور او د افغانستان د خلکو نوې ملي جبهه هم تر دغه چتر لاندې په دې ائتلاف کې ځای لري.

نوموړي په خپل فیسبوک کې په ډاګه کړې، چې دغه ائتلاف به ډېر ژر په کابل کې خپل شتون اعلان کړی.

هغه زیاته کړې، چې د افغانستان لوی ملي ائتلاف د جوړولو موخه د نظام پیاوړتیا او په حکومت کې د اصلاحاتو رامنځته کول دي.

د جمعیت اسلامي اجرائیه رییس ښاغلی نور دا هم ویلی، چې دغه ائتلاف به په راتلوونکیو پارلمانی، ولسوالیو شوراګانو او ولسمشریزو ټاکنو کې هم یو مهم رول ولوبوي.

د افغانستان د ستر ملي ائتلاف فعال غړی رحمت الله بیژن پور وایي: دغه روان ریاستي نظام په خواشینۍ، چې سترې ستونزې رامنځته کړې دي. باید یو نامتمرکزه نظام را منځته شي.           

د جنرال عبدالرشید دوستم د دفتر رییس عنایت الله بابر د دې ائتلاف د جوړیدو خبر او ډله ییز انځور انلاین خپور کړی دی.

د ولسمشر لومړی مرستیال جنرال عبدالرشید دوستم، د جمعیت ګوند اجرائیه رییس عطا محمد نور، پخوانی مرستیال ولسمشر احمد ضیا مسعود او د ولسی جرګې ځینې برحاله غړي په انځور کې لیدل کیږي.

ده په دې اړه جزئیات نه دي ورکړي.

د مدني ټولنو د شبکې رییس عزیز رفیعي وایي د خواشینۍ ځای دی، چې په افغانستان کې یو مدون سیاست رامنځته نشو؛ هر څه، چې رامنځته کیږي غبرګوني بڼه لري. لکه په دې وروستیو کې د تذکرو د وېش او د ائتلاف بحث.  

د ولسي جرګې د کورني امنیت کمیسیون رییس اقبال ساپی وایي: زه فکر کړم، چې دغو ائتلافونو په تېر کې کومه د ډاډ وړ پایله نه لرله او اوس به یې هم ونلري او نه خلک پرې باور کولی شي.           

په دې ائتلاف کې زیاتره سیاسي څېرې شتون لري یا واک کې شریک دي، چې له ملي وحدت حکومت سره د کار تجربه لري، خو تل یې له دې امله نیوکې کړي، چې په وینا یې واک ډېر انحصار شوی دی.

خبریال: باعث حیات