له طالبانو سره د سولې هوکړه اوس لاسلیک ته چمتو شوې؛ خو د امریکا د بهرنیو چارو وزیر نه غواړي، چې هوکړه لیک لاسلیک کړي.

تایم امریکایي مجلې په امریکا، افغانستان او اروپا کې د با خبره سرچینو له قوله وایي؛ مایک پمپیو لیوال ندی، چې پر دغې هوکړې لاسلیک وکړي، ځکه طالبان د سولې هوکړې ته ډېر ژمن نه ښکاري.

د تایم د څرګندونو له مخې؛ د دې هوکړې د له منځه تلو وېره ده او دا، چې طالبان ورته ژمن ندي، نو دا هغه څه دي، چې مایک پمپیو یې زړه نازړه کړی دی.

ښایي همدا موارد وي، چې ناتو غواړي د افغانستان د سولې په تړاو ورو ګام واخلي.

د ناتو سرمنشي ینس ستولتنبرګ ویلي، د سولې هوکړې او لاسته راوړنو په تړاو باید محتاطانه عمل وشي او ناتو د یوې سیاسي حل لارې تر پیدا کیدو پورې په افغانستان کې حضور لري.  

د نوموړي د څرګندونو له مخې؛ د ترلاسه شوې هوکړې په تړاو باید  په ګمانونو او احتمالاتو کې محتاط وو؛ ځکه ناتو یوې سیاسي حل لارې ته  په پیاوړې توګه هڅه کوي. باید په یاد ولرو، چې ناتو په افغانستان کې یوې سیاسي حل لارې ته د شرایط  تر برابر ولو حضور لري.

امریکا طالبانو ته خبرداری رسولی، چې یا له حکومت سره روغه وکړي او یا هم درندې جګړې ته چمتو شي؛ خو ټول دا حالات د حکومت په مزاج ښه ندي لګیدلي.

ارګ  له طالبانو سره د سولې هوکړې په تړاو وېره  لري.

د ولسمشر غني جګپوړي سلاکار د بېړنۍ هوکړې د ناوړه عواقبو په تړاو خبرداری ورکړی او وایي، حکومت نه غواړي تېره سناریو تکرار شي.

د ولسمشر د ستراتیژيکو اړیکو جګپوړی سلاکار وحید عمر له طالبانو سره د امریکا د سولې د مسودې په اړه اندېښنه ښیي او وايي، خلکو په تېرو کې د بېړنیو معاملو بیه ورکړې ده.

د سیمې هېوادونه هم متوجه شوي، چې د افغانستان د سولې بهیر حساس پړاو ته رسیدلی او په دې خاطر غواړي، چې ځانونه  نړۍ ته د افغانستان ملاتړي وښیي.

 تازه نوي ډیلي د افغانستان سولې بهیر ملاتړ لپاره لستوڼي بډ وهلي دي.

د هند لومړی وزیر نریندرا مودي وایي، چې روسیې او هند افغانستان ته سوله راوړې. هند د یوه پرمختللي او با ثبات افغانستان غوښتونکی دی. مونږ له افغانستان سره د نږدې او پیاوړیو اړیکو غوښتنه لرو.

دا په داسې حال کې ده، چې د امریکا او طالبانو تر منځ د نهم پړاو خبرو د سولې هوکړه تایید ته په تمه ده او اټکل دا دی، چې د سولې له دې هوکړې سره به تاوتریخوالی کم، زرګونه امریکایي سرتېري به ووځي او د طالبانو او افغان حکومت تر منځ به د سولې خبرې پیل شي.