د بهرنیو چارو وزارت سیاسي مرستیال پاکستان ته د افغان سوداګریزو محصولاتو د صادراتو په برخه کې پر شته ستونزو اندېښنه وښوده او څرګندوي؛ پاکستان باید د میوو او سبزیو د حاصلاتو په موسم کې د افغانستان سوداګریزې لارې بندې نکړي؛ ځکه، چې افغانستان هم کولی شي منځنۍ آسیا ته د پاکستان د ټرانزیټ لار بنده کړي.

په لوګر ولایت کې د تازه میوو او سابو د سوداګرو د ستونزو د اوریدو غونډې ته د بهرنیو چارو وزارت سیاسي مرستیال شېر محمد عباس ستانکزي ویلي، چې پاکستان دې د افغانستان سوداګریزې لارې نه بندوي؛ ځکه، چې افغانستان هم د منځنۍ آسیا لپاره د پاکستان ټرانزیټي لار تړلی شي.

د افغانستان او پاکستان په اړیکو کې ترینګلتیا نوې خبره نده؛ خو دا لومړی ځل دی، چې افغان حکومت په ټرانزیټي برخه کې د اسلام‌آباد د نه همکارۍ په غبرګون کې منځنۍ آسیا ته د پاکستان د ټرانزیټي لارې د تړلو خبرداری ورکوي.

عباس ستانکزي له پاکستان څخه وغوښتل، چې د افغانستان د مېوو او سبزیجاتو د حاصلاتو په موسم کې دې سوداګریزې لارې نه بندوي، چې د افغان سوداګرو محصولات د پاکستان خلکو ته ورسیږي؛ ځکه د لارې تړل د دواړو هېوادونو په ګټه ندي.

د صنایعو او سوداګرۍ وزارت مرستیال احمدالله زاهد وايي، هڅه کوي د صادراتو پر وړاندې پراته خنډونه لرې کړي؛ ځکه اقتصادي ځان بسیاینه د اسلامي امارت لومړیتوب دی.

د افغان سوداګرو پر مخ د مېوو او سابو د سوداګریزو لارو تړل، د پاکستان لخوا د ګمرکي تعرفو لوړېدل او د دواړو هېوادونو ترمنځ د سوداګریزو تړونونو نه مراعات د دې لامل شوي، چې د روان کال په لومړیو پېنځه میاشتو کې پاکستان ته د افغانستان صادرات لس سلنه کم شي.

د ریاست الوزراء سیاسي مرستیال د وچې مېوې له یو شمېر سوداګرو سره په لیدنه کې ویلي، چې اسلامي امارت به له هندي چارواکو سره د ویزو د ورکړې په برخه کې د ستونزو پر حل خبرې وکړي.

په دې کتنه کې،‌ چې د چارشنبې پر ورځ ترسره شوې مولوي عبدالکبیر زیاته کړې، چې ګاونډ هېوادونه باید د افغان سوداګرو پر وړاندې د ستونزو د رامنځته کولو مخه ونیسي او د دوه اړخیزې سوداګرۍ د ودې لپاره لازمې اسانتیاوې برابرې کړي.

ویل کیږي، د وچې مېوې سوداګرو ته به د اسلامي امارت له تګلارې سره سم ځمکې ځانګړې او اسانتیاوې برابرې شي.

د روسيې بهرنيو چارو وزارت وياندې ویلي، چې د مسکو د شپږمې غونډې لومړيتوب د ملي پخلاينې د بهير اسانه کول، له کابل سره د سيمې د هېوادونو د همکاريو پراخول، په سياسي، اقتصادي ډګرونو کې له مخدره توکو او تروريزم سره مبارزه ده.

د افغانستان په اړه د مسکو شپږمه غونډه سبا (جمعه د تلې دیارلسمه / د اوکټوبر څلورمه ) د روسیې، هند، ایران، قزاقستان، قرغزستان، چین، پاکستان، تاجکستان، ترکمنستان، ازبکستان او افغانستان د استازو په ګډون په مسکو کې جوړېږي.

د روسیې بهرنیو چارو وزارت ویاندې ماریا زخارووا د چارشنبې پر ورځ په یوه خبري غونډه کې ویلي، چې د غونډې اصلي برخه به د تړلو دروازو تر شا جوړه شي او په کې به د روسیې بهرنیو چارو وزیر سرګي لاوروف وینا وکړي.

زخارووا زیاته کړې؛ لاوروف به د دې ناستې په څنډه کې د افغانستان اسلامي امارت د بهرنیو چارو وزارت له چارسمبالي امیرخان متقي سره هم وګوري او د دوه اړخیزو همکاریو پر اړینو مسایلو به خبرې وکړي.

د یادونې ده، چې امیر خان متقي  د چارشنبې پر ورځ د یوه پلاوي پر مشرۍ د مسکو په شپږمه غونډه کې د ګډون لپاره روسیې ته ولاړ.