د افغانستان اسلامي امارت د کورنیو چارو وزارت چارسمبالي(سرپرست) سراج الدین حقاني په کابل کې د چین او پاکستان له ځانګړو استازو سره ولیدل.

د کورنیو چارو وزارت د رسنیزې خبرپاڼې له مخې، چې نن (یکشنبه) خپره شوې؛ دا غونډه د افغانستان، چین او پاکستان د بهرنیو چارو وزیرانو د پېنځمې غونډې د پایلې په توګه، د دوی د راتلونکې غونډې لپاره چمتووالی او همدارنګه د درې‌واړو هېوادونو ترمنځ د سیاسي او اقتصادي همکاریو د پیاوړتیا لپاره جوړه شوې وه.

په دې غونډه کې سراج الدین حقاني د سیمه‌ییزو اړیکو د پراختیا پر اهمیت ټینګار وکړ او څرګندوي، چې د افغانستان اسلامي امارت د متقابل درناوي پر بنسټ په سیاسي او اقتصادي برخو کې د سیمه‌ییزې همغږۍ او همکارۍ غوښتنه کوي.

د چین او پاکستان ځانګړو استازو په داسې حال کې، چې له افغانستان سره د اړیکو د پراختیا لپاره یې خپلې ژمنې بیا تازه کړې؛ هوکړه وکړه، چې د درې‌واړو هېوادونو د بهرنیو چارو وزیرانو شپږمه غونډه به هم په کابل کې ترسره شي.

د بهرنیو چارو وزارت چارسمبالي( سرپرست) د ډیپلوماسۍ له ځانګړو زدکړو څخه د یو شمېر دولتي کارمندانو د فراغت په مراسمو کې هغو ته سپارښتنه وکړه، چې پخپل قلم او څرګندونو د هېوادونو له اغېرمنولو ډډه وکړئ.  

امیر خان متقي په دې مراسمو کې خبرداری ورکړی، چې دا ډول څرګندونې به نظام ته زیان ورسوي.

هغه وایي: “هڅه وکړئ، چې له خپل قلم سره احتیاط وکړئ. له خپلې ژبې سره احتیاط وکړئ، چې نه مسلمان، نه ګاونډی، نه کوم هېواد ترې اغېزمن شي، نه نظام ته زیان ورسیږي او نه هم خپله زیان ووینئ. ځینې ​​وختونه داسې ګوزارونه کیږي، چې بېرته خپله همدې کس ته راګرځي. تاسې باید پدې اړه ډېر احتیاط وکړئ. هر څه، چې وایئ، باید فکر پرې وکړئ، چې آیا دا په اسلام کې جواز لري؟ “آیا بل مسلمان ته زیان نه رسوي؟”

امیر خان متقي همدارنګه ټینګار وکړ، چې که د ساینس په برخه کې بنسټیز ګامونه پورته نشي؛ افغانستان به پرمختګ ونکړي.

هغه وایي: “که مونږ د ساینس په ډګر کې پرمختګ ونکړو، که ځانونه پوه او خبر نکړو، که خواري ونکړو، که د نړۍ له اوضاع خبر نشو، که د خپل وطن پرنزاکتونو ونه‌پوهیږو، که د خپل تېر تاریخ په اړه پوه نشو؛ نشو کولی خپل راتلونکی جوړکړو. مونږ په خپل کور کې ډېر کار ته اړتیا لرو او هره برخه یو مسلکي کس ته اړتیا لري. که تاسې خپله ټوله کورنۍ راټوله کړئ؛ وبه نشئ کولی د یو پر تبې د اخته ماشوم درملنه وکړئ. تر هغې، چې ډاکټر ته ورنشئ. تاسې نشئ کولی یو ګروپ جوړ کړئ، جامې جوړې کړئ؛ ځکه، نو هر هنر خپل مسلکي کسان غواړي او دا ټولنه ورته اړتیا لري.”

د بهرنیو چارو وزارت چارسمبالي په دې مراسمو کې له فارغانو وغوښتل، چې د خپلې علمي کچې د لوړولو لپاره هڅه وکړي او د افغانستان تېر بدلونونه او موجوده نزاکتونه له په پام کې نیولو سره د افغانستان راتلونکې د پرمختګ او ترقۍ پر لوري رهبري کړئ.