Connect with us

تازه خبرونه

حامد کرزي له ولسمشر غني غوښتي، چې د سولې مشورتي جرګه وځنډوي

Ariana News

خپور شوی

 په

(Last Updated On: April 27, 2019)

پخواني ولسمشر حامد کرزي د شنبې پر ورځ( د ۱۳۹۸ لمریز کال د غویی پر ۷) په یوه اعلامیه کې په ډاګه کړې، چې ولسمشر اشرف غني دې د سولې مشورتې جرګې تر سره کول وځنډوي، چې د سولې پر روانو خبرو ناوړه اغېز رامنځته نکړي.  

نوموړي څرګنده کړې؛ ما د یوه هېواد وال په توګه تل د عنعنوي او مشورتي لویو جرګو له لارې ملي اجماع ته د رسیدو غږ پورته کړی؛ خو د سولې مشورتي جرګه، چې ټاکل شوې په روانه اوونۍ کې د حکومت لخوا جوړه او ترسره شي د لاندې دلایلو له مخې یې د خلکو په ګټه نه بولم او نه یې یوې ملي اجماع ته د رسیدو لار ګڼم:

۱- د هېواد په تاریخ کې جرګې پر اجماع  پیل او پای ته رسیدلي؛ خو د سولې جوړیدونکې مشورتي جرګه پر اجماع پیل شوې نده؛ ځکه نه د حکومت په دننه کې د نظر یوالی ښکاري او نه هم د سیاسي ځواکونو، قومي مشرانو، دیني عالمانو او مدني مخکښانو له هرکلي سره مخ شوې ده.  

۲- د سولې جرګه باید ډاډمنه فضا رامنځ ته کړي او د سولې له رامنځته کیدو سره مرسته وکړي. د سولې مشورتي جرګې جوړیدل په داسې حال کې، چې( د طالبانو اسلامي تحریک) ورسره مخالفت څرګند کړی؛ د سولې خبرو له غزولو سره نه یوازې مرسته نکوي، بلکې رامنځته شوی باور به هم زیانمن کړي.

۳-  ما د ۱۳۹۶ کال د تلې پر ۱۸ ولسمشر اشرف غني ته په یوه لیک کې د همغږۍ او د سولې د رامنځته کولو لپاره د عنعنوي لویې جرګې د جوړولو وړاندیز کړی و. هغه مهال د سولې روانې خبرې نه وې پیل شوې؛ خو نن د افغانانو د سولې خپلمنځي او نړیوالې خبرې نه یوازې پیل شوي، بلکې د افغانستان د سولې په اړه یې پرمختګونه هم رامنځته کړي دي.

ملي ګټې او د سولې اړتیا له مونږ غواړي، چې د سولې روانې خبرې چټکې او وغزوو او د افغانستان خلک له ملي او ځاني زیانونو وژغورو.

ښاغلي حامد کرزي دا وېره هم په ډاګه کړې، چې الله مکړه جوړیدونکې مشورتي جرګه د سولې روان بهیر خراب او یا ونه ځنډوي. ښه به داوي، چې لویه جرګه له خپلمنځي خبرو وروسته جوړه شي او ټول ولس یې پر پایلو د تائید غږ پورته کړي.

دغه راز نوموړي د سولې مشورتي جرګې له رابلل شویو ګډونوالو هم هیله کړې؛ ډېر ژر به په یوه داسې لویې جرګې کې ګډون وکړو، چې مونږ د افغانستان ټول خلک د سولې په اړه هوکړې ومنو او د هېواد د آبادۍ، پر منختګ او هوساینې لپاره همغږي شو.

د یادونې ده، چې حکومت د دغه وړاندیز په اړه تر دې دمه څه ندي ویلي.

 

تازه خبرونه

په کابل کې له دوه بېلابېلوچاودنو ۲ پولیس وژل شوي او ۴ نور ټپیان دي

Ariana News

خپور شوی

په

توسط

(Last Updated On: January 27, 2021)

په کابل ښار کې د چارشنبې پر سهار د پولیسو پر دوه رنجر موټرو دوه بېلابېلې چاودنې رامنځته شوي؛ دوه ملي پولیس وژل شوي او څلور نور ټپیان دي.

د پولیسو د څرګندونو له مخې؛ لومړۍ چاودنه نن سهار شاوخوا ۸:۰۴ د کابل ښار د ۱۵ ناحیې د دسپېچري په سیمه کې د ملي پولیسو پر یو رینجر موټر رامنځته شوې ده.

پولیس وایي، چی دوه پولیس لږ څه ټپیان شوي دي.

دوه یمه چاودنه ۹:۳۲ د ښار د ۱۲ ناحیې د سلیم کاروان په سیمه کې د پولیسو پر رینجر رامنځته شوې، چې په کې لږ تر لږه دوه پولیس وژل شوي او دوه نور ټپیان دي.

تر دې دمه هیچا د دغو چاودنو مسوولیت پر غاړه ندی اخیستی.

Continue Reading

تازه خبرونه

د ایټالیا دفاع وزیر او اشرف غني په کابل کې پر امنیت او دوه اړخیزو اړیکو خبرې کړي

Ariana News

خپور شوی

په

توسط

(Last Updated On: January 27, 2021)

د ایټالیا دفاع وزیر لورنزو ګویرین تېره ورځ کابل ته راغی او له ولسمشر اشرف غني، د ملي پخلاینې عالی شورا له مشرعبدالله عبدالله او د ملي امنیت سلاکار حمد الله محب سره یې ولیدل.

له افغان مشرانو سره په لیدنه کې  د سولې پر بهیر، دوه اړخیزو اړیکو او په افغانستان کې د دې هېواد پر پوځي شتون خبرې اترې تر سره شوې.   

ارګ په ډاګه کړې، چې په دې کتنه کې دواړو لوریو د تاوتریخوالي پر زیاتوالي او هدفمندو ترورونو اندېښنه وښوده او د تاوتریخوالي د سملاسي پای ته رسېدو غوښتونکي شول.

نوموړي د تروریزم پر وړاندې د افغان امنیتي او دفاعي ځواکونو سرښندنه او میړانه وستایله او په ډاګه یې کړه، چې ایټالیا د سوله ییز، متحد او ډیموکراټیک افغانستان ملاتړ کوي.

لورنزو ګویرین زیاته کړې؛ له افغانستان سره په بېلابېلو برخو کې د ایټالیا مرستې او د پرېکنده ملاتړ ماموریت په چوکاټ کې د دغه هېواد د ځواکونو حضور، پخپل ځای دی.

د ارګ د څرګندونوله مخې: ولسمشر غني د ایټالیا دفاع وزیر ته د ښه راغلاست تر څنګ د یاد هېواد له اصولي دریځه مننه وکړه او څرکندويو چې افغانان او نړۍ په یو غږ د تاوتریخوالي د بندېدو غوښتونکي دي او طالبان باید دا وپوهیږي، چې د تاوتریخوالي پر دېرولو به یې افغانان او نړۍ پر ضد نور هم یو موټی شي.

د یادونې ده، چې  په دې کتنه کې اشرف غني د افغانستان د انکشافي او اقتصادي برنامو په ځانګړي توګه خواف-هرات اوسپنیزه کرښې پروژې د څلورمې برخې له تمویل څخه د ایټالیا د ملاتړ او د پرېکنده ملاتړ ماموریت په چوکاټ کې د دغه هېواد له مرستو مننه وکړه.

Continue Reading

تازه خبرونه

ولسمشر غني او بابېل ګیتس په افغانستان کې پر پولیو وغږېدل

Ariana News

خپور شوی

په

توسط

(Last Updated On: January 26, 2021)

افغان ولسمشر اشرف غني د مایکروسافت شرکت او د بیل او ملینډا ګېټس له بنسټوال سره د ویډیویي کنفرانس له لارې په افغانستان کې د پولیو یا د ماشومانو له ګوزن سره پر مبارزه خبرې وکړې.

د ارګ په خبرپاڼه کې راغلي؛ دواړو لوریو اندېښنه څرګنده کړې، چې تېر میلادي کال په افغانستان کې د پولیو مثبتې پېښې څو برابره وې؛ ځکه  طالبانو تر خپلې څارنې لاندې سیمو کې د پولیو واکسین  کارکوونکیو ته اجازه نه ورکوله.

په دې ویډیویي کنفرانس کې د پولیو واکسین د پلي کېدو په بهیر کې د اصلاحاتو پر رامنځته کولو او د امکاناتو پر زیاتوالي هم هر اړخیز بحث او خبرې شوې دي.

دا په داسې حال کې ده، چې د عامې روغتیا وزارت څو ورځې مخکې ویلي وه، چې د طالبانو د مخالفت له کبله په یو شمېر ولایتونو کې له درې نیم  میلیون ډېر ماشومان د ګوزڼ پر ضد له واکسین پاتې شوي دي.

د روغتیا وزارت څرګندوي، چې طالبانو د دوی په تر کنټرول لاندې سیمو کې د کور پر کور د واکسین کمپاین بند کړی او په تېرو درې کلونو کې دغه مخالفت له ۳ سلنې څخه ۱۰ سلنې ډېر شوی دی.

د دغه وزارت د ګوز ڼ ناروغۍ د له منځه وړلو پروګرام مشر میرجان راسخ ویلي، چې که څه هم طالبانو د واکسین په پلي کولو کې د همکارۍ ژمنه کړې وه؛ خو د تمې خلاف دوی د دې بهیر د پلي کیدو مخه نیولې.

نوموړي زیاته کړې: په پکتیا او میدان وردګ ولایتونو کې هم ماشومانو د ګوزڼ له واکسینه پاتې دي.

تېره اوونۍ ، په افغانستان کې د ګوزڼ واکسین کمپاین پیل شوی؛ خو طالبانو نه یوازې د دغه بهیر په پلي کولو کې پاتې راغلي، بلکې په میدان وردګ، غزني، هلمند، کندهار، کندوز، تخار، پکتیکا او پکتیا ولایتونو کې هم د کور پر کور له کمپاین سره مخالفت کړی دی.

Continue Reading

Trending

Copyright © 2021 Ariana News. All rights reserved!