Connect with us

تازه خبرونه

طالب زندانیانو حکومت ته له لیکلي ضمانت ورکولو ډډه وکړه

خپور شوی

د

(Last Updated On: کب ۲۵, ۱۳۹۸)

طالب زندانیان حکومت ته دا ضمانت نه ورکوي، چې له خوشې کیدو وروسته به د جګړې کرښو ته نه ستنیږي.

د ملي امنیت شورا ويلي تر هغې، چې طالب زندانیان د جګړې کرښو ته د نه ستنیدو په اړه لیکلي ضمانتونه ورنکړي، یو زندانې به هم خوشې نکړي.

د ملي امنیت شورا ټينګار کړی، چې له لیکل شوې ژمنې پرته به هیڅ طالب زنداني خوشې نکړي.

د ملي امنیت شورا ویاند جاوید فیصل څرګنده کړې، چې د افغانستان دولت د سولې هڅو ته د لوري ورکولو په موخه یو میکانیزم جوړ کړی او د بندیانو پر خوشې کیدو راڅرخي او مونږ غواړو هغه کسان، چې د سولې تر سرلیک لاندې آزادیږي؛ باید بیا جګړې ته ورونګرزي.

طالب چارواکي بیا ټینګار کوي؛ له امریکا سره د شوې هوکړې له مخې باید پېنځه زره طالب زندانیان په یوه وار له زندانه خوشې شي، چې د افغانانو خپلمنځي خبرو ته زمینه برابره شي.

د طالبانو د څرګندونو له مخې؛ حکومت غواړي په ۴ میاشتو کې پېنځه زره طالب زندانیان خوشې کړي، چې دا له شوې هوکړې څخه ښکاره سرغړونه ده.

د طالبانو د واکمنۍ لوی څارنوال جلال الدین شینواري په ډاګه کړې، چې حکومت د طالب زندانیاو د خوشې کولو لپاره څلور میاشتنی پروګرام لري. حکومت غواړي دغه بهیر وننګوي او زیانمن یې کړي.

اسلام آباد هم له طالبانو او امریکایانو غواړي، چې تر سره شوې هوکړې ته درناوی وکړي او د افغانستان خلک د خبرو له لارې پخپلو غوښتنو برلاسي شي.

د پاکستان د بهرنیو چارو وزیر محمود قریشي وایي: زه فکر کوم، چې طالبان هوښیار دي. هغو د دې ترڅنګ، چې ښه جنګیالي دي؛ غوره مذاکره کوونکي هم دي. ان مخکې له دې، چې خبرې پیل شي؛ پر واقعیتونه وپوهیدل. دوی همدا اوس د افغانستان ۴۵ په سلو کې خاوره تر خپلې څارنې لاندې لري او دا  یو واقعیت دی او تاسې باید واقعیتونه ومنئ.  

په کابل ښار کې یو شمېر مدني هڅاندو د طالبانو له خوشې کیدو سره په داسې حال کې خپل مخالفت اعلام کړ، چې ورسره د سولې ټولې خبرې تړلې دي.

د ملي پیوستون ګوند یا حزب همبستگی ملي ویاندې سیلۍ غفار څرګنده کړې؛ طالبان په افغانستان کې د دیمو کراسۍ د تېرو دوه لسیزو وژونکي دي، چې د میلیونونو افغانانو وینې یې بیولي دي. د دغو کسانو خوشې کول به د شهیدانو پر وینو ملنډې وي.

ټاکل شوې وه، چې د شنبې پر ورځ د کب پر ۲۴  حکومت ۱۰۰ طالب زندایان د خپل مهالوېش له مخې خوشې کړي. ولسمشر غني تېره اوونۍ د ۱۵۰۰ بندیانو د خوشې کولو فرمان ورکړ او په ډاګه یې کړه، چې ۳۵۰۰ نور به له خپمنځي خبرو وروسته خوشې شي؛ خو طالبانو دغه مهالوېش رد کړ او له امریکایانو سره د هوکړې له مخې یې د ۵۰۰۰ بندیانو د خوشې کولو غوښتنه بیا وکړه. 

تازه خبرونه

په بیجینګ کې د چین او افغانستان درېیمه اقتصادي ناسته تر سره شوه  

Published

on

(Last Updated On: وری ۳۰, ۱۴۰۳)

په بیجينګ کې د افغانستان اسلامي امارت او د چين ولسي جمهوريت د بهرنيو چارو وزارتونو د اړوند سياسي څانګو پر مشرۍ د بشري مرستو او اقتصادي بيارغونې پر ميکانيزمونو درېيمه ناسته ترسره شوه.

د افغانستان بهرنیو چارو وزارت ویاند عبدالقهار بلخي په ایکس پاڼه کې لیکلي، چې په دې ناسته کې د افغانستان د بهرنيو چارو وزارت پر استازیو سربېره د صنعت او سوداګرۍ، کانونو او پټروليم، د کډوالو او بېرته راستنېدونکیو چارو او د طبيعي پېښو پر وړاندې د امارت وزارت استازو ګډون کړی و.

دغه راز په دې ناسته کې د چين د سوداګرۍ، طبيعي سرچينو، د چين نړيوالې پراختيايي ادارې او نړيوالې همکارۍ ادارو استازو هم برخه اخیستې وه.

د بهرنیو چارو وزارت د څرګندونو له مخې؛ په دې ناسته کې له تېرو دوه نيمو کلونو راپدیخوا د طبيعي پېښو، جبري راستانه شویو کډوالو او روغتيا په برخه کې د مرستو پر میکانیزمونو بیا کتنه وشوه.

 افغان پلاوي د چين د مرستو د ګټورتوب لپاره خپل وړانديزونه او سلا مشورې چينايي اړوند لوري ته وړاندې کړل.

چينايي لوري ژمنه کړې، چې له افغانستان سره به د چين بشري مرستې د افغان لوري د اړتياوو او لومړيتوبونو له پام کې نيولو سره تنظيم کړي. دغه راز به له افغانستان سره د جبري راستانه شویو کډوالو د مېشتېدو په برخه کې د چين د سل میلیون يوانو په مرستو کې د افغان لوري وړانديزونه هم په پام کې ونيول شي.

د چين سره صليب ټولنې ژمنه کړې، چې په چين کې به د افغان ماشومانو د زړه ناروغيو د درملنې د بيا پيل زمينه هم برابره کړي.

د عبدالقهار بلخي د څرګندونو له مخې؛ د افغانستان د اقتصادي بيارغونې ميکانيزم په چوکاټ کې د دواړو هېوادونو ترمنځ د سوداګرۍ پر زياتوالي په ځانګړي توګه چين ته د زیاتو افغان توکو د صادرولو د زمينې برابرولو، وړتیا لوړونې او په افغانستان کې د کانونو او معاصرې سوداګرۍ په برخه کې د چين د پانګونې د فرصتونو په اړه هر اړخیزې خبرې وشوې.

دواړو لوريو چين ته د افغانستان د جلغوزو له صادراتو وروسته د انارو د صادراتو زمينې د برابرولو د هرکلی ترڅنګ په افغانستان کې د نفتو د استخراج کچې لوړولو او د لوګر مس عینک کان د استخراج د پيلولو په برخه کې د وروستيو پرمختګونو په اړه خبرې وکړې او ټينګار وشو، چې د چارو د چټکتيا پر طرحو به غور وشي.

افغان لوري د چين پر ملاتړ د افغانستان د حکومت په ګڼو وزارتونو او ادارو کې د ملکي مامورينو د وړتیا لوړونې لپاره له روزنيزو پروګرامونو او افغانانو ته د سکالرشپونو د لړۍ له پراخولو هرکلی وکړ.

ویل کیږي، چې په دې ناسته کې د واخان اقتصادي دهلیز د اهميت او احتمالي ګټو او د دې کوريډور د پرانيستو پر امکاناتو هم بحثونه شوي دي.

Continue Reading

تازه خبرونه

د کورنيو توليداتو د کيفيت او صنعتي ودې لپاره دې هڅې ګړندۍ شي – مولوي عبدالکبير

Published

on

(Last Updated On: وری ۲۹, ۱۴۰۳)

د ریاست الوزراء سياسي مرستیال مولوي عبدالکبير د سې شنبې پر ورځ ( د وري اته‌ویشتمه ) په سپېدار ماڼۍ کې د صنعت او سوداګرۍ وزارت له چارسمبالي نورالدين عزيزي سره وکتل.

نورالدین عزيزي ويلي، له ګاونډ هېوادونو سره ښې سوداګريزې اړيکې د دې لامل شوي، چې په هېواد کې دننه بيې په ښه حالت کې پاتې شي او د لارو بندېدا به پر بازار منفي اغېز ونکړي.

عزیزي زیاته کړې؛ د صنعت او سوداګرۍ وزارت له خصوصي سکټور سره همکار دی، چې له اغېزې یې خصوصي سکتور هم په سمه توګه فعالیت کوي او اسلامي امارت ورته لازمې اسانتیاوې برابرې کړې دي.

د نوموړي د څرګندونو له مخې؛ د اسلامي امارت د ښې اقتصادي پالیسۍ پر بنسټ د سیمې له هېوادونو سره په صادراتو او وارداتو کې د پام وړ پرمختګونه شوي دي. همدارنګه د افغانستان محصولات د منځنۍ آسیا په هېوادونو کې ښه بازار لري او د بازار موندنې لپاره یې په نورو بازارونو کې هم نندارتونونه جوړ کړي دي.

دغه راز مولوي عبدالکبیر د سوداګرۍ او صنایعو وزارت د رهبرۍ له هڅو ستاینه وکړه او څرګندوي: د امارتي ادارو بې‌سارې هڅې او د افغانۍ د بیې ثبات د دې لامل شوی، چې د خوراکي توکو بیې په ټیټه بیه کې پاتې شي او خلک مو د اړینو توکو د پیرودلو وس ولري.

مولوي عبدالکبیر له ګاونډ هېوادونو سره په سوداګرۍ کې د انډول پر ساتلو د ټینګار ترڅنګ زیاته کړې، چې د کورنیو تولیداتو د ښه کیفیت او د صنعت د ودې او پراختیا په برخه کې باید نورې هڅې هم وشي.

Continue Reading

تازه خبرونه

روسیې او تاجکستان د افغانستان پولې ته نږدې ګډ پوځي تمرینات پیل کړل

Published

on

(Last Updated On: وری ۲۹, ۱۴۰۳)

د روسيې دفاع وزارت په خبرپاڼه کې راغلي؛ دغه پوځي روزنیزې هڅې د اپرېل پر پنځلسمه پيل شوي او د اپرېل تر اتلسمې به روانې وي، چې د ترسره کېدو موخه يې له ناقانونه وسلهوالو ډلو سره د مبارزې او د دولتي پولو ساتنه ده.

د روسيې دفاع وزارت زیاته کړې: د دغو پوځي روزنیزو هڅو د پرانستلو مراسم د تاجکستان د ختلان سيمې د خرب – میدون په غرنۍ دښته کې ترسره شول. دا دوه اړخیزې روزنیزې هڅې به د اپریل له پېنځلسمې څخه تر اتلسمې پورې روانې وي.

د روسیې دفاع وزارت ویلي، چې په دغو ګډو هحو کې د ترهګرو ډلو د له منځه وړلو لپاره د وسله‌والو ځواکونو د کارولو تنظیم، په غرنیو شرایطو کې د دندو د ترسره کولو لپاره د ځواکونو چمتو کول او د روزنې او عملي تجربې موضوع شامله ده. د روسیې پوځي ډله، چې په هڅو کې برخه اخلي په ټولیزه توګه په تاجکستان کې میشت د ۲۰۱ پوځي اډې سرتېري دي، چې د دې هېواد له پولو بهر د روسیې ترټولو لویه پوځي اډه ده.

د ګډ امنیتي تړون ټولنې غړي هېوادونه له افغانستان څخه د ګواښونو پر زیاتوالي اندېښمن دي او د دغو ګواښونو د مخنیوي لپاره پر همکارۍ ټینګار کوي. تاجکستان، قزاقستان، قرغزستان، ارمنستان، بیلاروس او روسیه د ډله ییز امنیتي تړون غړي دي.

په افغانستان کې له ۲۰۲۱ کال راپدیخوا روسیې او تاجکستان د لومړي ځل لپاره له افغانستان سره پولې ته څېرمه ګډ تمرینونه وکړل.

په ورته وخت کې اسلامي امارت د هېوادونو اندېښنې بې بنسټه بولي او وايي، چې د افغانستان خاوره به د هېڅ هېواد پر ضد ونه*کارول شي.

Continue Reading

Trending

Copyright © 2022 Ariana News. All rights reserved!