د پکتیکا په برمل ولسوالې کې ښوونځي نشته؛ زدکوونکي د پولې هغې خوا زدکړې کوي

د پکتیکا ولایت د برمل ولسوالۍ اوسیدونکي وايي؛ د ښوونځیو نشتون دوی دې ته اړ کړي، چې زدکوونکي د دیورند فرضي کرښې هغې خوا د پاکستان تر بیرغ لاندې زدکړې وکړي.

دوی زیاتوي، چې له تېرو اتلس کلونو راپدیخوا حکومت په دې ولسوالۍ کې پوهنې ته پاملرنه نده کړې.

مبارز افغان، د یادې ولسوالۍ اوسیدونکی وايي؛ دوې د تعلیم لپاره هیڅ راز آسانتیاوې نلري او هلته یوازې درې ښوونځي شته، چې د بهرنیانو لخوا جوړ شوي  او اوس هغه هم بیارغونې ته اړتیا لري.

له بلې خوا د پکتیکا د پوهنې ریاست مسوولین وايي؛ سږکال یې په برمل ولسوالۍ کې څلور ښوونځي، چې دمخه تړلي وه، د زدکوونکیو پرمخ خلاص کړي او په راتلونکي کال کې به د زدکوونکیو لپاره اوس ډېرې آسانتیاوې برابرې کړي.

د سیمې مشران وايي، که حکومت ورته په دې ولسوالۍ کې د ماشومانو لپاره ښوونځي جوړ کړي زدکوونکي به یې دې ته اړ نه وي، چې له کرښې هغې غاړې ته د زدکړو زیار وګالي.

صابر د دغې ولسوالۍ اوسیدونکی بیا وايي، چې کتابونو او مسلکې استادانو ته هم اړتیا شته او د هغه شته استادانو معاشونه هم پر وخت سره نه ورکول کیږي.

د پکتیکا د پوهنې ریاست هم په دې ولایت کې د پوهنې په برخه کې ستونزې مني؛ خو وايي، چې سږکال یې د برمل ولسوالۍ په ګډون په ډېرو سیمو کې تړلې ښوونځي خلاص او جوړ کړي دي.

محراب الدین شفق د پکتیکا د پوهنې مشر ويلي، چې له ټولو اته ښوونځیو څځه يي سږکال ۴ ښوونخي بیا پرانیستي دي.

دې زیاتوي، چې یاده ولسوالي یوه سرحدي سیمه ده، چې وګړي یی د ورځنيو دندو لپاره د پولې هغې خوا ته تګ راتګ کوي.