Connect with us

تازه خبرونه

د ټاکنو بایومتریکي معلومات د خلکو ګډون توپیري ښيي- چارواکي

خپور شوی

د

(Last Updated On: لړم ۳, ۱۴۰۱)

د ټاکنو خپلواک کمیسیون چارواکو ویلي، چې ښايي د ولسمشریزو ټاکنو اته تر نهه سوه زره رایې باطلې شي؛ ځکه، چې اوس هم بایومتریکي معلومات په ټاکنو کې د خلکو د ګډون شمېر توپیري ښيي.

له ولسمشریزو ټاکنو څخه یوه میاشت تېریږي؛ خو اوس هم د ټاکنو خپلواک کمیسیون په دقیقه توګه نه پوهیږي، چې څومره خلکو په ټاکنو کې ګډون کړی دی.

د ټاکنو له ترسره کیدو سملاسي وروسته، د ټاکنو خپلواک کمیسیون د اټکل له مخې وویل، چې دوه میلیون و اووه سوه زره خلکو رایې کارولي دي.

وروسته یې په ډاګه کړه؛ بایومتریکي معلومات ښيي، چې یو میلیون او نهه سوه زره کسانو په ټاکنو کې ګډون کړی، خو اوس داسې شمېر وړاندې کوي، چې په ټاکنو کې د اټکل له مخې یو میلیون او اته سوه زره کسانو ګډون کړی دی.

په دې شمېر کې د یو سل و اووه دېرش زره رایو تفاوت لیدل کیږي، چې د نوماندانو او د ټاکنو خپلواک کمیسیون د غړیو لپاره هم د اندېښنې وړ ښکاري.

د ټاکنو خپلواک کمیسیون غړی مولانا عبدالله وايي، چې له درملوګ شرکت څخه یې د شمېر د تفاوت په اړه معلومات غوښتي؛ خو دغه شرکت تر اوسه معلومات ندي ورکړي.

د ټاکنو خپلواک کمیسیون غړي اورنګ زیب ويلي، چې د رایو بایومتریکي سرور یا زیرمه د درملوګ شرکت په واک کې ده؛ مونږ یوازې معیارونه وړاندې کوو او هغوی یې پلې کوي؛ نو ، ځکه دوی نشي کولی د رای ورکوونکیو دقیق شمېر په ډاګه کړي.

د دوی د څرګندونو له مخې؛ ښايي له اووه تر نهه سوه زره  بې بایومتریک رایې باطلې شي.

دا، چې ولې د بایو متریک رایو په اړه متفاوت شمېر ورکول کیږي؛ دې کار د ټاکنو څارونکي بنسټونه یې اندېښمن کړي دي.

د افغانستان د آزادو او عادلانه ټاکنو د بنسټ پروګرامونو مدیر نعیم اصغري وایي؛ په ۱۳۶ زره رایو کې توپیر لیدل کیږي؛ دغه توپیر، ځکه رامنځته شوی، چې درملوګ تکراري رایې پاکې کړې دي.

نیوکې دا دي، چې د کمیسیون او درملوک شرکت تر منځ همغږي نشته او د رایه ورکوونکو متفاوتې شمیرې د ټاکنو اعتبار تر پوښتنې لاندې راولي.

د افغانستان د رڼو ټاکنو بنسټ غړې صغرا سادات ویلي، چې د معلوماتو له وړاندې کولو داسې ښکاري، چې د کمیسیون او درملوګ شرکت تر منځ همغږي نشته.

د درملوک شرکت له پاکو رایو د ناپاکو رایو د بېلولو دنده هم پرغاړه لري، چې د رایو تر چاڼ وروسته ښايي د ټاکنو خپلواک کمیسیون وتوانیږي د رای ورکوونکیو بشپړ شمېر اعلان کړي.

دا په داسې حال کې ده، چې د ټاکنو خپلواک کمیسیون د پخواني مهالوېش له مخې؛ د ټاکنو لومړنۍ پایلې باید د تلې پر اووه ویشتمه اعلان شوې واي؛ خو اوس د ټاکنو خپلواک کمیسیون  تازه مهالوېش په ډاګه کړې، چې لومړنۍ پایلې به د لړم پر درویشتمه اعلان شي.

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!