Connect with us

تازه خبرونه

د ټاکنو کمیسیون نویو غړیو د لوړې مراسم تر سره کړل

خپور شوی

د

(Last Updated On: لړم ۳, ۱۴۰۱)

د ولسمشر اشرف غني او اجرائیه رییس عبدالله عبدالله په شتون کې د دوشنبې پر ورځ(د کب ۱۳) د ټاکنو کمیسیون نویو غړیو د لوړې مراسم تر سره کړل.

ولسمشر محمد اشرف غني د ټاکنو خپلواک کمیسیون نویو کمیشنرانو ته د لوړې په مراسمو کې وویل، چې دوی له نسبي خپلواکۍ برخمن دي او د هر ډول سرغړونې له کبله به مجازات شي.

د ښاغلي غني په باور په کار ده، چې د ټاکنو پر بهیر د خلکو بې باوري پای ته ورسیږي.

په تېرو پارلمانې ټاکنو کې، چې کومې ستونزې رامنځته شوې، د دې دواړو کمیسیونو په جوړښت کې اصلاحات راغلل او د ټاکنو قانون هم تعدیل شو.

ولسمشر د یادو مراسمو په بهیر کې څرګنده کړه؛ د نوي قانون سره سم لازمه ده، چې د دواړو کمیسیونو لپاره کمیشنران او د دارالانشاء رییسان وټاکل شي، ټاکنیزو نوماندانو ته د ولسمشرۍ د ټولو نوماندانو لخوا رایه ورکړ شوه، چې نتیجه یې نن تاسې وینئ.

هغه وایي، چې د قانون له مخې؛ د ټاکنو کمیسیون ټول غړي باید لدې وروسته له سیاسي ډلو سره خپلې اړیکې پرې کړي او له هغو سره اړیکه ساتل به ښکاره سرغړونه وي.

ولسمشر غني د دې لپاره، چې له دندې څخه د ناوړه ګټې اخیستنې او فساد مخه ونیول شي ویلي، چې دواړه کمیسیونه باید په ګډه د کمیشنرانو د قرنطین یو واضح میکانیزم جوړ کړي.

همدارنګه ولسمشر د ټاکنو کمیسیونونو په چارو کې د حکومت د نه لاسوهنې ډاډ څرګند کړ او ټینګار کوي، چې د هر راز لاسوهنو مخه به ونیول شي.

اجرائيه رييس عبدالله عبدالله بیا وايي، چې پر ټاکلي وخت د ولسمشریزو ټاکنو تر سره کیدل د سولې سره مخالفت ندی، بلکې دا د خلکو د غوښتنې منل او پر ځای کول دي.

دغه راز نوموړي له کمیشنرانو وغوښتل، چې د اساسي قانون او نورو نافذه قوانیونو له مخې دې کار کوي او د خپلې دغې لوړې له مخې به رښتینې دنده تر سره کوئ.   

دا په داسې حال کې ده، چې ولسمشر تېره ورځ په بېلابېلو څلور فرمانونو کې د ټاکنو کمیسیون نوي غړي معرفي کړل.

د دغه فرمان پر بنسټ سید عصمت الله مل، مولانا محمد عبدالله، اورنگ زیب، محمد حنیف دانشیار، مسافر قوقندي، حوا علم نورستانۍ او رحیمه ظریفي د نویو کمیشنرانو په توګه لوړه وکړه.

دغه راز محمد قاسم الیاسي، زهره بیان شینوارې، مولوي دین محمد عظیمي، محمد یونس طغرا او سید قطب‌الدین رویدار د ټاکنیزو شکایتونو د نویو کمیشنرانو په توګه د لوړې مراسم پر ځای کړل.

 ښاغلي اشرف غني حبیب الرحمن ننګ د ټاکنو خپلواک کمیسیون او چمن شاه اعتمادي د شکایتونو کمیسیون د دارالانشاء د رییسانو په توګه ټاکلي دي.

نوي ټاکل شوي کمیشنران دنده لري، چې له یوې خوا پر ټاکنیز بهیر د خلکو زیانمن شوی باور را ژوندی کړي او له بلې خوا را روانو ولسمشریزو، ولایتي او د ولسوالیو شوراګانو ټاکنو لپاره زمینه برابره کړي. دغه راز دوی د ولسي جرګې د تېرو لانجمنو ټاکنو د پایلو اعلانول هم په مخ کې لري.

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!