تازه خبرونه
د نظام الدین قیصاري پر کور عملیات د محکمې له سند پرته تر سره شوي – پلاوی
په دې برخه کې د ولسي جرګې لخوا ګمارل شوي اته کسیز پلاوي ویلي، د قیصاري پر کور د عملیاتو مشري د کورنیو چارو وزارت پخواني امنیتي مرستیال خوشحال سادات او د شاهین قول اردو قومندان ولي محمد احمدزي کوله.
د ولسي جرګې لخوا په دې اړه ګمارل شوی پلاوي ویلي، چې د قیصاري پر کور عملیات د لویې څارنوالۍ او محکمې له اجازې پرته تر سره شوي.
د ولسي جرګې د پلاوي غړی مهدي راسخ زیاته کړې؛ په ناقانونه توګه امنیتي ځواکونو د استوګڼې پر کورونو بمبارد کړی دی.
د ولسي جرګې د پلاوي غړی سید ظاهر مسرور ویلي؛ امنیتي ځواکونو د نظام الدین قیصاري کور ته له ننوتلو وروسته د هغه مالونه او شتمني لوټ کړه.
د پلاوي د څرګندونو له مخې؛ ځانګړیو ځواکونو دوه کسان، چې یو یې آشپز او بل د نظام الدین قیصاري ساتوونکی دي ژوندي نیولي او وروسته یې پر ډزو وژلي دي.
د نظام الدین قیصاري کور د لیندۍ میاشتې پر ۲۳ شپه د بلخ پولیسو کلابند کړی و.
د بلخ پولیسو قومندان محمد اجمل فایز د هغې شپې پر سبا په یوه اعلامیه کې ښکاره کړې: د قیصاري کور؛ ځکه محاصره شو، چې محکمې حکم کړی دی. هغه ځمکې غصب کړي، عامه نظم یې ګډوډ کړی او نامسوول وسلوال لري.
قومندان فایز زیاته کړې؛ د قیصاري پر کور عملیات د مرکزي چارواکو په امر تر سره شوي دي.
د قیصاري د ساتوونکیو او دولتي ځواکونو په نښتو کې اووه کسان ووژل شول، یوولس نور ټپیان دي او یو شمېر کورونه زیانمن شوي دي.
