د افغانستان لپاره د متحده عربي اماراتو ځانګړي استازي سیف محمد الکتبي د ریاست الوزراء له اقتصادي مرستیال ملا عبدالغني برادر سره په لیدنه کې اعلان وکړ، چې د دې هېواد د پانګوالو او سوداګرو یو کنفرانس به په کابل کې جوړ شي.

د اقتصادي مرستیالۍ د سې‌ شنبې د ورځې په یوه رسنیزه خبرپانه کې لیکلي، چې د محمد الکتبي د څرګندونو له مخې لیکلي؛ دا کنفرانس به د هغو پروژو په اړه بحث وکړي، چې کولی شي په افغانستان کې د اقتصادي ودې لپاره لار اواره کړي.

د دغې خبرپاڼې له مخې؛ محمد الکتبي د افغانستان د اوسپنې پټلۍ او سړکونو په جوړولو کې د پانګونې لپاره د خپل هېواد لېوالتیا هم څرګنده کړې ده.

په دې ناسته کې دواړو خواوو د دوه اړخیزو اړیکو د پراختیا او په ځانګړي توګه یې د افغانستان او متحده عربي اماراتو ترمنځ د اقتصادي همکارۍ په اړه هم خبرې کړي دي.

برادر ویلي؛ افغانستان د طبیعي سرچینو له پلوه بډایه هېواد دی او اسلامي امارت هڅه کوي، چې په دې سرچینو کې د پانګونې پر راجلبولو هېواد پر ځان‌بسیا کړي.

هغه زیاته کړې، چې د متحده عربي اماراتو پانګوال کولی شي د افغانستان په بېلابې سکټورونو کې پانګونه وکړي.

د پاکستان د لومړي وزیر مرستیال او د بهرنیو چارو وزیر اسحاق ډار د افغانستان بهرنیو چارو وزارت له چارسمبالي(سرپرست) امیر خان متقي سره ټیلیفوني خبرې کړې دي.

د پاکستان بهرنیو چارو وزارت لخوا د سې‌ شنبې د ورځې د خپرې شوې خبرپاڼې له مخې؛ دواړو خواوو تېره میاشت افغانستان ته د اسحاق ډار له سفر راپدېخوا په دوه اړخیزو اړیکو کې له پرمختګ څخه رضایت څرګند کړ.

په خبرپاڼه کې راغلي؛ د دې اړیکو اصلي تمرکز پر سوداګرۍ، ټرانزیټي اړیکو، اقتصادي همکارۍ، د خلکو ترمنځ اړیکو او د سیاسي مشورتي میکانیزمونو فعالول دي.

دواړو خواوو همدارنګه په سیمه او له هغې هاخوا د سولې او امنیت د ودې لپاره د اوږدمهاله همکارۍ د پیاوړتیا لپاره د لوړې کچې اړیکو د ساتلو پر اړتیا ټینګار وکړ.

اسحاق ډار امیر خان متقي ته د اسلام‌آباد پر وړاندې د هند د وروستیو پاروونکو، غیرقانوني او یو اړخیزو اقداماتو په اړه هم معلومات ورکړل او یو ځل بیا یې د سولې او د خپل ملي حاکمیت د دفاع لپاره د پاکستان پر ژمنې ټینګار وکړ.

امیر خان متقي هم د سوداګرۍ او سفر آسانتیا لپاره د پاکستان د فعالو اقداماتو ستاینه وکړه او اسحاق ډار ته یې بلنه ورکړه، چې بیا افغانستان ته سفر وکړي.

  د اطلاعاتو او کلتور وزارت د ځوانانو چارو مرستیال محمد يونس راشد په خپل کاري دفتر کې د ملګرو ملتونو د عمومي منشي له مرستيال انډريو پاول سبرټون او مل پلاوي سره د ځوانانو پر وړتیتا لوړولو خبرې وکړې.

 محمد يونس راشد د دې بنسټونو د هڅو د ستایلو تر څنګ هيله کړې، چې نړيواله ټولنه دې د افغان ځوانانو د تعليم، تحصيل، کاري او مسلکي ظرفيت لوړونې او روغتيايې مرستو په برخو کې خپل ملاتړ ته پراختيا ورکړي، چې افغان ځوانان د غير قانوني مهاجرت، بېکارۍ او ګڼو نورو ستونزو په برخو کې بريالۍ مبارزه وکړي او د خپل هېواد د آبادۍ او ولس د ښېرازۍ لپاره خپل مسووليت اداء کړای شي.

د اطلاعاتو او کلتور وزارت د خپرې شوې خبرپاڼې له مخې؛ د ځوانانو چارو مرستیال محمد يونس راشد دې پلاوي ته د ښه راغلاست ترڅنګ ویلي: «خوښ دی، چې د ملګرو ملتونو د رهبرۍ لوړپوړي پلاوي افغانستان ته سفر کړی او د مغرضو رسنيو د غلطو معلوماتو پرځای په افغانستان کې شته سرتاسري امنيت، د ولس د آبادۍ او ښېرازۍ هڅې او نور مثبت اقدامات او تغيرات په خپلو سترګو وويني. »

په خبرپاڼه کې راغلي؛ انډریو پاول سبرټون، چې د ملګرو ملتونو د مرستيالۍ تر څنګ د  ملګرو ملتونو د وګړو صندوق  (UNFPA)  د عمومي ریيس مرستيال هم دی، وایي؛ دا يې افغانستان ته لومړنی سفر دی او غواړي، چې له اړوند امارتي ارګانونو سره د ملګرو ملتونو د وګړو صندوق پروژو په اړه خبرې وکړي او د خپلو فعاليتونو د دوام او ممکنه پراختيا په اړه چارواکو ته د خپلې  پاليسۍ په رڼا کې معلومات ورکړي. 

په دې کتنه کې پاول د ځوانانو چارو مرستیال ته ډاډ ورکړ؛ ملګري ملتونه په افغانستان کې خپلو فعاليتونو ته دوام ورکوي او هڅه به وکړي، چې نړيوالې ټولنې ته له افغانستان مثبت انځور وړاندي کړي.

ویل کیږي، چې د ملګرو ملتونو د عمومي منشي له مرستيال سره په راغلي پلاوي کې د آسيا په کچه د UNFPA منطقوي مسوول پيو او په افغانستان کې د دغې ادارې مسوول کوبينا اسانتي هم مل ول.